«Иднакар» вите куара

Удмурт Дунне
By Удмурт Дунне 2 августа, 2013 14:54

«Иднакар» вите куара

Вашкала Иднакар

Вашкала Иднакар

25-тӥ мартысен 29-тӥ сентябрёзь «Россия 1» телеканал но Географияя ӟуч огазеяськон «Россия 10» проект-конкурс ортчыто. Адямиос, куаразэс сётыса, бырйыны быгато Россилэсь дас пуссэ — странаысьтымы тужгес чебер но паймымон инкуазь, архитектура но культура синпелетъёсты.

Вожвылъяськон
Конкурсэ пыриськон понна нырысь быръемын вал Россиысь 700-лэсь уно объектъёс. Удмуртиез та конкурсын возьматыны шуд усиз Ижысь Дун-чылкыт Михаиллэн соборезлы, Калашниковлэн музеезлы, Сарапулысь Башенинлэн дачаезлы, Воткаысь П. Чайковскийлэн музеезлы, Кам шурлэн кутсконэзлы (Кез ёросысь Кулига черкогурт дорын) но Глазовысь «Иднакар» музей-заповедниклы.

Та конкурс куинь люкетлэсь. Нырысетӥез радъяськиз 30-тӥ июнёзь. Кыкетӥез кыстӥськоз 1-тӥ сентябрёзь. Отчы шедён понна 80 тунсыкоосыз синпелетъёс пӧлы сюроно вал. Интернет пыр куара сётон возьматӥз: 118 сюрс куара люкаса, Удмуртиысь огназ отчы потӥз «Иднакар» музей. Али со 80 синпелетъёс пӧлын 55-тӥ интыын сылэ но полуфиналэ шедён понна нюръяське. Шаерысьтымы «Иднакар» заповедник «Россия 10» проектын вормисе мед потоз шуыса, куарамес мыло-кыдо сётоно. Полуфиналэ шедёзы 30 устоосыз — тужгес уно куара люкамъёсыз. Собере ини 2-тӥ сентябрьысен 29-тӥ сентябрёзь 30 пӧлысь 10 вормисьёс быръемын луозы. Ӵапак соослэсь кылдытыны чаклало Москва улосын «Россия» ландшафт парк.

— Россилэн валтӥсь парказ сюрон понна али зэмос «ожмаськон» мынэ соцсетьёсын, — веранзэ мытэ «Иднакар» музей-заповедниклэн кивалтӥсезлэн воштӥсез Андрей Кириллов. — Тула, Коломна, Чечня кадь улосъёсын та проект борды басьтӥськизы ини губернаторъёссы, республикаен кивалтӥсьёссы. Соос косо, ӧтё, дэмлало калыксылы куаразэс сётыны. Малы ке шуоно валало, 10 устоосыз пӧлы потон но Россиысь парке шедён бадӟымесь луонлыкъёс усьтозы. Нырысь ик соосты тодозы, тунсыкъяськыны кутскозы, озьыен, та улосъёсын азинскоз туризм. Али ог-огенызы синпелетъёс уг, улосвылъёс вожвылъясько, шуысал мон. Котькинлэн потэ, мукетъёсынызы ӵошатыса, Россиын адӟем карымонгес, йӧногес, культура, история но инкуазь ласянь узыргес но аспӧртэмгес адскемез. Ми, кӧня ке адямиос, ас мылкыд кареммыя тыршиськомы, та проектын «Иднакар» йӧно мед адскоз шуыса. Интернет пыр эшъёсмылы ӵектӥськом куаразэс сётыны, плакатъёс поттӥмы музей-заповедникмы сярысь. Толэзь кутсконын ай «Иднакар» вал 40-тӥ интыын, нош али васькиз ини 55-тӥяз. Соин ик потэ вылэм, Глазовын улӥсьёс гинэ ӧвӧл, шаерысьтымы калык но заповедникмы понна куаразэ мед сётысалзы, адямиослэн патриотизмзы мед сайкасал. Та проект туж умой муг луэ удмуртъёсты но шаерамы вань улӥсьёсты огазеяны.

Кар бервылысь шедьтэм арбериос

Кар бервылысь шедьтэм арбериос

Солдыр гурезь йылын
«Иднакар» музейын ужасьёс мылкыдзэс уг куашкато. Малы ке шуоно али доразы тросгес калык лыктэ. «Россия 10» проект сярысь кылэмзы но отчы «Иднакар» сюремын шуыса тодэмзы бере адямиослы тунсыко потэ: мар со сыӵе «Иднакар», мар отын паймымонэз вань.

Нош паймытӥсез зэмзэ но трос гинэ. Тодмо: Иднакар — со Идна удмурт батырлэн кылдытэм городэз. Кар интыяськемын вал Солдыр гурезь йылын, со огазеяз вань уйпал удмуртъёсты. «Иднакар» музей-заповедникын ужасьёслэн верамзыя, татын инкуазез ик аспӧртэм. Нош IX-XIII дауръёсысь шедьтэм 39 сюрс арбериос эшшо но паймыто. Соос усьто уйпал удмуртъёслэсь улэм-вылэмзэс. Тодосчи, история наукаосъя доктор, профессор Маргарита Иванова Иднакарын раскопкаос дыръя шедьтэм арбериос сярысь шуэ: ужан тӥрлыкъёс, кортлэсь арбериос уно калыкъёслэн ог-огзылы тупаны быгато ке, удмуртъёслэн лылэсь, туйлэсь, азвесьлэсь лэсьтэм кильтыръяськонъёссы чутрак висъясько мукет выжыысь калыкъёслэсь, кылсярысь, сыӵеоссэ уд пумита славянъёслэсь. Иднакар Удмуртия понна гинэ тунсыко ӧвӧл, со быдэс фин-угор культуралэн яркыт синпелетэз луэ. Соин ик 1997-тӥ арын татын, 4 гектар музъем вылын, кылдытэмын вал «Иднакар» музей-заповедник.

Асьмеос ке ӧм, кин?
«Иднакар» музейлэн кивалтӥсезлэн воштӥсез Андрей Кириллов шуэ, Глазовез та проект огазеяз ини. Табере музей-заповедник понна куаразэс сёто Глазовын вордскем, будэм но али шаермылэн палэназ но кунгож сьӧрын улӥсьёс. Нош мукет городъёс палэнэ уг кылё меда? Оло, Сарапулысь, Воткаысь адямиос ӝожомизы, соослэн музейёссы та конкурсын кыкетӥ туре ӧз потэ шуыса, но «Иднакар» понна куара сётыны уг ик малпало?

Шор Прикамьелэн историезлы но культураезлы сӥзем музейысь «Башенинлэн дачаез» адӟытонъёсъя комлексын ужась Валентина Кущева верамъя, «Россия 10» проектысь Сарапул палдӥз шуыса тодэмзы бере мылкызы куашказ ик. Но куатаськыны, пе, ум малпаське, табере «Иднакар» понна СМС-ъёс келялом. Озьы ик малпало Воткинскысь П. Чайковскийлэн музеяз тыршисьёс. Дано крезьгурчилэн усадьбаысьтыз наукая ужась Елена Исаева верамъя, соос та проектэз кутскем дырысеныз син шоразы возизы.

— Куара сётонэз чакласа, ми валамы вал ини, Воткаысь П. Чайковскийлэн музеез конкурслэн кыкетӥ люкетаз уз сюры шуыса. Бен, мылкыдмы куашказ, но милям туж потэ, Удмуртиысь проект финалэ мед потоз. Таӵе учырын Глазов ёрос гинэ ӧвӧл, быдэс Удмуртия «Иднакар» понна куара сётыны кулэ, — мылкыдзэ вера Елена Николаевна.

Интернетэз усьтыса, «Россия 10» проектлэн сайтаз пыриськод ке, мылкыд кӧня ке усе ик. Малы ке шуоно куд-ог синпелетъёс понна куараос миллионлэсь ортчемын ини. Кылсярысь, берло арняоссэ куинь нырысьёсыз радын: Коломнаысь Кремль (туннэ нуналлы 1 миллион 290 сюрс куараен), кыкетӥ интыын сылэ «Чечнялэн сюлмыз», Ахмат Кадыров нимо мечеть (1 миллион 53 сюрс куараен). Нош куинетӥын — Тула областьысь Богородицк городысь музей-заповедник — Иван Старов архитекторлэн пуктэм дворецез (550 сюрс 620 куараен). Нош «Иднакармы» али люкамын 23 сюрс 298 куара.

Валамон ини, миллион куараез сутыны секыт луоз, но ӵошатскон азьланьтӥське на. Асьмелэн вань на дырмы 1-тӥ сентябрёзь 30 устоез синпелет пӧлы шедён вылысь. Со понна куара сётыны луэ Интернет пыр www.10russia.ru адресъя, яке 1880 номере 16 лыдпусэн СМС келяса. Одӥг СМС-эн куинь куара сётыны луэ. Со понна гожтоно: 16 16 16, висказ пробелэз мед луоз. СМС-лэн дуныз — 3,54 манет, НДС-эн валче. Интернет пыр одӥг мурт нуналаз куинь куара сётыны быгатэ ке, телефон пыр котькӧня СМС келяны луэ. Котькудмы быдэн одӥг ке но келям, мултэс уз луы.

Асьмеос ке ӧм, кин-о «Иднакар» музей-заповедник понна «висёз»? Нырысь ик Удмуртиын улӥсьёс бордысь потэ ук, тодозы-а Россиын, фин-угор калыклэн архитектурая сыӵе паймымон синпелетэз вань шуыса. Мукетъёсыныз артэ Глазовысь музей чик но начар уг адскы, нош тодмо инкуазез, туспуктэмъёсты учкыса, сюлэмын шуныт луэ, малы ке шуоно со Удмурт шаермылэн тусыз.

Галина Семёнова

Удмурт Дунне
By Удмурт Дунне 2 августа, 2013 14:54
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<