Вож турын — начар

Удмурт Дунне
By Удмурт Дунне 2 июля, 2013 11:08
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Вож турын — начар

Кӧс гужем дыръя нимысьтыз саклык висъяно пудо сюдонлы

Кӧс гужем дыръя нимысьтыз саклык висъяно пудо сюдонлы

Берло аръёссэ гужем туж кӧс. Таин валче пудо сиёнын микроэлементъёс тыро-пыдо уг люкасько. Сыӵе начар сиён сётъяса, пудо лябӟе, бордаз кутске беломышечной чер.

Сюроез но, нурскетӥсез но, чипы-курегез но со уг жаля. Та висёнлэн нимыз туж трос пумо: дистрофия, миопатия, быгытъёслэн куашкамзы но мукет. Со пудолэн быгытъёсаз гинэ уг кырмиськы. Шукке сюлэмзэ но, муссэ но, вирсэръёссэ но, лыоссэ но. Ӵемгес курадӟе пинал пудо. Вань черламъёс пӧлысь ог 60 процентэз куло.

Пудолэн висьыны кутскемез сярысь аслаз верамез уг луы бере, асьмелы сак кариськоно. Жуммемзэ, урӟектӥсь но пожаськись синъёссэ адӟиды ке, тодэ: маин ке но черламын. Та уго висьыны кутскемезлэн нырысетӥ тодметэз. Беломышечной висён но тазьы ик матэктэ. Со сяна, пудолэн кӧтыз кизерме. Нырысьтыз пожалэс ур ӟизыра на. Быгытъёссэ пери (паралич) шуккемен, ветлэмысь дугдэ. Одӥг интыяз сылыны гинэ но солы секыт. Вӧсьлы чидатэк, пиньыныз гизьыртэ. Сюлэмыз минутскын ог 200 пол йыгаське. Мугорыз дырекъя.

Куд-огез малпа: пудоме кулэмезлэсь азьло вандо но сӥльзэ вузало. Но сыӵе сӥлез басьтӥсь но сюроз меда? Быгытъёсыз, золтӥськыса улэмен, пӧзьтэм курегпуз кадь тӧдьы кылё. Ӵапак татысь ик висёнлэн нимыз но потэмын — беломышечной. Ма, пуштӥрлыкез но чебер ӧвӧл. Сюлэмыз кык поллы бадӟымгес. Мусэз тӧрнамын, пеймыт яркыт-горд я пурысялэс-горд луэмын. Зэм, сӥльыз сиыны ярантэм ӧвӧл. Но кин тодэ, макем ӟеч со.

Пудоез эмъяны луоно, висёнэз туж пыдло пыремын ӧвӧл ке. Мур кырмиськем висёнэз нокызьы уд улля ни. Пудо першалэз ӧтьыса, пуктылоно корт микроэлементъёсын укол, натрийлэсь селенитсэ. Туж чакласьконо! Быдэс арня ӵоже нуналаз 3 пол пуктылоно на Е витамин, сётъяно кордиамин, камфорной вӧй, нуналаз 2-3 пол ландышлэсь суретсэ. Улзы котьку кӧс но шуныт мед луоз.

Таӵе секыт югдуре медад вуэ шуыса, пудоез ӟеч сюдоно. Тужгес но — кӧто дыръязы. Секытэн пудолы пиямезлэсь 1 толэзь азьвыл, сокугес гинэ вордӥськем кунянъёслы, ыжпиослы, парсьпиослы пуктылоно натрийлэсь 1 процентъем селенитсэ. Одно сётъяно чорыг вӧй. Берлоеныз сюдоно кариськиды ке, Е витаминэз кык поллы уногес сётъяно луоды, чорыг вӧй витаминлэсь кужымзэ медаз лябомыты шуыса. Ыжъёслы малпамын бентоселен эмъюм.

Гужем вуиз шуыса, вож турын-куарлы но бакча емышъёслы гинэ оскиськыны нокызьы но уг луы. Пудодэс дугдылытэк гордкушман, картошка, кешыр, вож турын кадьёсын сюдӥды ке но, тазалыкезлы со нокызьы но тырмыт уз луы. Кӧс куазь ваньзэ тае куасьтӥз, пушкысьтыз ӟеч сокъёссэ сюпсиз ни. Соин ик одно сётъяно пӧртэм пумо витаминъёс. Сакыр но сылал азяз дырын-дырын тыроно. Пудо — адями кадь ик. Асьтэ сярысь сюлмаськыкуды, соос сярысь но ӧд вунэтэ ке, ӧпкелёнэз уд адӟе.

Екатерина Михеева
Туспуктэмез: udmfoto.ru

Удмурт Дунне
By Удмурт Дунне 2 июля, 2013 11:08
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<