Бухенвальдэн тодмато Можгалан

Удмурт Дунне
By Удмурт Дунне Август 26, 2013 13:55

Бухенвальдэн тодмато Можгалан

С. Горошникова

С. Горошникова

Можгалан кема аръёс ӵоже ни ужа «Набат памяти» музей. Журналистъёслэн огазеяськонзы нимысьтыз экскурсиен отчы ӧз нуысалыз ке, ачим ноку ӧй кожасал: огшоры бездыт юртэ интыяськемын. Нош пушказ пырыса, мырдэм потӥ на — туж кельшиз!

Тодӥськоды-а тӥ, Можгаын 1939-тӥ арын 308-тӥ стрелковой полкез люказы шуыса? Бӧрысь со пыриз 98-тӥ дивизие, созэ ини Ижкарын кылдытӥзы. Май толэзе 1941-тӥ арын та дивизиез келязы Шолья станцие. 6-тӥ-7-тӥ июне отчы вайизы выль солдатъёсты. 1941-тӥ арын 98-тӥ дивизиысь 800 пала мурт быриз. Огъя война кутскон аре пусъемын 11 сюрс быремъёс, соос пӧлысь 5 сюрсэз — чиптэм-чаптэм ышемъёс.

Та лыдпусъёс тросэз ватэмын, соосыз ваньзэ уз но шараялэ, дыр. Нош Можгаысь «Набат памяти» музеез кылдытэм, соин кивалтэм но отын экскурсовод луыса ужам Светлана Горошниковалэн ваньмыз рос-прос гожъямын, валэктэмын. Та кышномурт мӧйы ни ке но (2010-тӥ арысен музейын уг ни ужа), йырсазез туж умой, ваньзэ, нокытчы учкытэк, вера, тодаз вае.

* * *
Ӧс дорысен борддор кузя уно туспуктэмъёс, вашкала газетъёсысь ӵужектэм статьяос вандылыса лякылэмын. Огез адӟытон сӥземын МВД-лэн историезлы, мукетыз — Можга ёросын вордскем Быдӟым ожысь геройёслы.

Кыкетӥ зал мыным трос поллы тунсыкогес потӥз. Быдӟым ожен кемалась тунсыкъяськисько бере, со сярысь выль иворъёс шедьтэмелы котьку туж шумпотӥсько. Нош «Набат памяти» музейын сыӵе иворез лачак вылэм. Татын котькуд ож нуналэн-арен валэктэмын. Со сяна, кызьы 1941-тӥ арын Можгалан, собере Ижын дивизиос люказы, кин отчы сюриз, кызьы солдатъёсыз фронтэ дасязы, Можга ёросын вордскемъёс кыӵе медальёсын но орденъёсын пусъемын — пыр-поч вераз Светлана Горошникова.

«Вормымтэ Ленинград», «Сталинград ож», «Огненная дуга», «Днепрлэн ярдуръёсаз», «Нырысетӥ ожез адӟемъёс», «Белоруссиез но Прибалтикаез берыктон» — та но мукет адӟытонъёсъя тодыны луэ, ку мынӥз соиз яке таиз ож, кӧня солдатъёссэ отын ыштӥз Совето армия, кӧня медаль я орден басьтӥзы Можга ёросын вордскем солдатъёс.

Куинетӥ зал бадӟым ӧвӧл, озьы ке но отысь но трос выльзэ тодыны луэ. Можга ёросысь Малая Сюга гуртын улӥз-вылӥз Сидоровъёслэн семьязы. 8 пиос будӥзы анай-атайзылы зэмос юрттӥсьёс, выжызэс азинтӥсьёс луон понна. Но кутскиз война. Огзы бӧрсьы мукетсэ Сидоров агай-вынъёсты фронтэ басьтӥзы. Дораз берытскиз огез гинэ — со но кема ӧз улы — ранениосыз ӧз ортче.

Та залысь ик мукетыз выставка авиацилэн маршалэз Фёдор Фалалеев сярысь. Совето армиысь военачальник но Можга ёросын вордскиз.

Ньылетӥ зал монэ абдратӥз. Со быдэсак сӥземын Бухенвальд концлагерьлэн историезлы: кивалтӥсьёсыз, нылпиослэн улэмзы, эмъяськон, сиён, ужан но трос мукет темаос усьтэмын уно туспуктэмъёс, лагерьысь шедьтэм чыры-пырыос пыр. Татын ик возисько пӧртэм вазиськонъёслы ӟуч, немец, англи но мукет кылъёсын валэктонъёс. Германие вуылыкум, мон пырай одӥг концлагерьлы сӥзем музее. Но сое уд ӵошаты Можгаысеныз: асьмелэназ туспуктэмъёс пыр адямиез жалян, тупаса улонлэсь дунзэ мертан шӧдӥське. Германиын музей лэсьтэмын музей кылдытон понна гинэ.

* * *
Та музейлэн кылдэмез но тунсыко.

— Пие школаын дышетскыку, анай-атайёслэн кенешазы дышетӥсез юаз, кин, пе, быгатысал пиналъёслы юрттыны ваньмон дырзэс радъяны, — тодаз вае Светлана Горошникова. — Мон соглаш кариськи.

Бырйим «Вставай, страна огромная» темаез.

— Нырысь документъёсын бугыръяськимы, тодӥмы, кин Можгалась Быдӟым Атыкай оже пыриськемын, кӧня адями быремын. Ветеранъёс доры куное ветлӥмы, юаськимы, — вера Светлана Горошникова. — Огпол пумиськылӥмы Бухенвальд лагерьлэн бервылъёсаз ветлэм воргоронэн. Та тема 60-тӥ-70-тӥ аръёсы ворсамын вал, соин ми Бухенвальд сярысь номыр ӧм тодэ. Бухенвальд пыр потэм ветеранъёслы гожтэтъёс ыстћм. Уд оске — одӥгез соос пӧлысь лагерьлэн историезъя 200 туспуктэм ыстӥз. Соку малпамы музей усьтыны. «Бухенвальдский набат» ниманы сое. Нылпиослэн но С. Горошниковалэн тыршеменызы, концлагерьёсын бырем 102 муртлэсь нимъёссэс калыке берыктыны луиз.

Кивалтӥсьёслы концлагерь тема ӧз яра, соин музеез Светлана Горошникова аслаз уксёеныз возёно луиз.

— Кылем даурлэн пумаз таӵе музей усьтэме понна монэ огпол гинэ обкоме ӧз ӧтчалэ. Кышканзы валамон вал: мон трос «кулэтэмзэ» усьтӥ, тужгес но — пленэ сюремъёс сярысь. Милемлы вераллязы: пленэ шедьылӥд ке, тушмон пала потад. Но со озьы ӧвӧл ук! Сое калыклы вераме потӥз, — шуэ Светлана Петровна. — Музеез ӧй ворса, сомында кужым понэмын сое лэсьтонэ!

* * *
60-тӥ аръёсы вал одӥг учыр. Атае нюлэскы мынӥз но шӧдтэк шорысь пу кирос шоры мырӟиськиз, — вера Светлана Горошникова. — Можгала война дыръя 4 госпиталь интыяськиз. Ӵапак отысь кулэмъёсыз, нюлэскы нуллыса, ватылӥллям.

1965-тӥ арын 8-тӥ мае госпитальын кулэмъёсыз можгаос выльысь ватӥзы. Со понна лэсьтэмын вал 16 коросъёс. Светлана Петровна верамъя, та бадӟым ужрадэ быдэс город люкаськиз. Буре вайизы войнаын бырем мукет солдатъёсыз но.

— Соку мыным туж тунсыко луиз, кинъёсыз ми ватӥмы. Тае тодон понна нылпиосын ӵош вазиськимы Ленинградысь военно-медицинской музее. Отысь ыстӥзы Можга госпитальын быремъёслэсь фамилиоссэс но ӵыжы-выжыоссылэсь адресъёссэс. Ваньзылы гожтӥмы. Валэктон вуиз 68-эзлэсь, сомындаезлэсь ик бырем ӵыжы-выжыоссэс шедьтӥмы. Али 68 солдатъёслэн фамилиоссы Можгалан синпелет бордын гожтэмын.

* * *
Светлана Петровна, музей кылдытыкуз, дышетскисьёсын ветеранъёс дортӥ гинэ ӧз ветлы. Соос 6 пол потазы зэмос экспедициосы, утчазы бырем солдатъёсыз.

— Нырысетӥзэ Карелие ветлыкумы, пиналъёсы быдэс сюресэз серекъяса-шулдыръяськыса мынӥзы. Нош куке пыримы ворсам интыосы (ожъёс бере ми дорозь отчы нокин пырамтэ на вылэм), нылпиосы син шорын будӥзы кадь: пальпотонзы ышиз, сак луизы. Со валамон: окопысь шедьтӥмы пуштымтэ бомба, — тодаз вае нылкышно. — Соку экспедициысь сьӧрамы трос арбери вайимы: каскаос, пуртыос… Нылпиос отчы-татчы со секытъёсыз нуллӥзы, номыре кельтэмзы ӧз поты.

Эспедициосы потаса, Светлана Петровна Горошникова «следопытъёслэсь» 8 «поколенизэс» будэтӥз.

Кыкетӥзэ соос ветлӥзы Удмуртиын кылдытэм 313-тӥ стрелковой дивизилэн ожмаськем интыосаз, Карелие ик, трос юаськизы войнаез адӟем муртъёслэсь.

— Соку ми уно куашкам юртъёсыз, бусыос шорын мӧзмыт сылӥсь гуръёсыз, бырем солдатъёслэсь лыоссэс адӟим, трос кӧшкемыт, осконтэм учыръёс кылӥм. Но сюлэм тужгес бӧрдӥз мукетыз понна: ваньмаз сямен обелискъёсын гожтэмын «Татчы ватэмын … тодмотэм солдатъёс», — синвуоссэ мырдэм возе Светлана Петровна. — Куд-огзэ со быремъёс пӧлысь, оло, али но утчало на ӵыжы-выжыоссы… Нош соос музъеме нимъёстэк выдылӥзы.

Со сяна, Можгаысь пиналъёс партизан отрядъёслэн сюресъёстӥзы но ветлӥзы.

— Война аръёсы огеныз партизан отрядэн кивалтэм Можгаын вордскем пияш, фамилиез Кайшев вылэм. Солдатъёс сое туж яратӥллям азьлане учкыны быгатэмез понна. Со сяна, ӵапак ми Псков улосын утчамы тодмо удмурт писатель Филипп Кедров сярысь ивор, вуылӥмы Витебск палъёсы: солэн бырем интыяз но шайгу дураз, — маде кышномурт.

* * *
Музей юртэз кылем даурын кӧня ке пол сутыны выриллям (таиз сярысь Светлана Петровна пал кыл но ӧз потты ке но, городын улӥсьёс сое тодытэк уг уло вылэм), ӧз пӧрмы — материал люкаськиз, арысь аре узыргес но узыргес луиз. Музейлы уно данъян грамотаос но медальёс сётъязы бадӟым генералъёс, кивалтӥсьёс. 1984-тӥ арын «Набат памяти» музейлы — Удмуртиысь нырысетӥезлы — калык музей ним сётӥзы.

Елена Рябина

Удмурт Дунне
By Удмурт Дунне Август 26, 2013 13:55
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<