Итымын но, лудын но гур! вазе

Удмурт Дунне
By Удмурт Дунне 30 августа, 2013 14:15
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Итымын но, лудын но гур! вазе

Комбайнёръёс Л. Степанов, П. Петров но юрттӥсьсы Н. Егоров

Комбайнёръёс Л. Степанов, П. Петров но юрттӥсьсы Н. Егоров

«Исток» огазеяськон — Можга ёросын одӥгез огсыр азинскисез хозяйство. Вишуръёс, нокыӵе шуг-секытъёс шоры учкытэк, пичиен-пичиен азьлане вамышъёс лэсьто. Огазеяськонэн дас арлэсь кема кивалтэ ни Юрий РЯБОВ.

Туэ пӧсь гужем лымшор ёросъёсты зол шуккиз. «Исток» огазеяськонын но зоръёс тыро-пыдо ӧз усе. Ӟег бусыоссы гинэ пӧсез чидазы, тулыс кизем будосъёсын ӵошатыса, умойгес урожай сётӥзы.

Али вишуръёс валэс юоссэс арало. Нуназе котыр ми вуим чабей бусыязы. Кык бадӟымесь «Палессе» комбайнъёс котыр бӧрсьы котыр лэсьто. Огез — Пётр Петровлэн, горд тылзэ ӝуатыса, бункерзэ ӝоктыны удысэзлэсь ӧжыт палэнскиз. Со доры шумприч вуиз ГАЗ-53 автомашина. Николай Марков комбайн вӧзы лач-лач султӥз но, син куспын машинаез зарни ю тысен тырмиз. Водитель ури-бери складэ ширтӥз. Солэн мышказ тузонэз тӧлӟыса ӧз вуы, пичи тэль сьӧрысь КамАЗ потӥз. Та кужмо техникаез 3-тӥ арзэ нуллэ ни Радик Гарифуллин. Одӥг пол нуэмаз 10 тонна пала ю тысь басьтэ. Со Леонид Степановлэсь кутсам чабейзэ нуоз. Таизлэн комбайнэз бадӟым, бункераз кык поллы уногес ю тэре, жаткаез одӥг мынэмаз 7 метр пасьта араса кошке, нош Пётр Петровлэн — 6 метр.

Комбайнёр Леонид Степанов вера:

— Тазэ лудмес араса быдтӥськом ни. Нуназе бере Аэродром бусые сезьы вылэ потом. Ӝоген ческыт пӧсь сиён вуттозы. Ӝытазе эшшо 5 час котырын сюдо на, бер ӝытозь, лысву усьытозь, бергаськом ук. Юосмес кылем арынэн уд ӵошаты, потэмзэ ӝик-ӝик утялтӥськом. Ӟегмы урод ӧй вал. Берло дыре куазь малы ке гурт калык пала уг берытскы…

Бригадир И. Сусоева

Бригадир И. Сусоева

КЗС-э кожатэк ӧм чидалэ. Татын уен-нуналэн шулдыр ужгур чузъяське: егитэзлы но, арлыдоезлы но уж шеде. Ирина Сусоева шоро-куспо арлыдо, туж чырткем кышномурт. Со кладовщик но, бригадир но луэ. Йылпумъяз Асан совхоз-техникумез. Огдыре ужаз гуртысь нылпи садын. Али нош ик эштосэ берытскиз.

Вишуръёс КЗС-ын выль няньзэс куасьто, шерто. Чеберзэ кидыслы кисьто, кылемез фуражлы мынэ. Кысык уж валаса радъямын, кык сменаен ужало. «Петкус» агрегатэн Тимур пиеныз ӵош юэз куасьтэ оператор Владимир Коновалов. Эшез Алексей Ерофеев уйин ужаны потоз.

Ю куасьтӥсьёсын артэ, музон липет улын, йыды шерто гуртысь дано но гажано кышномуртъёс, азьвыл коммунистъёс, сузэр-апайёс Мария Ивановна Анисимова но Галина Ивановна Фёдорова. Нырысетӥезлы 63 арес ни, кыкетӥезлы — 58. Ю шертэмзылэсь азьло соос складзэс чылк-чылк утялтӥзы-буязы, ӝыны толэзь выризы.

Галина Ивановна 37 ар скал кыскиз, устоез доярка вал. Мария Ивановна Сигаевоысь гурт удысъя техникумез йылпумъяз, нокыӵе ужлэсь ӧз палэнскылы: парсь но сюдӥз, йӧлъя учётчик но, бригадир но вал, фермаен кивалтӥз, скалъёсты бызьылытӥз. Сузэр-апайёс коммунистической ужысь ударникъёс вал, ужысь ветеранъёс луо.

Тӥни сыӵе лулысь-сюлмысь ужасьёсынызы данъясько вишуръёс.

Геннадий Романов
Туспуктӥз Владимир Беломорских

Удмурт Дунне
By Удмурт Дунне 30 августа, 2013 14:15
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<