Гурезе тубон понна анай кылэз тодоно

Удмурт Дунне
By Удмурт Дунне 13 августа, 2013 14:29

Гурезе тубон понна анай кылэз тодоно

Гурезе тубон понна тодоно трос мукет кылъёсыз, удмуртсэ вунэтытэк

Гурезе тубон понна тодоно трос мукет кылъёсыз, удмуртсэ вунэтытэк

2012-тӥ арлэн кыкетӥ ӝыныяз йылпумъянъёс лэсьтэмын вал 2010-тӥ арын Россиын ортчем лыдъян-чотанлы. Соку ик кунамы кутӥзы туж кулэ документъёсты — «Россия Федерациын 2025-тӥ арозь национальной политикая стратегиез» но «Дышетон сярысь» выль законэз. Озьы ик ортчиз «Удмурт Кенешлэн» 12-тӥ съездэз. Табере та документъёс но материалъёс вылэ пыкиськыса, огъя анализ лэсьтыны луэ удмурт калыклэн улоназ ортчись воштӥськонъёслы.

Кысӥсьёс
Россиын демографияя югдур возьматэ: 1989-тӥ-2010-тӥ аръёсы кунамы улӥсьёс 4,1 миллионлы кулэсмизы — 142,9 миллион кылимы. Россиысь Президентлэн азьвыл экспертэз Андрей Илларионов эскериз переписьлэсь лыдпусъёссэ но таӵе йылпумъян лэсьтӥз. 41 бадӟым выжы калыкез (лыдзыя котькудӥз 100 сюрслэсь трос) 6 люкетлы висъяз.

1. «Эмигрантъёс» группае пыризы белорусъёс, украинъёс, немецъёс, еврейёс, комиос но грузинъёс. Та калыкъёслэн нылпиоссы но ичи вордско, нош асьсэос Россилэн палэназ кошко яке мукет калыкъёс пӧлы «сылмо» (ассимиляция).
2. «Кысӥсь» люкетэ висъямын удмуртъёс, чувашъёс, мордваос, поръёс но молдаванъёс. Та калыкъёслэн лыдзы кулэсме кык муген: ӧжыт пиналъёссы вордско но кулон учыръёссы туж трос луо.
3. «Кулэсмись» группае интыямын 7 выжыысь калык — соос пӧлын адыгъёс, башкиръёс, бигеръёс, азербайджанъёс, казахъёс, кабардинъёс но ӟучъёс.
4. «Каллен будӥсьёс» пӧлы пыризы осетинъёс, корейёс, армянъёс, чеченъёс, калмыкъёс но мукетъёсыз — ваньмыз 9 выжыысь калык.
5. «Ӝог йылӥсь» калыкъёс пӧлы пыриз 11 выжы: туваос, табасаранъёс, чиганъёс, аваръёс, лезгинъёс, кумыкъёс но мукетъёсыз. Таосызлэн кулӥсьёссы чараклы ичигес вордскисьёс сярысь.
6. «Иммигрантъёс» группае пыризы таджикъёс, узбекъёс но киргизъёс. Берло 8 ар ӵоже соослэн лыдзы 10 процентлы будӥз — валамон, кунгож сьӧрысь вуэменызы валче.

Пересьмисьёс
Та процессэз ик чаклаз мукетыз тодосчи Анатолий Вишневский. Калыкъёсты со люкиз пересьёслы но егитъёслы. Лыдъяз та выжыысь 60 ареслэсь мӧйы муртъёсты. Озьы удмуртъёс шедизы шӧдскымон пересьёсын группае — 20 процент. Асьме кадь ик учыре тупамын комиос, коми-пермякъёс, немецъёс, мордваос. Ӧжыт гинэ йӧнгес группаын — 18 процент пересьёсын — поръёс, бигеръёс, чувашъёс, ӟучъёс — ваньмыз 9 выжыысь калык. Адске, егитъёссы трос Уйпал Кавказысь калыкъёслэн. Та герӟаськемын, трос нылпи вордскемен но, асваланзылэн ӝутскеменыз но, осконэнызы но. Озьы ик пинал муртъёссы ятыргес чукчаос, хантыос но мансиос пӧлын — татын мугез мукет. Нырысь ик трос нылпиоссы вордско, нош арлыдооссы кема уг уло. Таджикъёсъя, узбекъёсъя, киргизъёсъя юанъёс уг кылдо — татчы ужаны лыктэмын егитъёссы, пересьёссы доразы кылемын. Нош мукет калыкъёслэн югдурзы герӟаськемын, калыксы городэ кошкемен, дышетскеменызы, ичи нылпи вордэменызы. Анатолий Вишневский пусъе: «Калык сураськиз: «Атае — бигер, анае — башкир, асме ӟучен лыдъясько».
Озьыен, А. Илларионов удмуртъёсты пыртӥз «кысӥсь» этносъёс пӧлы, нош А. Вишневский «пересьмись калыкъёс» пӧлы донгиз.

Сылмисьёс
Удмуртъёслэсь 50 ар ӵоже улэмзэс чаклано ке, адске: 30 ар ӵоже (1959-тӥ-1989-тӥ аръёсы) калыкмы 20,6 сюрслы тросгес луиз. Нош 1989-тӥ арысен асьмеос, быдэс Россиын сямен ик, ӝог кулэсмыны ӧдъямы. 2010-тӥ арозь 85 сюрс муртмес ыштӥм, со вакытэ ик Удмуртиысь бигеръёс 11 сюрс муртлы ичигес кылизы.

Нош Россие пазьгиськем удмуртъёс мукет калыкъёс пӧлы уката шаплы сылмо. Кылсярысь, 2002-тӥ-2010-тӥ аръёсы кунысьтымы удмуртъёс 10 сюрс 625 муртлы ӧжыт кылизы.

Эскером одӥг мугзэ та учырлэсь. ООН-ысь экспертъёс чакламъя, туала дуннеын паськыт ортче урбанизация. Талэсь палэнэ уг кыльы Россия но. Туннэ кунамы 70 процентэз калык городъёсын улэ. Нош 20-25 ар ортчыса, каръёсы выжозы 90-95 процентэз. Таӵе ик югдур вуоз Удмурт шаере но. Сое яркыт возьматэ гуртъёслэн быремзы. Кылсярысь, 1959-тӥ арын 3169 гурт поселение вылэм. 2012-тӥ арлы кылиз 1963 гурт поселение. Та лыдпусъёс меӵак герӟаськемын удмурт калыкен — уго асьме выжымы тросгес улэ гуртъёсын. 552 сюрс удмуртъёс пӧлысь 306 сюрсэз кылемын гуртэ — со 55,4 процент луэ. Нош городэ выжон калыкмылы ӟечен уг берытскы. Бигеръёс-башкиръёс, кавказ калыкъёсты вератэк ни, гуртысь городэ лыктыса, асьсэ выжызэс уг ышто. Нош удмуртъёслэн нылпиоссы ик ӟучомо, мукет калыкъёс пӧлы ышо.

Йыромемъёс
Калыкъёсты сылмытонлэсь утёнын бадӟым кужымез дышетон удыслэн. Озьы ке но анай кылэз дышетон школаосын арысь аре синэ. Берло 12 ар ӵоже 147 школаын удмурт кылэз дышетонлэсь куштӥськизы (2011-тӥ-2012-тӥ дышетскон арлэн лыдпусъёсызъя). Кылсярысь, 2000-тӥ арын 33 сюрс пинал анай кылъя урокъёсы ветлӥз ке, 2012-тӥ арын соос 17 сюрс кузя кылизы.

Вылаз ик, городын удмурт кылэз дышетон, кужмоям интые, арысь аре куашка. Соин шаерамы 410 сюрс адями ассэ удмурт шуиз ке но, соос пӧлысь кылзэ тодэ 56 процентэз гинэ.

Озьыен, татын ваче вуэ кык югдур: огласянь — удмурт кылзэс тодӥсьёслэн лыдзы кулэсме. Нош ӟуч кылэз тодӥсь удмуртъёслэн лыдзы арысь аре йылэ. Иське, та уката юрттоз калыкмылы ӟучъёс пӧлы сылмыны? Шонерак тазьы вераны уг луы. Уго ӟуч кылэз тодыса, удмуртъёс, Россиысь мукет калыкъёс сямен ик, матэгес луо ӟуч но мукет калыкъёслэн культуразылы. Ӟуч кыллэн янгышез пичи но ӧвӧл. Огпол Шаркан ёрослэн йырыз Александр Прохоров шуиз: «Удмурт тросгес шугме, ӟуч кылэз лябгес тодэмысьтыз». Ӵапак интыяз верамын. Асьмеос ум тышкаськиське ук англи кылэз, со компьютер программаосын валтӥсь инты басьтэ шуыса. Озьы ке но со понна уг куштӥсько уг ӟуч кылэз тодонлэсь.

Ужпум со бордын: удмуртъёс асьсэос кулэ сюлмаськыны кылзэс, культуразэс, сямъёссэс утьыны. Со сюлмаськонмес шара вераз Удмуртиысь тодмо культуролог Татьяна Томшич — «удмуртъёслэн асьсэлэн удмурт луэмзы уг поты», шуиз со. Та кык адямиослэн верамъёсазы шӧдскымон зэмлыкез вань: дуннеысь культурая гурезьлэн йылаз тубон понна тодоно трос мукет кылъёсыз, аслэсьтыд анай кылдэ вунэтытэк.
(Пумыз луоз «Герд» газетлэн вуоно номераз).

Карл Пономарёв,
история наукаосъя доктор
Туспуктӥз Александр Горбунов

Удмурт Дунне
By Удмурт Дунне 13 августа, 2013 14:29
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<