Етӥн яратэ йыбырттэмез

Удмурт Дунне
By Удмурт Дунне Август 23, 2013 13:39
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Етӥн яратэ йыбырттэмез

 

Е. Корепанова аспирантъёсыныз

Е. Корепанова аспирантъёсыныз

Россиын гурт удысъя 59 вуз пӧлысь кыказ гинэ — Вяткаысяз но Ижысяз — етӥнэз будэтон ласянь ужпумъёсты эскеро. Асьме дорын но, оло, та ласянь визь-кенеш сётӥсь ӧй луысал. Но 2003-тӥ арын та юан борды рос-прос ӝабырскиз Елена Корепанова. Гурт удыс наукаосъя кандидатлэн, Эгра ёросысь Калиновка гуртын 1977-тӥ арын вордӥськем профессорлэн табере 97 наукая ужез ни. Али доктор ужзэ гожтэ. Солэн бурд улысьтыз потӥзы ни 5 кандидатъёс, туннэ эшшо 3-езлы юрттӥське.

— Елена Витальевна, научной ужен выронъя проректорды, профессор Ильдус Фатыхов верамъя, берло 20 ар ӵоже Ижысь гурт удысъя академия дасяз 318 кандидатъёсты. Ӝыныез таос пӧлысь удмуртъёс. Кызьы куспады улӥськоды: тэрытӥськыса я керетыса?
— Олокыӵе но вакытъёс луыло, дыр: ог-огзылы вожъяськон но, ог-огенызы данъяськон но. Вылӥ образованиен, вылӥ культураен луэменызы, созэ но, тазэ но мылкыдзэс тодосчиос эгесасагес возё. Аслам тани тушмонъёсы ӧвӧл кадь. Котькинэн валче улыны тыршисько.
Мон пичи дыръям ик туж востэм вал. Кинлы ке кылме вераны ӧй дӥсьтылы. Толалтэ, липет йылысен лымые тэтчакум, кускозям выйисько но, потэме уг луы ни. Кеськы вал, «лобаме» понна анай-атае одно тышкаськозы. Нош макем зол музъем бордысь ишкалскем потылӥз! Асме тылобурдо кожалляй. Ярам, апае котьку бордам вал. Со мынэсьтым одӥг ареслы гинэ бадӟымгес. Но кужмыз тросгес вал, лэся. Монэ но лымыысь кыске, муре выйылэм сапегъёсме но поттыны «зымылэ». Тау солы: вылам огпол но урттылӥськемез ӧвӧл. Солы монэн йырин ӵемгес йӧтэ ке но вал. Но со понна мыным пунэмзэ котьку берыкъяз. Одно ик чепыльтоз я чабкоз вал. Киыз туж секыт потылӥз. Синвуме кутыны вормытэк, огпол гинэ аслым ӧй шуы: мон нокинэ но таӵе вӧсь карыны уг быгаты.
— Соин-а пичи дыръяды врач луэмды потэ вал?
— Кема дыр ӵоже нокин но луэме уг поты вал. Юасез сюрылӥз ик: будӥд ке, кин луыса ужалод, пӧй. Та вакчи юан мыным секытлэсь но секыт потылӥз. Вазид ке, шудонъёсылэсь люкиськыны, умойгес дышетскыны косозы кадь йӧтылӥз. Нош мон огвакытэ школалэсь пегӟон мылкыдын улыны кутски ни вал. Апаелэсь одӥг класслы гинэ бере кыльыса дышетскеменым, вань предметъёсты азьпала тодыса мынӥ ни. Апае кылбур дышетэ, мон солэсь кылӥсько но йырам кельтӥсько. Апае, атаенымы кенешыса ик, задачаос лэсьтэ, мон но пӧлазы пырытэк уг кылиськы. Таин сэрен нырысетӥ аръёссэ школае ветлэме ик уг поты ни вал: ёзъёсылы дышетӥсь мае валэктэ, мон сое кемалась тодӥсько ни ук. Парта сьӧрын туж мӧзмыса пукылӥ.
Бератаз гинэ мылкыды чутрак воштӥськиз. Эшъёсылэн чебер дӥсяськемзы но ческыт сиськемзы син шорам юн йӧтыны кутскиз. Анае но, атае но ужтэк ноку ӧз пуке. Кыксы но Эгралась нюлэс хозяйствоын тыршизы. Но коньдонмы улыны ӧзгес тырмылы. Гужем вакытъёсы ми апаеным со хозяйствоын ик ужамы: питомникысь пичиесь кызъёсты уримы, утялтӥмы, вылазы ву кисьтамы. Поттэм коньдонэнымы милемлы школае дӥсь но ручка-тетрадьёс басьязы. Нош куд-ог ӵош дышетскисьёсмы ик гужембыт доразы гинэ шудӥзы, выжзэс ӵужыны косыкузы гинэ но, йыркуръяськылӥзы. Но соосты ик анай-атайёссы ортчытъязы: мунёез кадь дӥсяллязы, кампет-печення школае сьӧразы ик ысъязы. Дыльдые шыр-р-р вия вал, ческыт сиськемзэс адӟыса.
Соку тӥни нырысьсэ малпай: ваньмызлэсь умой дышетско, адямие пото но номырлы ноку уг ёрмы. Анай-атае но шуиз: врачлэсь дипломзэ басьтыны туртты вал, нылы, кызьы ке озьы сюдомы-дышетомы.
9-тӥ классэз йылпумъяме бере мылкыды ӝутӥськиз Ижысь медучилищее пырыны. Но анае кутӥз: мугорыд лапег, ачид востэм, мурт городын вӧсь карисьёс сюрозы. Вылаз ик — туж мӧзмись мон. Соин ик 11 классэз Эгралан йылпумъяны косэменыз соглаш кариськи. Урокъёс бырем бере ӝыт дыртӥсько вал биологиен но химиен тодон-валанме муромытон понна воскресной школае. Нош Эграла та предметъёсты валэктыны вуыло вал Ижысь гурт удысъя институтысь дышетӥсьёс. Бератаз соос ик ӵектӥзы: али басьтэм тодон-валандыя экзамен ортчытом, кин биологиез но химиез ӟеч тодэмзэ возьматӥз, сое соку ик кутомы институтэ. Сыӵе шудоос радэ ик сюри мон но. Агрономлэсь ужзэ мургес тодоно кариськи. Ӧз кельшы ке, одӥг ар ортчыса, медакадемие йыгасько, шуи. Но отчы-татчы тэтчаме воксё ӧз поты ни.
Тӧдьы халат уг нуллӥськы шуыса, туннэ чик уг жаляськы. Гурт удысъя институтын дышетскыкум, рос-прос валай: вирез шугектытэк адӟеме уг луы. Озьыен, кыӵе мынэсьтым врач пӧрмысал? Нош гурт удысын аслэсьтым интыме шедьтӥ, лыдъясько.
Институт бере аспирантурае кыльыны косо вал. Но дышетсконме азьланьтон понна мыноно Перме. Асьме дорын соку аспирантура ӧй вал. Нош сокеме дышетскыны анаелэн лэземез ӧз поты. Кылзӥськоно кожай. Ма, оски но: кӧня ке дыр ӵоже колхозын ужатозям, музъемен матэгес тодматскытозям, аспирантура, оло, усьтозы но.
Озьы 1999-тӥ арын Эгра ёросысьтымы ик «Авангард» хозяйствоысь Ӟатча гуртэ распределениен сюри. Хозяйство куашкан калэ вуэмын. Председательлэн ужаны мылкыдыз ӧвӧл. Ужась киос уг тырмо. Бригадир ӧвӧл. Нош колхозникъёслы уж сётоно. Сотэк воксё аналскозы, юон вылэ чӧлскозы. Таин сэрен ик монэ, мылкыдме воксё юатэк, ёрос кивалтӥсьёс ӵектэмъя, бригадире юнматӥзы. Хозяйствоын ужасьёс ваньмыз сямен арлыдо воргоронъёс. Нырысьсэ доразы косонэн матэктыкум, шорам мынязы: кыӵе еж мае ке татчы ыстӥллям, пӧй. Одӥг-огез меӵкытӥз но: ымпумысьтыд йӧлыд куасьмымтэ на, нош тон кузёяськыны кутскиськод-а? Но отӥяз ӟеч мылкыдъёсын лыктэмме валазы. Нокинлэсь но ӧд кылзӥськы ке, банкрот калэ вуэм хозяйствоед воксё куашкалоз ук. Нош соослы юрттон вылысь городысь лыктӥз пинал нылмурт. Оло монэ, оло бырись колхоззэс жаляса, тросэз пумен юаны кутскизы: маин юрттоно, нылы?
Осконзэс шӧдыса, аслам но куарае будӥзгес. Отчыозь ноку ӧй малпалля, кивалтыны пӧрмыто шуыса. Ма, мукет возэз но ас вылам ныпъяны дӥсьтӥ — татын агрономзы но ӧй вал. Нырысь ик басьтӥськи лыдъян-чотан борды: кыӵе культураез кудаз бусые кизёно-мерттоно, кӧня солы коньдон кошкоз, кӧня барыш поттыны быгатом. Таӵе эскеронъёс воксё но отчыозь нуэмын ӧй вал. Ма, колхозын уждунэз но адӟылытэк ужаллязы. Ачим но 100-200 манет сяна аванс ӧй басьтылы. Сием сяна, егит муртлэн дӥсяськемез но потэ на ук. Ярам, мынам семьяе ӧвӧл. Нош макем cекыт йӧтылӥз нылпиен муртъёслы! Уноез таӵе югдурлы чидатэк, мукет азе улыны кошкылӥзы.
— Тӥ но соослэсь адӟем кароно кожады-а?
— Ӟатчае нырысьсэ лыктыкум ик, сюлэмы куалектӥз. Гуртазы пырон дорын ик — адями шайвыл. Таӵе суредэз малы ке ӧй возьма вал. Ма, бертыкуд но, кошкыкуд но шай мед пумиталоз-келялоз ай! Кинлэн мылкыдыз капчи луоз меда? Ма, улэмъяд таиныз но, оло, тэрытӥськысалыд. Гуртоос лякытэсь вал. Монэ ас дораз улыны басьтӥз пересь кышномурт. Огпол нылъёсын люкаськимы но дораз тунаны пуксимы. Вакчи чуръёс гожъямы, кинэ ма возьма азьланяз шуыса. Ваньзэ сое сурамы но изьы пушкы понӥмы. Кыски но лыдӟи: дышетсконме азьланьто. Сюлэмы ик вырӟиз. Аспирантурае пырон пумысен малпанъёсме отчыозь зӥбломытыны весь выри, льӧль дуннеын улӥд ке, зэмос ужед но кулэ уз луы ни, сое адӟемпотостэм карод шуыса. Нош тунаськеммы бере воксё бурдъяськи. Сћзён быдэсмиз ик.
Гурт удысъя академиын аспирантура усьтӥськиз шуыса ӧй кылысал ке, монэ отчы ӧтьыны соку ик ӧй кутскысалзы ке, оло эшшо кӧня ке дыр ӵоже колхозын ужасал на. Кин тодэ, оло, отчы ик выжы лэзьысал ни, бызьысал. Распределениен гуртэ келямъёс пӧлысь уноезлэн сыӵе адӟонэз ук. Нош мон ӝутӥськи но городэ кошки. Гуртоослэн лэземзы воксё уг поты вал. Квартира но висъязы. Но улон инты гинэ уг возьы ни. Хозяйство но кык ар ортчыса быриз.
— Ильдус Фатыховлэн верамез вань: пие профессорлэн семьяяз будэмын, гурт удыс наукаосъя кандидат луиз, но тодон-валанэныз но быгатонлыкеныз Елена Витальевна дорозь со ноку уз сузьтӥськы. Корепанова огшоры колхозникъёслэн семьяысьтызы гинэ ке но потэмын, кужмыз тырмиз доктор уж гожтон борды басьтӥськыны, тани-тани сое утёз. Туннэ Удмуртиын етћн будэтонъя докторъёс ӧвӧл на, пе. Асьтэлы тӥледлы таӵе данъяськонзэ вераллямез вань-а?
— Солэн пиез — мынам аспирантэ вал. Ильдус Шамилевич сое тодон-валан басьтыны дорам ыстэмезлэсь азьвыл вераз ик: котькуд анай-атай аслэсьтыз нылпизэ эмъяськыны келялоз тужгес ӟечез врач доры. Мон но пиме тужгес оскымон но кужмо профессор борды юнматӥсько. Со ачиз но, гурт удыс наукаосъя доктор ке но, дорам ӵемысь визь-кенешлы пыра. Уг, пе, возьдаськиськы, етӥн будэтонэз уггес тодскы шуыса.
— Улондэс малы одно ик етӥнэн герӟано кариськиды?
— Нянь будэтон азинскемын ке, етӥн воксё аналтэмын вал. Сюлэм ик вырӟылӥз: малы лыз буртчин шоры чиньы пыртӥ кадь гинэ учко меда? Академилэн бусыосаз гинэ но сое будэтыса уг эскеро вал. Нош макем ӟеч культура со! Етӥнлэсь олифа но буёлъёс лэсьто, дӥсь вуро. Собере, умой пудо сиён сяна, сое усто эмъюм чотын но кутыны луоно!
Нялтас вераса, мон али ӵукналы быдэ тысьёссэ изӥсько но кык чечы пуньыен сиисько. Ньылонэ медаз лякиськы шуыса, шуныт ву ӟузисько. Отын уго 70 пумо микроэлементъёсыз. Зэм, кин ке но шуоз: мар изыса курадӟод меда, аптекаын туннэ олокыӵе но витаминъёс вузасько ни. Но куд-ог витаминъёс ӝушез гинэ быдто — кислотаез вань. Нош етӥнэз ӵошато зарезь сиёнъёсын. Тазалыклы но изъян уг вайы. Кидысъёссэ сиыны кутскеме бере, кизьнылон-кызонэн висемысь дугдӥ. Гижыосы но йырсие юнмазы.
— Етӥн — сокем ӟеч культура ке, малы сое будэтон дасо ар талэсь азьвыл гинэ аналтэмын вал?
— Етӥнэз будэтон но азинтон пумысен научной ужъёс дасян, соосты хозяйствоослэн кивалтӥсьёссы дорозь вуттӥсез ӧз сюрылы. Али Удмуртиын 6 сюрс гектар вылын етӥн будэто. Россиын та ласянь асьмеос кыкетӥ интыез басьтӥськомы, нырысетӥез — Новосибирск. Нош соку сое будэтыны дћсьтћсез ӧжыт вал. Нокыӵе эскеронъёс, селекция ужъёс ӧз нуиське. Ма, кинлэн етӥн азьын йыбырттэмез потоз ни! Сяськаяськыкуз со туж чебер! Синдэ ик уд вошты. Но сяськаез шоры гинэ учкыса пукид ке, пайдаез луоз меда? Палэнысен малпалод: мар секытэз кадь етӥнэз котыр ласянь эскеронлэн? Но научной уж гожтон понна ваньзэ ас киыныд лэсьтоно: кизёно, ишконо, ваёно, жаглэсь сузяно, сэстоно. Кус ик чигиське. Нош макем зол быро киос, чурыт модосэз сэстыса! Ма, йырын ужаны дышем мурт бусыын уз губырскы ни — капчизэгес ӧр утчалоз.
Нош мон пичи дырысеным нокыӵе ужлэсь уг кышкаськы. Пиньме куртчыса, котьмае лэсьтыны дась. Соин но ялан малпаськыны кутски: етӥн колхоз бусыосын туж урод будэ, асьме инкуазьмы солы тупа ке но. Малы?
Та йырвисёнэз сэрттоно-пертчоно кариськи. Бызьылэмен-сюлмаськемен, асьме Правительствомы но югдур шоры синъёссэ пумен усьтћз. Нырысь-валысь секытгес ик вал. Опытъёс лэсьтон понна етӥн бусыед ныр улын луыны кулэ. Академилэн учхозаз солы инты мед висъялозы шуыса, кӧня сюлмаськоно луиз! Мукет культура ӧвӧл-а, мар-а шуисез но сюрылӥз. Нош кызьы будэмзэ, ку кисьмамзэ, кыӵе удобрениен умойгес «эшъяськемзэ» эскерон понна котькуд учыре кыдёкысь колхозэ уд шонты ук! Тодэ вал, макем мон шумпотӥ, учхозын бусы висъямзылы. Оло котырысьтыз кошкылымтэеным, оло мукет муген мынам культурае туж удалтӥз. Малпаськыны кутски: малы колхоз бусыосын со туж начар будэ?
Шараяськиз: асьме хозяйствоос нырысь нянь кизё, собере гинэ — етӥн. Соку омыр ӟырда ни, музъем кӧса. Вылаз ик, май толэзе куддыръя зор уг усьылы ни. Етӥн модослы вылэгес ӝутӥськыны но кужмояны ву кулэ. Зор ӧвӧлэн, со интыяз ик долка. Соин ик урожай но кулэсме. Та югдурысь пегӟон вылысь, етӥнэз бусые тракторъёсын пырыны луэм бере ик кизёно. Омыр 15 градусозь шунамын ке, со уз кынмы ни. Эсьмаса, май пумозь рос-прос ӝутӥськыса вуоз.
Собере, етӥн уг яраты люко музъемез. Со ӟеч-ӟеч мед пушъёз шуыса, бусыез сӥзьыл ик рос-прос небӟытыса гыроно, тулыс эшшо зуркатоно на. Вольыт бусые кизид ке, одӥг ӝужда ӝужъёз но. Озьыен, комбайнэн но сое утялтыны капчи но умой луоз. Ого-пало пушъемзэ етӥн погыртыны нимысьтыз чаклам техника гинэ но ӟеч уз басьты. Урожай чебер мед луоз шуыса, цинкен но ыргонэн тырмыт суретъёсын пазяно.
Та пумысен вераськонъёс нуэм бере хозяйствоос ваньзэ тае али лыдэ басьто ни. Юанъёссы кылдо ке, жингырто.
— Кызьы малпаськоды, етӥн будэтон отӥяз кызьы азинскоз Удмуртиын?
— Со борды басьтӥськисьёс эшшо но тросгес мед луозы шуыса, али 18 выль выжыез эскерисько. Бырйисько, кудӥз асьме музъемъёсмылы золгес тупалоз.
— Тӥляд отпускты но бусыын ортче, лэся…
— Етӥн уго ӵапак июль-август толэзе кисьма. Сыӵе дыръя дорын лӧж-лӧж уд пукы ни. Аспирантъёс но котырам кыстӥськыны кутскизы. Соос мыным оско ук. Ма, диван вылын погылляськыны но дышемын ӧвӧл мон. Соин но котькуд шутэтскон нуналъёсы анай-атае доры гуртэ дыртӥсько. Турын вакытэ но юрттӥськытэк уг кылиськы.
— Егит дырды бусые ик кылёз шуыса, кышканды ӧвӧл-а?
— Шутэтскытэк уг улӥськы. Толалтэ одно султӥсько куас вылэ. Республикаямы ортчылӥсь ӵошатсконъёсы но пыриськисько. Куасэз яратон мылкыд мыным анай-атае пыӵатӥз. Пичи дыръям быдэс семьяен куас вылэ султылӥмы, ёросамы ортчылӥсь ӵошатсконъёсын нырысетӥ интыосты но басьтылӥмы.
Мыным 36 арес. Улонын нокызьы но бырйытэк уг луы: яке семья, яке уж. Мон туннэ бырйи кыкетӥзэ. Зэм, ачим туж кышкасько улонын огнам кыльыны. Но мукет малпан но вань: татчыозь наукаен сомында выри ни бере, бадӟым вамыш лэсьтон азям чигнало на шат? Оскисько: шедьто на парме. Куд-огез 40 аресын но сюан ортчытэ на, шудо луэ ук. Но мон вӧзам ляб пиосмуртэз уг чида. Визьмоез кулэ. Со дорозь вань улытозям мед кыстӥськом, солэсь мед дышетском. Огшорыез вӧзын мон улыны уг быгаты. Йќнозэ ӧй пумита ке, огнам нылпи ваё. Колхозын ужаны кутскеме бере ик бызьысал ке, мон таӵе бырйиськись ӧй луысал. Еж дыръя шузигес луоно ук. Соку шорам учкылӥсьёсыз но вал. Но ачим мукетгес дуннеын улӥ. Табере чакласькисько ни. Шӧдӥсько мукетсэ но: кужмо но визьмо кышноослэсь пиосъёс кышкалогес.
— Гуртоосты тӥледын туж данъясько, дыр?
— Гуртам бертӥсько ке, ӟезьы азе потанлэсь возиськисько ик. Малы ке возьдаськон-кепыран сямы сайка. Апаелэн нылыз пичи дыръяз весь шуэ вал: будӥ ке, Лена апай кадь тодосчи луо. Кунгож сьӧры визь-кенешен юрттыса но олокӧня пол поталляй уго. Али но командировкаосысь уг ваньмиськы. Тае со адӟытэк-тодытэк ӧз улы. Нош алигес, 11 арессэ тырмытэмез бере, меӵкытӥз: Лена апай кадь, уез-нуналэз валатэк, ялан ужад ке, шузимод. Мон мукет уж утчало, пе. Оло, озьы верамез но кепыран сямме сайкатӥз. Ваньмыз уг валало ук наукаен вырисьёсты. Выль эскеронъёс ортчытӥськод, выль выжыез чакласькод — калык дорозь ваньзэ сое вуттон понна дыр кулэ. Куд-огез лыдъя: бакчае пот но ӵукнаозь ужа — кӧтыд тыроз. Гудћськон секыт уж, туж кулэ маке, но кинлы ке но наукае но кыстӥськоно ук.

Елена Сараматова

Удмурт Дунне
By Удмурт Дунне Август 23, 2013 13:39
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<