Егит кырӟасьёслэн феномензы

Удмурт Дунне
By Удмурт Дунне Август 27, 2013 10:36
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Егит кырӟасьёслэн феномензы

Иван Котельников, Николай Анисимов, Алёна Тимерханова, Алексей Бегешев

Иван Котельников, Николай Анисимов, Алёна Тимерханова, Алексей Бегешев

Туэ гужем егит кырӟасьёс Алёна Тимерханова, Коля Анисимов, Ваня Котельников, Костя Никитин, Надя Наговицына, шаерамы сяна, шулдыр концертъёсын вуылӥзы Башкириысь но Татариысь удмурт гуртъёсы. Котькытын соосты шуныт пумиталлязы, учкисьёс куддыр залэ но ӧз тэрылэ.

Калык мӧзмем, лэся, выль удмурт кырӟанъёслэсь, мукет сямен кызьы валэктод концерт понна 30-40 иськеме ветлэмзэс яке одӥг концертэз пӧртэм интыосын кык пол учкемзэс?

Тунсыко: ужрадъёс сярысь шунытэн гурт калык гинэ уг вера, асьсэлы артистъёслы но ветлэмзы туж ярам. Алексей Бегешев, яке Чумолё Олёш, нуись луыса уно ужрадъёсы вуылэ. Пияшлэн верамезъя, «Бадӟым удмурт концертъёслэсь» шуныт гинэ тодэ ваёнъёс кылизы.

Чумолё Олёш
Удмурт артистъёсты эркияло Башкириын
Башкирие вуылыны шуд усиз Алёна Тимерхановалэн ӧтеменыз валче. Со уно концертъёсын сэрен туж шер кырӟа вордскем палъёсаз. Нош куке сыӵе виссэ шедьтэ, залын буш интыос уг кылё. Ми ветлыку но озьы луиз. Ньыль нунал ӵоже клубъёсы туж трос калык люкаськылӥз: адямиос сылӥзы радъёс вискын, куд-огез укно пыр адӟиз. «Бадӟым удмурт концертэз» Башкириын 600-лэсь трос удмуртъёс учкизы. Ми понна со туж паймымон но шумпотымон вал — Удмуртиын таӵеез шер луэ.

Валамон, тамында адями ӧз вуысал, ӧз яратысалзы ке учкисьёс удмурт артистъёсыз. Кырӟасьёс Алёна Тимерханова, Ваня Котельников, Коля Анисимов, Удмурт театрысь егит артистъёс Надя Наговицына но Костя Никитин туж быгатыса шулдыртӥзы. Надяен Костялы нимысьтыз бадӟым тау, соос эктӥзы но, кырӟазы но, акробатикая шуг номеръёс но серемес миниатюраос пуктӥзы. Юнме дышетскиллямтэ Москваысь Щепкин нимо вылӥ театральной училищеын!

Башкириын витьымтэ шорысь бадӟым кузьым лэсьтӥз Татышлы ёрос администрацилэн йырыз Рушан Гараев. Алёна Тимерхановалэн вордскем гуртаз вань учкисьёслы билет дунэз берыктӥзы. Артистъёслы коньдон тыризы ёрос бюджетысь, со борды йылтӥзы 10 сюрс манет премия! Таӵезэ нокин ӧз возьма.

Уд оске: Башкириын ми нырысьсэ та командаен ужамы. Нош али малпаськод, котьку ӵошен сцена вылэ потамы кадь. Ялан тыршиськомы программамес вошъяны, пыртаськом выль номеръёс. Таиз ласянь милемлы юртто Дима Корепанов но Маша Дмитриева. Бадӟым тау соослы.

Озьы ик туж бадӟым тау шуэме потэ Алёна Тимерхановалэн сузэрезлы но анай-атаезлы, Самигуловъёслэн семьязылы шуныт пумитамзы, куноямзы понна. Бадӟым тау вань учкисьёслы но — сыӵе зол кичабонъёсты кемалась ӧй кылылы вал ни.

Люба Михайлова
Кемалы ум люкиське
14-тӥ августэ Татарстанысь Огырчи ёросысь Варклед-Бӧдья клубамы вуылӥзы кема возьмам удмурт кизилиос: Николай Анисимов, Алёна Тимерханова но Иван Котельников. Мыло-кыдоесь вал концертэз нуисьёс: Дмитрий Корепанов но Ирина Филимонова — Маймыл Митрокен Ури-бери Орина. Мар но ӧз вералэ, кызьы но ӧз серекъятэ! Утыр соос юрт котыразы керетэмъясько, утыр шуныт палъёсын шунды шорын пыжо…

— Концерт шулдыр вал. Быдэс ӝыт чабким, артистъёсын ӵош кырӟам. Сыӵе кельшизы — лэземмы уг поты вал, — мылкыдзэ вера 11-тӥ классын дышетскись Света Фёдорова.

Бӧдьялан клубмы выль, со кылем арын гинэ усьтӥськиз ай. Ортчем концертын буш интыос ик ӧй вал. Мукет гуртъёс но мылкыд кариллям дорамы лыктыны, кизилиосын выль клубын шулдыръяськыны.

Клубен кивалтӥсьмы Ольга Халитова шуэ:
— Кылем ар понна бадӟым шумпотон луиз клублэн усьтӥськемез, нош туэ — та шулдыр концерт!

Амалтэк соин соглаш луисько.

Гажано куноосмылы бадӟым тау кариськом дорамы вуылэмзы, капчи мылкыд кузьмамзы понна. Оскисько, кемалы ум люкиське!

Леонид Гусев, «Мынам Удмуртие» радиоысь крезьгуръя редактор
Огвыллемлэсь пегӟон
Мон малпамъя, калыклы котьку кельше маке вылез, сюлэмез вырӟытӥсез, тодмотэмез.

«Мынам Удмуртие» радиолэн фонотекаез туэ гинэ 80-лэсь трос кырӟанъёсын узырмиз ни. Соос пӧлысь данакез — егитъёслэн кырӟанъёссы. Выль крезьгуръёс ӵем чузъясько эфирын, калык дыше кырӟасьёслэн куараоссылы, асьсэды но адӟемзы потыны кутске. Зэмзэ ке верано, берло дыре удмурт эстрада огвыллемгес луыны кутскиз вал ни, ӧз тырме выль куараос. Жаль соиз но: туала егитъёслэн крезьгурлы нимысьтыз дышетскемзы ӧвӧл, нош кулэ вылэм.

* * *
Ма бен, сӥзёмы егит артистъёсмылы выль кырӟанъёс но эшшо но тросгес учкисьёс-кылзӥсьёс!

Лена Рябина

Удмурт Дунне
By Удмурт Дунне Август 27, 2013 10:36
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<