10 нунал пӧртмаськиз Юнда

Удмурт Дунне
By Удмурт Дунне 13 августа, 2013 14:20

10 нунал пӧртмаськиз Юнда

Юндаослы суредасьёс яразы: соос тунсыко мадисько, пе

Юндаослы суредасьёс яразы: соос тунсыко мадисько, пе

Балезино ёросысь Юнда черкогуртын 10 нунал ӵоже мынӥз «Одо маран» этнофутуризмъя куатетӥез калыккуспо симпозиум.

Юндаос куноосты пумитазы перепечъёсын, кумышкаен но выль картошен. Усточиосты соос возьмазы школалэн азбараз, художникъёс отын улӥзы-ужазы. Автобуслэн ӧсъёсыз усьтӥськизы гинэ — кутскиз аспӧртэм перформанс.

Нырысь потӥзы дунне гумыосын куноос, собере, йыг-дым бубенэ шуккылыса, суредась Юрий Лобанов. Сое юнме удмурт шаман уг шуо, дыр, художник туж оскымон но мылысь-кыдысь шудӥз «Юнда» муниципал кылдытэтлэн йырыз В. Урасинов азьын. Владимир Гаевич кепыраса, мар карыны, нырысь ӧз вала: оло эктыны кутсконо, оло ӟечбуръяськоно гинэ. Озьы Юрий Лобанов вань пумитасьёсты котыртӥз. Адямиослэн ымныразы пальпотон пыӵаз. Ужрад тунсыко кутске бере, озьыен, 10 нунал ӵоже татын мӧзмыт уз луы.

Школа азбарысь куноос пумен выжизы культура юртэ. Татын соос, синъёссэс паськыт усьтыса ик, учкылӥзы Юндаысь ансамбльын кырӟасьёслэсь дӥськутсэс. Уката но синмаськизы бесерман костюмъёслы финъёс но Франциысь Джордж Валь художник.

— Мыным татын ваньмыз кельше, мон шудо, — тазьы вераса, дугдылытэк туспуктылӥз француз суредась.

— Таӵе ужрадъёс адямиослэсь лулъёссэс усьтыны, калыклы но музъемлы маке ӟечсэ, чеберзэ кузьманы кулэ. Дорамы ветлӥсьёс валало: адями но инкуазь, ог-огеныз тупаса, улыны кулэ, — шуиз Кучыран Юри.

Кылем арын таӵе ик симпозиум ортчиз вал Сарапул ёросысь Дулесово черкогуртын. Сарапул ёросэ 30 тунсыко картинаос кылизы. Со сяна, Россиысь дано художник Измаил Ефимов гурт поселенилэсь куншетсэ но кунпуссэ кылдытӥз. Табере Дулесоволэн ас тодметъёсыз вань, Россиысь геральдикая палатаын но юнматэмын, эсьма. Сое тодыса, ми но усточилэсь тунсыкъяськимы, оло, со Юнда гуртлы но куншет но кунпус малпалоз.

— Герб но флаг малпаны секыт ӧвӧл, трос дыр кулэ малпаськыны, Юндалэн аспӧртэмлыкъёсынызы тодматскыны. Валамон ини, мыным юрттэт кулэ луоз гурт калыклэсь. Кенешо на поселениысьтыды депутатъёсын, юало: кыӵеен адӟемзы потэ соослэн гербзэс но флагзэс, — мылкыдзэ усьтэ Измаил Ефимов.

Юндае симпозиуме вуизы 28 усточиос, котькудӥныз гуртоосты туж тунсыко но серемпыр тодматӥз Удмуртиысь суредась Александр Пушин, тросэзлы со тодмо Жон-Жон Сандыр нимын. Пусйыны кулэ, татчы суредасьёс гинэ ӧз вуэ. Художникъёсын ӵош Юндаын ужазы политологъёс, лингвистъёс, перфомансмейкеръёс. Монэ паймытӥз егит фин тодосчи Эса-Юсси Салминен. Соин ӝытбыт чылкыт удмурт кылын вераськимы. Э. Салминен пусйиз, солы туж тунсыко бесерман калыклэн культураез. Егит тодосчи та нуналъёсы туж сак кылзӥз Юнда калыклэсь мадиськемзэ но удмуртъёслэсь но бесерманъёслэсь аспӧртэмлыкъёссэс валаны тыршиз. Кин тодэ, оло, азьланяз та кылчилэн эскеронъёсыз наукая ужлы пӧрмозы.

Люкаськемъёсты шулды-ртӥзы Юндаысь усточиос, соос крезьёсын шудӥзы бесерман гуръёсты. Ӟеч мылкыд кузьмазы Сарапул ёросысь Нечкиноысь «Жингрес куараос» ансамбль.

Юндаос куноослы дышемын ке но, таосыз уката ярало, пе: тунсыко мадисько. Уката но кельше, сомында усточиос бесерманъёслы сӥзем суредъёс кылдытозы шуыса.

Аэлита Князева
Туспуктӥз Андрей Миронов

Удмурт Дунне
By Удмурт Дунне 13 августа, 2013 14:20