Егитъёслы ӧсъёс усьтэмын

Удмурт Дунне
By Удмурт Дунне 30 августа, 2013 12:53
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Егитъёслы ӧсъёс усьтэмын

В. Соловьёв

В. Соловьёв

Вылӥ кивалтӥсьёс берло дыре бадӟым саклык висъяло егитъёслы. Таин сэрен но федерал центр 2012-тӥ арын Егитъёсын ужанъя министерстволэсь удыссэ паськытатӥз но муромытӥз. Туннэ со сярысь вераськиськомы министрен Владимир Соловьёвен.

— Владимир Михайлович, калыклы сётӥськись юрттэтъёс пӧлысь кудзэ меда нимысьтыз пусйысалды?

— Вань ведомствоос музэн ик, ми но калыклэсь вазиськонъёссэ огзэ но палэнэ ум кельтӥське. Киын гожтыса ваем куриськонъёс пумен кулэсмо — тросгес юало-верало Интернет вотэс пыр. Сайтмы ужа, «ВКонтакте» бамын но табере ми вань ни. Со сяна, монэным ваче син пумиськыны мылкыд карисьёслы ӧсэ котькуд пятницае усьтэмын. Туэ ӝыны ар куспын министерствое вазиськонъёс 17 сюрс 268 вал. Со пӧлысь 6 сюрс 742-ез — оскон телефон пыр, 10 сюрс 526-ез пӧртэм пумиськылонъёс но консультациос дыръя сётэмын, 55 мурт юанэныз меӵак мон доры вуылӥз. Араз вазиськисьёс 28 сюрсозь вуо. Уже интыян, дышетсконзэс азинтон, егит семьяослы капчиятэм кредит пумысенгес юаллясько. Тужгес шӧртчиосыз юанъёссылы валэктон шедьто www.molodoy.udm.ru сайтамы.

— Валэктон сётыса гинэ, уд буйгаське, лэся…

— Мылкыд карисьёслы ужбергатон, экономика, коньдон ужпумъёсъя ватсаса тодон-валан сётӥськомы на. Пӧртэм семинаръёс, олимпиадаос, курсъёс, лагерь сменаос — мар но уг малпа бурд уламы ужась Экономикалы дышетонъя но ужбергатонъя центр.

Со сяна, Егитъёсты уже интыяны юрттонъя центрен ӵош 14-18 аресъемъёсты, дышетсконзылэсь вис карыкузы, интыянэн выриськомы. Туэ гужем гинэ 1 сюрс 679 нылпилы уж сётӥмы. 995 мурт интыямын вал, ёросъёсысь кивалтӥсьёс но ужбергатӥсьёс сюлмаськемен.

Студотрядъёсты но палэнэ ум кельтӥське. 80 отрядын туннэ 1 сюрс 500 егит мурт лыдъяське. Мукет улосъёсын ӵошатоно ке, асьмеос та ласянь котькинлэсь адӟем карымон. Студентъёсмы гужем но, толалтэ но асьсэлы уж шедьто, спартакиадаос, фестивальёс, пӧртэм социальной проектъёс радъяло. Соослы ужаны но асьсэды шедьтыны юрттон вылысь республикамылэн бюджетысьтыз висъямын вал ог 1,5 миллион манет.

— Но котькудӥз соку ик аслыз инты но, эш но уг шедьты. Министерство визь-кенешен та ласянь юрттэ-а?

— Бурд уламы ужась «Психолог-плюс» центрысь специалистъёс сыӵеослы котьку кизэс мычыны дась. Егитъёслы гинэ визь-кенеш уг сёто соос — пичи нылпиослы но, анай-атайёслы но, арлыдо муртъёслы но. (3412) 658-072, (3412) 658-073 яке 8-800-2000-122 оскон телефонъёс, котькытысен жингырты, дунтэк ужало. Егит семьяосты огазеяло нимысьтыз клубъёс. Психологъёс, наркологъёс, сексологъёс нимысьтыз тренингъёс ортчытъяло, гуртъёсы но потало. Тазэ ужан ӧрмес зол дунъясько — семьяосты юнматыны кужым вань.

— Ньыль ар талэсь азьло егитъёсын ужанъя огазеяськонъёсты 23 вал, туннэ 31. Соослы министерство кызьы но маин юрттэ?

— Лыдпус сьӧры ми ум уйиськиське. Сыӵе огазеяськонъёс эшшо но тросгес луысалзы, дыр. Но ми кужмоосыныз гинэ ужаськомы. Туж чакласькомы: пиналъёслы мед быгатозы соос Атыкай музъемез яратон пыӵатыны. Нылпиос урам кузя ужтэк медаз костаське шуыса, соослы пӧртэм шудонъёс, ужрадъёс мед ортчытозы. Кивалтӥсьёссылы визь-кенешен юрттӥськомы, проектъёссэс учкиськомы.

— Владимир Михайлович, кызьы министерство чакла: кӧня егитъёсмы, кыӵе сюлмаськонъёсын соос уло, мае возьмало улонлэсь?

— Та секыт ужпумез эскерылӥзы «Егит семья» но «Аналитикая бюро» центръёс. Туэ соосты огазеязы. Но ужзы воксё но ӧз кулэсмы. Секыт югдуре сюрем пиналъёсты но, уж утчасьёсты но — огзэс но син азьысьтызы уг ышто. Социологъёсмы быдэс республикамес ортчо, егитъёс пӧлын анкетирование ортчыто, пӧртэм клубъёсы, дискотекаосы асьсэос но пырало. Собере вань тодэм-адӟемзэс огазеяло, рос-прос йылпумъянъёс лэсьто.

— Мар бордын эшшо ужа на министерство?

— Нылпиослэсь но егитъёслэсь шутэтскон дырзэс радъян — огез бадӟымез сюлмаськонмы. Та уж борды арлы быдэ октябрь толэзе ик басьтӥськиськомы. Гужем вакытэ лагерьёсын шутэтсконзы, ужан вакытсы йӧн-йӧн мед ортчоз шуыса, азьвыл ик проектъёс дасяськомы, соосты паськытатэм кенешонъёсын эскериськомы, чакласькомы, кӧня тыр усёзы шуыса. Нялтас вераса, туэ нылпиослэсь шутэтсконзэс радъяны республикалэн бюджетысьтыз висъямын вал 22 миллион манет. Июнь толэзе гинэ 11 профильной смена ужаз. Озьы 1 сюрс 860 муртлэсь дырзэ шулдыртӥмы.

Вераме потэ: Егитъёсын ужанъя министерстволэн ӧсъёсыз котьку усьтэмын егит муртъёслы но, огазеяськонъёслы но. Ми мылысь-кыдысь ужаны дасесь егитъёс понна сюлмаськисьёсын.

Печатлаське «Удмурт Республикалэн 2011-тӥ-2013-тӥ аръёслы чаклам бюджетысьтыз расходъёсты ӟечомытон» программаез но «Шара бюджет» проектэз быдэстон улсын.

Сергей Захаров

Удмурт Дунне
By Удмурт Дунне 30 августа, 2013 12:53
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<