Выль шумпотон — быдэс гуртлы

Удмурт Дунне
By Удмурт Дунне Июль 19, 2013 10:56

Выль шумпотон — быдэс гуртлы

Шаркан ёросысь Карсашур гуртын спортзал усьтыку

Шаркан ёросысь Карсашур гуртын спортзал усьтыку

Александр Волков вуылӥз Шаркан ёросэ. Пӧртэм гуртъёсысь нылпи садъёслэн но школаослэн улэм-вылэменызы тодматскиз.

Вазь ӵукна ик кивалтӥсьёс дугдылӥзы Мишкинысь нылпи садэ. Сое озьы шуыны луоз ке: одӥгаз юртэ пичиосызгес нылпиос интыяськемын, мукетаз — бадӟымъёсызгес, эшшо вань на сиён пӧран интызы — пищеблок, таиз гинэ йӧнала, шуыны луоз, нош мукет юртъёс кемалась выльдэмез витё.

— Нылпи садмы 1968-тӥ арын пуктэмын, — шуэ садэн кивалтӥсь Елена Широбокова. — 1980-тӥ аръёсы, нылпиос трос вордскемен, сюрес сьӧры кыкетӥ юрт пуктэмын вал. Санэпидемстанцилэсь куронъёссэ лыдэ басьтоно ке, котькуд пиналлы 2 но ӝыны метр висъямын луыны кулэ. Туннэ нуналлы нылпи садамы 47 пинал ветлэ, гуртысь вань тэшкылиос пӧлысь 63 процентэз со, нош кылемъёсыз доразы пуко.

Гуртоослэсь сюлмаськонзэс вылӥ кивалтӥсьёс сак кылзӥзы, буйгатӥзы, выль нылпи сад одно ик луоз шуыса.

* * *
Шаркан черкогурт арысь аре паськыта но чеберске, выль микрорайонзылы городын улӥсьёс но синмаськозы. Чебер юртъёс, зор бере губиос выллем, ӝутско. 400 семьялы юрт пуктыны музъем висъямын ке, 165 семья выль коркан улэ ни. Котькуд юртын пинал куараос чузъясько. Озьыен, татчы но нылпи сад кулэ. Солэн юртэз пуктэмын ни, пушказ лэсьтӥськон ужъёс мыно, август толэзе 190 интылы сад ӧссэ усьтыны кулэ. Туннэ нуналлы Шаркан черкогуртын 3 нылпи сад ужа, 50 пала тэшкылиос черод витё. Выль сад усьтӥськемен, кулэяськисьёслэн лыдзы кулэсмоз.

Мукетыз сюлмаськытӥсь ужпум — шутэтскон инты. Кыӵе ке шулдыръяськон ортчытоно ке, райцентрысь культура юртэ лыктэмъёслы пукон интыос уг шедё. Черкогуртэ ӝутыны чакламын шутэтскон но ваньмон дырез радъянъя центр. Солэн липетэз улэ пыртэмын луозы на библиотека, загс, ёрос администрация. Юртлэсь проектсэ рос-прос эскериз Александр Волков, залысь пуконо интызэ, пе, 400 муртлы чаклано, нош огъя юртлэн быдӟалаез 3-3,2 сюрс квадрат метрлэсь бадӟым медаз луы.

* * *
Шаркан ёросын Бородуль гурт тужгес палэнысез луэ, дыр, со Пермь улосэн артэ. 1949-тӥ арын пуктэм школалэн оглюкетэз валля арын куашкам вылэм ни. Ёрос но гурт администрация юрттэмен, шальтрам школаез «кышъяны» быгатӥзы.

Та вакытэ Бородуль школаын ньыль гуртысь пиналъёс тодон-валан люкало, ваньмыз-ӧвӧлэз 30 нылпи. Школа луиз ке, нылпи но вордомы, шуо нылкышноос. Лыдпусъёсыз чаклано ке, кылем ар ӵоже Бородуль гуртын 3 пинал гинэ вордскем, нош егит семьяоссы лачак.

Бородуль гурт шулдыр интые пуксемын. Татын 250 пала улӥсез, культура юртсы, ФАП-сы, бадӟым нылпи садзы вань. Ваньмыз 12 тэшкыли нылпи садэ ветлэ. Бен, гуртлы выль школа кулэ, оло, нылпи садэз паськытатыса умойгес луоз, та ласянь аслэсьтыз малпанъёссэ шараяз Шаркан ёрослэн йырыз Александр Прохоров. Сад борды итэт пуктоно. Соку тэшкылиослы но шулдыргес луоз, школае ветлӥсьёслы но липет улын инты шедёз. Бордаз ик лэсьтоно спортзал. Ёрос йырлэн таӵе малпанэз кивалтӥсьёслы кельшиз.

«Победа» огазеяськонлэн кивалтӥсез Василий Васев верамъя, гуртоосты сюлмаськытэ на сюрес. Та ужпум но интыысьтыз вырӟытэмын, шуыны луоз. Шаркан-Бородуль сюреслэсь оглюкетсэ пыргытэм изэн шобыртыны кутскемын. Берло куинь ар куспын Шаркан ёросысь 6 но ӝыны иськем сюресъёсы из вӧлдэмын, ӟечлыкез мукет кӧльы сюресъёслэсь пичи но уг висъяськы, нош дуныз — кык поллы ичигес. Нялтас вераса, таӵе из поттон карьеръёс быдэс шаерын кык гинэ: Алнашын но Шарканын.

* * *
Ляльшур, Мувыр но Кыква гуртъёс Бородульлэсь ӧжытаклы гинэ бадӟымесьгес, нош улон-вылонзы трослы йӧногес адске. Гуртэ нуись сюресъёс вольытэсьгес, Кыкваын чагыр эстӥськон кыскемын, соин, лэся, палэнэ кошкисьёссы но ӧжытгес. Куиняз ик гуртъёсын нылпи садлы кулэясько. Ляльшурысь вуж пу юртэ ветлӥсь тэшкылиосты школа липет улэ интыяны чаламын. Нош Мувыр гуртын бадӟым школалэсь оглюкетсэ вазенгес висъязы ни вал нылпи садлы. Отын но покчиослы ӟоскыт луыны ӧдъяз. Та вакытэ школае 97 пинал ветлэ, нош садэ — 30, доразы пукисьёс но лачак: 2-7 аресъем нылпиоссы 58 кузя.
Ёрос кивалтӥсьёс ӵекто вал Мувыр школа вӧзы итэт пуктыны. Юрт котыртӥ ортчемез бере Александр Волков мукет малпанэ вуиӟ школалэсь оглюкетсэ тэшкылиослы висъяно, нош классъёсты ӝикытгес кутоно, шуом, 2 кабинетлэсь 3 лэсьтоно.

* * *
Карсашурын корка пырон ортчытӥзы.

Кык ар талэсь азьло гуртэ вуылӥз Александр Волков, калыкез оскытӥз, выль спортзал одно ик пуктом шуыса. Угось карсашуръёс котыр ласянь адӟем карымонэсь: гурт хозяйствозы азинске, спортсменъёссы ёросысь устоосыз луо.

Школа бордазы выль итэт пуктӥзы, табере отын мугор кыдатон интызы но, мастерскойзы но вань. Та юртлэсь усьтӥськемзэ чидатэк витизы нылпиос. Азьвыл аръёсы технология урокъёс дыръя нылъёссы вожмаськылӥллям вуриськон машина понна, нош табере ӵыжак-выль 8 машина соосты вите. Пиос понна лэсьтӥськон станокъёс ваемын.

Нош котькинлэсь зол шумпотэмын физрук Николай Васильевич Вахрушев: 22 ар ужаме токма ӧз луы, пе. Табере ролик но питрано куасъёс вылын быдэс ар ӵоже нискыламзы луоз. Нылпиослэсь золгес арлыдоос куанэмын. Гуртысь пенсионеръёс куасэн нискылало, туп ӵыжало, фин амалъя ветло. Табере роликъёс басьтон сярысь малпасько ни. Стадионлэн бызьылон сюресъёсыз асфальтэн шобыртэмын. Одӥг круглэн кузьдалаез 230 метр.

Арлыдо воргорон Михаил Черепанов ёросазы ортчылӥсь гурт шудонъёсы пыриськытэк уг кыльы. Отчы со учкыны гинэ уг ветлы, вормонъёсын бертэ: гужемзэ гира ӝутка, толалтэзэ полиатлонэ пыриське. Озьы тӥни Карсашур школаын дышетскисьёслы вань кинлэсь адӟем карыны.

Спортзалэз сӥё-дано усьтонэ кивалтӥсьёс кузьымен лыктӥллям. Куасъёс, тупъёс, стадионысь турынэз ӵышкыны машина кузьмазы. Кызьы уд юртты ёрослы, Россиысь куасэн бызьылӥсьёслэн огазеям командаязы ӝыныез шарканъёс луо бере, шуиз Александр Волков.

Валентина Емельянова
Туспуктӥз Николай Глухов

Удмурт Дунне
By Удмурт Дунне Июль 19, 2013 10:56
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<