Выль уллё

Удмурт Дунне
By Удмурт Дунне 12 июля, 2013 13:52
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Выль уллё

MINOLTA DIGITAL CAMERAКеч вордон пайда вае-а?

Каракулино ёросысь «Арзамасцевский» парсь вордон комплекс банкрот луиз. Аналтэм бусыосты 4 ар ӵоже жуг-жаг турын но куаро писпуос басьтӥзы. Ма кароно? Та югдур огпол гинэ ӧз эскериськы Каракулино ёрос администрациын. Гуртын улӥсь Сергей Ляпунов кечъёс сярысь вераськон поттӥз.

Тодмотэм, выль уж. Та пудоез асьме палан бадӟым уллёен вордӥсь ӧвӧл, нимаз адямиос гинэ доразы будэто. Быдэс Приволжск федерал округын чиньыен лыдъямон но уг люкасько та пудоез вордӥсь огазеяськонъёс. «Сарапул-молоко» предприятие кеч йӧлэз тыронъя линия усьтӥз бере, продукциез нуон-ваён, вузан сярысь сюлмаськонэз уз луы. Озьы кеч вордонъя проект Москваын но умоен лыдъямын вал. Арзамасцево черкогуртын кылдӥз «Русич» огазеяськон. Сое кылдытӥсь луиз Каракулино ёрослэн администрациез.

Та дырлы Арзамасцевоын кык гидъёс тупатэмын, куинетӥез лэсьтӥське.

Нырысетӥ кечъёссэс басьтӥзы кылем арын толсур толэзе: Швейцариысь ваем заанен выжыысь 35 йыр кеч таръязы, мукетъёссэ басьтӥзы калыклэсь. «Сарапул-молоко» одӥг литр йӧлзэс 50 манетэн басьтыны кутскиз. Скал йӧлэз соку 13 манетэн дунъяло вал.

Та фермаын управляющий но валтӥсь зоотехник луыса ужа Александр Максимов. Александр Васильевич азьло дышетӥсь вал, Малые Калмаши гуртысь татчы ужаны ветлэ.

— Кызьы дышетӥсьлы сётӥське кеч вордон?

— Секытэн, трос утчась-коно-лыдӟиськоно луэ. Ма но со тодонъёсы вал ни мынам, пичи дырысен ик гурт пудолы сиён но дасяны, утялтыны но кылдӥз. Кечъёсты вордон-утялтон ласянь вань ик пӧртэмлыкез, нош сиён ласянь шугъяськонъёс уг кылдо. Скаллы сямен ик, кӧс турын, силос дасяськом, ватсэтъёс тыриськом. Но кечъёслы тросгес чурыт сиён кулэ, куаро писпу вайёс но ярало.

Но кутсконмы секытэн сётскиз. Нырысь араз басьтэмын вал 300 йыр мумы но 5 йыр айы кеч. Али ваньмыз 953 йыр. Та пудолы тупась гидъёс йӧскадь тупатэмын ӧй вал, соин вордскем кечпиос пӧлысь 38 процентэз бырыны шедьылӥзы. Со быдэс куректонлы пормылӥз. Али дышиськомы ни кадь, югдур тупатске.

— Гидъёсты парсъёслы лэсьтэмын вал бере, трос-а вошъяно, выльдоно луиз?

— Быдэсак. Выльдӥм выжъёсты — бетон кисьтӥм, липетъёсты но укноосты воштӥм, кечъёсты 150 йыр тэрымон клеткаосы интыям. Трос уксё кошкиз тӥрлыклы но.
Али куинетӥзэ корпусэз тупатъяськом.

— Ужасьёсты тырмо-а?

— Кутскыкумы шугъяськонъёс вал. Али тырмыт. Монэн ӵош 15 адями ужа. Кивалтӥсьмы — Армон Пагасян, 3 специалистмы вань, 12 мурт йӧл кыске, кеч сюдэ, одӥгез кечпиосты утялтэ. Уй-нунал ӵоже ми 570-650 килограмм йӧл кыскиськом. Та дырлы 473 йыр кысконо кечмы. Шорлыдын нунал ӵоже котькудӥз 1200-1500 грамм сётэ.

— Нош калыкын верало, заанен выжыысь кечъёс 5 килограмм пала йӧл сётыны быгато шуыса.

— Озьы ик вань, но милемлы отчыозь вуоно ай, угось пудомы пӧртэм интыосысь но пӧртэм выжыысь люкамын, нош ваньмыз чылкыт выжыысь луизы ке, йӧл поттонмес трослы йылэтыны быгатом.

Али милям трос пунэмъёсмы, лэсьтоно ужъёс но тачак. Россиын будэтэм заанен выжыысь ик кечъёс таза луо. Соос дышемын асьме куазьлы но, сиёнлы но. Кунгож сьӧрысь ваемъёссэ тӧл соку ик шукке. Казань дорысь огысьтыз хозяйствоысь Швейцариысь ваем кечъёсты басьтӥм. Ой, Инмаре, ёрмим: сыӵе ляб пудо вылэм. Сиёназы маке уг тырмы ке, соку ик йӧлзы синэ, гонзы пештырске, пельзы лэзиське, йырзы ошиське. Весь чаклано луэ. Асьмелэнъёссэ бусые лэзиськод но, номыр кулэ ӧвӧл ни кадь. Толалтэ сётӥськом сылал, витамин ватсэтъёс. Тыршиськомы на бакча сиёнъёсын сюдыны. Тани туэ тыква мерттӥм. Туж потэ на вылэм писпу куаръёсын вайёс тырмыт куасьтыны. Милемлы сое 30 тонналэсь ятыр дасяны кулэ, но, 15 кузя ужаськомы бере, сыӵе луонлыкмы ӧвӧл. Ю тысь басьтӥськом.

— Пунэмъёсты трос, шуиськоды. Туннэ нуналлы предприятилэн пайдаез вань-а ни?

— Ма та ласянь вераны луоз? Одӥг килограмм кеч йӧл поттон усе 10-12 манет, ми сое вузаськом 50 манетэн. Озьы ужаны луымон, но трос тупатъян-выльдӥськон ужъёс кылемын на. Собере, кредитъёсмы трос ай, соосты берыктоно. Толэзяз ми али миллион манет поттӥськомы. Со пӧлысь уждунлы 200 сюрс манетэз мынэ, вытъёс тыриськомы на.

* * *
Кеч йӧл поттонын вань аслаз умой палыӟ сое вузасьёс трос ӧвӧл. Мукет ласянь, шуг шедьтыны ӟеч выжыысь пудоез. Тужгес ик кечтакаез. Россиын та дырлы одӥг гинэ заанен выжыен ужась кеч ферма — Тверь улосысь Цапушево гуртысь «Надежда» предприятие. Но отын селекциен ужаса будэтэм пудозы туж ӧжыт, кечпиосты басьтон понна гинэ кык ар черодын сылоно луэ. Соин ик «Русич» вазиськоно луэ мукет интыосы. Асьме республикалы матысьёсыз пӧлысь тужгес но бадӟымез кеч вордон предприятие — Марий Элысь «Лукоз» ферма. Отын кысконо уллёзы гинэ 2 сюрслэсь ятыр. Удмуртиын поттэм кеч йӧлэз басьтӥсь луиз ке, «Русич» азинскыны быгатоз. Отын ужасьёс оскӧ азьланяз, ӥӧл сяна, ӟеч пудо но вузаны быгатозы.

Иван Аркашев
Туспуктэмез: www.symbolsbook.ru

Удмурт Дунне
By Удмурт Дунне 12 июля, 2013 13:52
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<