Четлыкысь потыны вормытэк

Удмурт Дунне
By Удмурт Дунне Август 20, 2013 11:11
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Писательёс О. Поскрёбышев, Г. Красильников, Ф. Васильев

Писательёс О. Поскрёбышев, Г. Красильников, Ф. ВасильевК

5 ар ӵоже Василий Михайлович УАССР-ысь культурая министр, 20 ар џоже «Советской Удмуртия» газетлэн валтӥсь редакторез вал. Висказ дыр шедьтылӥз творчестволы — поттӥз 3 книгазэ. 23-тӥ гудырикошконэ солы тырмоз 90 арес. Ӵектӥськом тодматскыны Василий Михайловичлэн гожъямъёсыныз.

Малы меда сокем вазь кошко улонысь тросэз кибашлы творческой ужасьёс? И. Дядюков улӥз 59 аресозь, М. Петров — 50, П. Чайников — 38, И. Гаврилов — 61, нош Г. Красильников — 47 аресозь гинэ. Солэсь но вазь кошкизы Ф. Васильев, М. Покчи-Петров, Р. Валишин. Зэм, сое инкуазь законъёсын уд валэкты — котькуд адямилэн улон сюресэз аслаз. Нош тазьы малпаськод ке, сюлэм бӧрдэ: кӧня чеберлыко произведениос, устоесь творческой ужъёс быдэсмытэк, калыке вуытэк, кылё, соин валче бездыт луэ быдэс литературамы, быдэс культурамы.

Тани Геннадий Дмитриевич Красильников «Вуж юрт» трилогизэ но быдэстытэк кельтӥз. Нош кыӵе уно малпанъёсыз вал ай солэн. Чай юыса пукылон дыръёсы но со трос пол жаляса вералляз:

— Юнме соглаш луи та Ижевске лыктыны, Союзэн кивалтыны. Эшшо ке депутатэ, Вылӥ Кенеше тӧрое бырйизы. Гожъяськыны дыры чик ӧвӧл ни. Нош писатель уг ке гожъяськы, со писатель ӧвӧл ни — кыӵе ке чиновниклы пӧрме.

Нош солэн сюлэмаз пыӵамын вал калык пӧлын луон, отысь ас произведениосызлы геройёссэ утчан. Алнаше вуылыкуз, котьку ик сое утчано луэ вал. Ма, предмы доры кошкиз, лэся, собере комбайнёръёсын пумиськыло, шуэ вал, вералляз анаез.

Яке тани со шуныт гужем ӝыт шур дуре кӧлыны дугдэм чиганъёс дорын ни. Соослэсь кырӟамзэс кылзэ но собере удмурт гуръёсты мытэ, бӧрсяз чиганъёс но итӥсько. Кытчы гинэ со уг вуы, котыраз тачак адямиос ни, котькудӥныз соку ик одӥг кыл шедьтэ.

Одӥг гужем ӝытэ со чорыганы ӝутказ Кам дуре. Татарстанысь Голюшурмае вуим но, бордамы эшшо олокӧня мурт итӥськиз. Кӧня ке чорыгам, шыд пӧзьтӥм, сиським, нош «литературной ӝытмы» йылпумъяськиз уйшор бере гинэ. Сое вис карытэк часъёсын кылзыны дась луо адямиос.

Озьы ик вал, Москваын Литературной институтын дышетскыкуз но. Мон соку Вылӥ партийной школаын тодон-валанме будэтыны кемдӥ, Геннадий Дмитриевичен котькуд шутэтскон нуналэ пумиськылӥмы. Отын со группаязы староста вал. Дипломной ужзэс сётыкузы но, Переделкиное куасэн бызьылыны ветлыку но, общежитиязы но адӟиськод вал, макем сое гажало эшъёсыз, дышетӥсьёсыз. Отын ик сое Писательёслэн союзазы ёзчие но кутыны дэмлазы.

Сюлэмызлэн калык пӧлы кыстӥськемез шӧдӥськылӥз улонэзлэн берло аръёсаз но. Со ӵемгес висьылыны кутскиз, дораз яке больницаын эмъяськыкуз, четлыке шедем пислэг кадь луэ вал. Нош кыӵе шумпотылӥз, кытчы ке районэ потан учыр тупаку. Огпол мон дасяськи Яр ёросэ. Со вакытэ ӵап ивор вуиз отысь солдатлэн Китаен кунгож дорын ваче пумит вуылыкузы быремез сярысь. Геннадий Дмитриевич соку ик ӝутӥськиз сьӧрам, нош кӧня ке нунал ортчыса, «Советской Удмуртиын» печатламын вал ни Яр палась Золотарёв солдат сярысь очерк.

1974-тӥ арын Красильников Москваысь больницаын кыллиз. Мон ГДР-е мыныны потӥ. Москва вамен потыса, кызьы Красильников доры уд пыра? Пичи гинэ палатаын огназ. Мон отын дыръя врачез но пыраз — пересь маке, пельыз но секыт ни.

— Тӥни таӵеослы оскиськыса улӥськод, — шуиз Геннадий Дмитриевич врач потэм бере. — Нош пайдаез уг шӧдӥськы.

Тужгес но сюлэмшугъяськиз мытэм ужъёсызлэн дыг мынэмзы, нуналъёслэн тырттэм ортчемзы пумысен.

«Кулонэн улон вискын» нимо вал солэн «Советской Удмуртиын» берпуметӥез печатлам очеркез. Сое гожтон понна, Семён Иванович Ворончихин профессорен вераськыса, сюлэмлы операция лэсьтоназы ветлӥз. Нош 1975-тӥ арын тулыс со ачиз кулонэн улон вискы вуиз. Больницае выдоно луиз.

— Музъем усьтӥськытозь, ӧжыт йӧнатско но гужембытлы сад-бакчаям улыны мыно, — шуиз вал со. — Отын гожъяськыны но умой луоз.
Но улон мукет сямен берытскиз — 13-тӥ апреле солэн сюлэмыз ужамысь дугдӥз.

Тодмо критик А. Макаров Красильниковлэн нырысь повестеныз но веросъёсыныз тодматскемез бере ик гожъяз: «Г. Красильников, веранэз ӧвӧл, удмурт прозаикъёс пӧлысь самой бадӟым талантэн адями. Со вала, кыӵе луыны кулэ пуштросэз зэмос произведенилэн, вала адямиослэсь мылкыдъёссэс но сямъёссэс».

* * *
Тросэныз писательёсын, артистъёсын, композиторъёсын но культура удысысь мукет дано адямиосын пумиськылэмъёсы сярысь вераны быгатысал мон. Мыным угось шуд усиз соосын ӵош ужаны газет поттонын но, культура удысын но. Троссэ соосты лыдӟисьёс ӟеч тодо, соос сярысь уно гожъямын книгаосын, журналъёсын но газетъёсын. Но соос пӧлысь огез сярысь вератэк кельтыны уг быгатӥськы — Роман Галяскарович Валишин сярысь.

Грак ёрос газетлэн редакторез луыса ужакуз ик, Р. Валишинлэн нимыз удмурт лыдӟисьёслы тодмо вал ни — солэн веросъёсыз, очеркъёсыз «Советской Удмуртия» газетын, «Молот» журналын ӵем гинэ печатласькизы. Но егит автор соку ик шӧдэ ни вал, луоз, бадӟымгес произведениос борды кутскыны быгатонзэ. Материал но люканы вуиз черкогуртын улыкуз трос адямиосын пумиськылонъяз. Солэн соин ик Иже лыктэмез, писательёслы матэгес кариськемез потӥз. Кутӥзы «Советской Удмуртие». Озьы со луиз культура отделлэн кивалтӥсез.

Нырысь повестьсэ гожтыны егит автор трос курадӟиз. Тужгес но — дыр тырмымтэысь. Куинь пол толэзен-толэзен творческой отпуск сётылӥмы. Со ачиз но ӟеч валаз: газетын ужась журналистлэн бадӟымесь произведениос гожъяны дырыз ноку уз луы. Материал дасяны но бырйыны журналистлы капчигес, малы ке шуоно со ялан калык пӧлын. Нош пыр-поч гожъяськыны, лад-лад пукыны со уг быгаты. Соин ик Валишин газетысь куриськиз «Молот» журналэ, отын гожъяськыны эрикез тросгес луоз, малпаз. Зэм, берлозэ произведенизэ — «Тӧл гурезь» повестьсэ — ӝогак «пӧраз» ни.

Кӧняез писательёс йӧн-йӧн произведениос гожъяны кутскизы творческой уже быдэсак выемзы бере гинэ: С. Самсонов но, П. Чернов но, Г. Перевощиков но. Мќйы арлыдазы ни, редакциосысь кошкемзы бере, Писательёслэн союзазы пыризы П. Любомиров но Л. Емельянов. Нош кӧняез, пичи дырысенызы газетъёсын гожъяськыны кутскыса, веросъёслэсь но очеркъёслэсь вылӥе ӧз ӝутске. Союзэ но ӧз пыре. Озьы шуыны луоз С. Шихарев, Г. Симаков, Ю. Кедров, В. Никитин но данак мукетъёсыз сярысь.

Малы бен литературной ужын кужымзэс но быгатонлыксэс шӧдӥсь адямиос соку ик быдэсак творчествое уг выжо, нялтас гинэ гожъясько, редакциосын но кытын тыршыса? Мон сямен, тани малы. Бадӟым произведение бордын кема ужано луэ, толэзьёсын гинэ ӧвӧл, аръёсын. Гожтэмед бере но олоку потоз ай. Нош маин ке но улоно ук, коньдон кулэ. Издательство тонэн огкыл гожтоз оло уз ай. Тон егит писатель ке, герӟаськемзы но уз поты. Гонорар но азьвыл ик уз сётэ. Кызьы улод, уката ик семьяед вань ни ке? Тӥни соин тросэз гожъяськыны кутскисьёс кытын ке тыршоно луо. Нош кык ужез кык пол калленгес но, уродгес но лэсьтод.

Али Писательёслэн союззы егит авторъёслы юрттыны шугъяське. Коньдон уг шедьы. Кыле на огез — кыӵе ке ссуда басьтыса яке спонсоръёсты утчаса ужан. Огъя вераса, та ужпум быдэстонтэм кадь потэ ке но, Писательёслэн союззылы но, издательстволы но, Культурая министерстволы но, республикаысьтымы Правительстволы но со сярысь малпаськоно вылэм, удмурт литературае егит кужымъёсты тросгес кыскон, соослэн творчествозылы юнгес ӝужаны юрттон сярысь сюлмаськемзы потэ ке. Тани мон культурая министрын дыръям Герман Афанасьевич Корепанов композиторлы, «Наталь» операзэ гожтыкуз, толэзьлы быдэ гонорар тыримы, уждунэз сямен. Бен со ужамез понна дун ик вань ук. Сотэк композитор быгатысал шат, мукет интыын коньдон поттытэк, опера гожтыны? Ӧй, дыр.

Кудӥз Чайников?
Редакцие ӵем вуылӥз но ӟырдыт ужгурез ас сяменыз, кылбур чуръёс пыр, яркыт суреданы быгатылӥз умурт поэт Прокопий Макарович Чайников. Солы 38 аресозяз гинэ улыны кылдӥз.

Тодэ лыктэ Прокопий Макаровичлэн вордскемез дырысен 60 арес тырмонзэ пусъён. «Советской Удмуртие» соку бадӟым статья печатламын вал. Со номере ик сётоно луиз партилэн Удмурт обкомезлэсь 23-тӥ выборной конференциысь нырысетӥ секретарезлэсь Марисовлэсь докладзэ. Ӵуказеяз Валерий Константинович монэ пумитамез бере ик пыкылыны кутскиз: «Малы докладэн одӥг номере Герд сярысь статья печатлады? Уд тодӥське шат, кин со Кузебай Герд — Чайников?»

Мон соку валай, кытысен тӧл пельтэ. П. М. Чайниковез кин ке сурам Кузьма Павлович Чайниковен но Марисовлы урттылӥськем. Авторез соку ик шараяськиз: Удмурт АССР-ысь Вылӥ Советлэн Президиумезлэн Тӧроез Пётр Сысоев.

Тӥни макем «ӟеч» тодо вал куд-огез вылӥ кивалтӥсьёсмы удмурт писательёсты, асьме литератураез.

Василий Михайлов — журналист, писатель, кылбурчи, Россия Федерациысь культура удысысь дано ужась
Туспуктӥз Михаил Егоров

Удмурт Дунне
By Удмурт Дунне Август 20, 2013 11:11
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<