4 питран но йыр берган

Удмурт Дунне
By Удмурт Дунне 30 августа, 2013 11:48

4 питран но йыр берган

Машинаос - адямиос мында

Машинаос — адямиос мында

Эшъёсмы зыгатӥсь ӵектон веразы: ӟеч тодмозы, пе, «Шкода Октавиязэ» вузаны малпа. Картэлэн синъёсыз ик ӝуатскизы: кемалась та машинаен уйбыртэ ни. Вылезлы уксёмы ӧвӧл, нош ворттылэмзэ басьтыны тырмытом, пе. Ветлӥм, учким, синмаським. Басьтӥськом!

«Калинаен» люкиськон
Зэм, нырысь «Калинаез» вузано. Таизлы ӵап 5 ар луоз ни. Россиын поттэм автоен ворттылыса, кӧтмы кыкнамылэн но тыриз. «Шкодалэн» кузёез соглаш луиз машина дунлэсь ӝынызэ возьманы но. Нош автозэ коть туннэ ик нуэ ни, пе.

«Калинаез» юасьёс вань, уж дурысьтым пияш но котыртӥз бергалля, шуэ картэ. 230 сюрсэн, пе, сётысал. О-о, малпасько, выльзэ 300 сюрсэн басьтӥм вал, жаль ук озьы гинэ сётыны.

Со ӝытэ ик Интернетысь дунтэк ялонъёсъя сайтэ гожтӥм. 2008-тӥ арын поттэм «Калина», двигателез 1,4, «люкс» комплектациен, чылк-чылк миськем машинамес фотое пуктӥм. Таӵе «Ладаын» креслоосыз велюр, 4 укноосыз ик электроподъёмникен усьтӥсько, азьпал радысь креслоосыз но кыр ласянь синучконъёсыз шунтӥсько, водительлы но пассажирлы чакламын кышкытлыклэсь утиськонъя «миндэръёс», рулез — электроприводэн, магнитолаез но тузӥ, со сяна, трос мукет чыры-пырыосыз. Вылаз ик, сигнализация но толалтэлы чакласа автозапуск пуктэмын ни. Зэм, туала «люкслы» уг тырмы кондиционерез гинэ — сое «Калинае» пуктылыны кутскизы ай 2008-тӥ ар пумын.

Машинамылэн кузовез — хетчбек. Басьтӥсьёс таиз шоры, пе, ӵемгес учко — седанлы сокем уг синмасько. Вылаз ик, туж ӝикыт ворттылӥм — машинамы шуккылэмын ӧвӧл. 5 ар ӵоже 45 сюрс иськем бызьылӥз «Калинамы» — таиз но сокем трос ӧвӧл. Зэм, быгатӥсь муртъёс та лыдпусъёсты берлань но бергато.

Сокем ушъямы кадь, но ӝыт ӵоже одӥг мурт но ӧз жингырты. Ялонъёсъя сайтын пӧртэм кузовен «Калинаос» 250-лэсь ятыр ӵектэмын. Мар пӧлысь бырйыны вань, иське.

Картэлэн машиналы пуктэм дуныз кышкатӥз уж дурысьтыз тодмозэ но — 200 сюрсэн, пе, коть туннэ ик басьтысал.

— Сиён уг куры — мед сылоз, — «приговор» пуктӥз кузпалы, — субботае базаре нуо. Озьы ортчиз одӥг арня.

Гужгетӥсь базар
Ижысь авторыноке мон но калъяськи. Ӵукна 7 час бере вуим. Пырон дун — 300 манет. Нош машинаез татын кӧня! Султыны инты ик сюроз меда? Пырон дорын ик пиосмуртъёс дугдыто — кӧняен вузаськод, пе? Огез юа, кыкетӥез матэктэ. Ой, кӧня басьтӥсьёс, шумпотӥсько ас поннам, иське, кема ум сылэ, вузалом но кошком. Базарысь «дирижёръёс» валэктэмъя чуртнаськыны инты шедьтӥмы ик. «Калиналэн» азь пиялаез борды иворен бумага юнматӥм, дунзэ но таш-таш гожтӥм: 230 сюрс манет. Час ортче, кык ортче. Дорамы нокин уг кожы. Пырыкумы ик юазы вал, соослы сётоно вылэм, шуисько картэлы. Со пумитам мыньпотӥз: со басьтӥсьёс ӧвӧл, «перекупъёс», пе. Дунтэмзэ утчало, бӧрысь, дун ватсаса, вузало, барышез кисыязы кыле.

Машинаын пукыса, вуз уд кары, шуисько. Нош ульчаын сылӥмы ке, одно ик кин ке матэктоз. Валамон, вуз карыны ми дышемын ӧвӧл. Тани куд-огез машина котыразы бергало, тузонзэ ӵушыло, капотсэ усьтыса ик, басьтӥсез витё. Таосыз но «перекупъёс», валэктэ картэ. Я, тани ми доры но лыктӥсьёс вань. Маке кемалась тодмоос кадь ӟечъяськизы — кузпалылэн Эдик нимо юлтошез вылэм.

— Мар дырдэ юнме быдтӥськод, вай мыным 170 сюрсэн, — куре Эдик. — 180-лэсь дуно нокызьы но уд вуза. — Асьме автопром уг мыны. Капчигес кошко «Форд Фокусъёс» но «Рено Логанъёс».

Э, ма, таиз но «перекуп», лэся. Нош ми пурт кадь ваменскиськом — 200 сюрсэн ӧм вузалэ но, татын сыӵе дунын сётыса улом ай.

Нуназеозь сылыса, пайдаез ӧз луы. Котыртӥмы «перекупъёс» гинэ гожеръязы. Ма, та базаре огшоры басьяськисьёс чик уг ни ветло шат?

Бертон сяменымы картме сюлворисько: ма, уж дурысьтыд тодмоедлы ик вуза ни вал. Адӟиськод, кӧня машина асьмелэнэзтэк но. Ярам, соглаш кариськиз со. Тодмомы но тэк улымтэ, лэся. Базар дунъёсты тодэм — шуэ, 200 сюрсэн кык арлы «егитгес» машина шедьтыны луэ. Озьы таиз но басьтӥсьмы тӧлӟиз.

Интернетын ялонъёсын сайтысь ивормес но выльдӥмы — табере машиналы 200 сюрс манет дун пуктӥм. Арня ӵоже жингыръясьёс трос ӧй вал. Кӧня ке мурт учкыны ветлӥз — самой троссэ 180 сюрс манет ӵектӥзы. Сётӥмы газетэ дунтэк ялон — тазэ тросгес мурт кутылэ вылэм, жингыръясьёс ятыргес луизы. Озьы ортчиз эшшо одӥг арня.

Вожмаськон но куалектон
Нош ик суббота матэктӥз. Вазьгес мыном, йӧнгес инты шедьтом но вузалом — таӵе план пуктыса, нош ик базаре потӥм. Паймод, машина вузасьёс «уробозэс» татчы уйлы пуктыса кельто, лэся. 6 часын ӵукна но базар тырмемын. Ӧй чида, котырски — 8 часын татын 1 сюрс мында машина вал ни. Нош кӧняез сыло Маяковский ульча кузя — тазэ ӧй но чота. Урамын вуз карисьёс пырон понна 300 манет уг тыро. Со понна ГИБДД-ысь инспекторъёс татын туж сакесь: сылыны лэзьымтэ пус вӧзы кельтэм машинаосты соку ик синйылто, тыриськон сёто.

Таяз субботае базаре тросгес калык лыктэм, лэся. Машина борды 200 сюрс манет дун пуктӥм. 10 часозь ми котыртӥ «перекупъёс» гожеръязы. Собере дунмес кулэстӥмы 190 сюрсозь.

Кык пол машинамы котыртӥ бергаз егит воргорон. Воткинскысь, пе, вуи. Машина дунысь кӧнязэ, пе, куштоды на? 185-ен сётом, шуэ картэ. Со куспын дорамы эшшо юалляськисьёс вуизы. Таосыз — быдэс уллёен. Кышноен картъёс — ог 30 арессэс ортчемын. Соосын ӵош анай-атайзы. Сьӧразы эшшо кыӵе ке кык тодмозы. Куспазы удмурт вераськемысь, ми но удмурт сямен вазим. Ой, шумпотӥзы ук!

Пичи Пурга районысь вуиллям. Та дырозь машиназы ӧвӧл. Мар басьтыны но шугъясько. Сьӧразы ӧтиллям тодмооссэс — таосыз «перекупъёсын» эшъясько, лэся. Машинамы но пургаослы кельшиз кадь.

— Пуксе, ворттылэ базаретӥ, — ӵектӥз кузпалы.

— Ма, мон номырзэ уг валаськы, правое но ӧвӧл, — шуэ пурга пи.

Со вискын руль сьӧры куриськиз машина котыртӥ гожеръясь Воткаысь пиосмурт. Пуксизы. Нош пургаос сюлмаськыны кутскизы: таид, пе, милемыз азьпалтӥз ке, таре дунзэ будэтозы… «Калинамы» ӝог берытскиз. Руль сьӧрысь потэм пиосмуртлэсь пургаос юало ни: кельшиз-а, пе.

— Потэ ке, басьтэ, — пумитазы вазиз таиз, ачиз ми котырысь палэнскиз.

Ымъёсмы ваньмылэн усьтӥськизы. Куалектыса пургаос но кошкизы.

Паймод но бырод: я быдэс уллё лыктэ, табере огез но басьтӥсьмы ӧвӧл ни. Ӝыны час ортчыса, берытскиз Воткинскысь воргорон. 185 сюрсэн, пе, сётоды-а? Ми соглаш луим. Табере ваньмы ӵош, машинае пуксьыса, вузан-басьтон сярысь огкыл гожтыны ӧдъям. Кӧня ке улыса, басьтӥсьмы сюлворыны ӧдъяз: 2 сюрс манет, пе, кулэ номер понна, эшшо 500 манет огкыл понна тыроно, вылаз ик, заправкае пыроно — иське, 180 сюрсэн, пе, басьто. Тазьы выремысьтыз, мынам чиданэ пӧсьтэ вал ни. Со вискын картэ басьтӥсьмылэсь паспортсэ куриз — огкылэ, пе, даннойёстэ гожтоно. Соиз синъёссэ питыръяз — паспортме, пе, сьӧрам ӧй куты. Вот таиз зол! Нош нимтулзэ пӧяса вераз ке, нош машиналы тыроно уксёез суредамын ке, документ — со шудон арбери ӧвӧл. Таӵе юлтошен кыдёке уд вуы — чик жалятэк люкиськимы соин.

Яратон сӥя 35 нунал ӵоже
Кык арня ӵоже «Калинамы» сылӥз ворттылэм машинаосын вуз каронъя салонын. Татын автомобилез толэзь ӵоже дунтэк возё. Дун ачид пуктӥськод, со борды автосалон ватса комиссизэ: Ижын тужгес ичизэ 5 сюрс манет «ляко», троссэ — 10 сюрс манет. Ми бырйим бадӟым вуз карон центр вӧзысь салонэз — татын калыкез трос ветлэ шуыса. Автосалон машиналэсь шекъёссэ вылтӥз гинэ учке — соин ик басьтӥсь таослы мыр-мыр оскыны кулэ ӧвӧл, умойгес — машиналэн кузёеныз герӟаськыса. Машиналы дунмес 190 сюрс манет кельтӥм — автосалон бордаз эшшо 7 сюрс ватсаз на.

Дыр туж кема кыстӥськиз. Та вакыт ӵоже жингыръясьёс но вал, автосалон но шуге-леке вуттылӥз. Огполаз ивортӥзы, рульлэн электроусилителез ужамысь дугдэм шуыса. Картэ ветлӥз, эскериз — кыӵе ке предохранителез ӝуам, оло, юромо озьы кариллям — машиналэсь дунзэ кулэстон вылысь.

Кытысь ке ӧвӧл машина вузанмы сярысь тодмомы кылэм. Ӵап кышное, пе, право басьтӥз, дышетскыны машина кулэ вал. Базаретӥ котырскем — номырлы синмаськымтэ. Тодмомылэсь ми, валамон ни, мултэс ӧм куасалтэ — «Калинамес» 180 сюрс манетэн сётӥм. Со понна — ӟеч муртлы умой опыт люкан вылысь.

Машинамес вузаны толэзь ӧз тырмы — 35 нунал кулэ луиз. Ярам, «Шкодалэн» азьвыл кузёез ӧз керӟегъяськы, возьмаз вуз каронмылэсь йылпумъяськемзэ. Нош «Калинамылэсь» одӥг нунал но ӧм ни мӧзме — 35 нунал ӵоже яратонмы воксё сӥяз, лэся.

Алёна Ионина
Туспуктэмез: auto.29.ru

Удмурт Дунне
By Удмурт Дунне 30 августа, 2013 11:48
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<