Ува пӧсятӥз но пӧсекъятӥз

Удмурт Дунне
By Удмурт Дунне Июль 12, 2013 13:27

Ува пӧсятӥз но пӧсекъятӥз

56

Ӟырдыт нюръяськон пуромиз 100 метре бызьылонын

Эшшо одӥгез удмурт Олимпиада йылпумъяськиз. Ува каргуртын ньыль нунал ӵоже гурт спортсменъёс медальёс понна нюръяськизы.

22-тӥ Гурт шудонъёсты усьтон азьвыл аръёсынлэсь ӧжытак висъяськиз. Таяз учыре шӧдӥськиз Казань Универсиадалы но Сочиысь Олимпиадалы дасяськон: Гурт шудонъёслэн тылзы кык факелысь кенжытэмын вал, нош бадӟым тылзэ ӝуатӥз Уваысь Надежда Назарова. Спортэн со 37-тӥ арзэ эшъяське, 19 пол пыриськемын гурт спортсменъёслэн вожвылъяськоназы, Удмуртилэсь данзэ трос пол утиз Россиысь Гурт шудонъёсын.

Азьвыл аръёсын ӵошатыса, таяз учыре палэнысь ӧтем куноос тросгес вал. Угось асьме шаерлы вань маин ушъяськыны. Ӟеч ужась ёросъёслы — тузӥ стадионъёс! Туала куронъёслы тупась стадионъёс пуктэмын ни Вавож, Пичи Пурга, Дэри черкогуртъёсын. Табере гурт удысын азьветлӥсь ёросъёсын бассейнъёс но йӧ катокъёс лэсьтыны кутскизы. Озьы туэ сентябрь толэзьлы вуттыны чакламын Вавожысь бассейн.

Гурт хозяйствоез басьтоно ке, та вие Россиысь сизьым улос гинэ котькуд скаллэсь ар куспын 5 сюрс тонна йӧл кыске, соос пӧлын Удмуртия но. Шаерамы улӥсь адямилы быдэ 470 килограмм йӧл усе. Киров улосысь губернатор Никита Белых азьын Александр Волков ушъяськиз на, кировъёс, пе, ваньзэ-ӧвӧлзэ ар куспын 500 сюрс тонна йӧл люказы, нош Удмуртия — 700 сюрс тонна.

Гурт спортсменъёс доры куное вуылӥзы мукет кивалтӥсьёс но. 1980-тӥ но 2000-тӥ аръёсы ортчем Олимпиадаосын вормисе потэмъёс Сергей Шелпаков но Дмитрий Сватковский та вакытэ луо Россиысь спортъя министрлэн воштӥсез но Нижний Новгород улослэн вице-губернаторез. Гурт спортсменъёс шоры учкыса гинэ, кӧтсы ӧз тыры, куд-ог куноос Правительстволэн командаез понна ёрос йыръёслы пумит футболэн шудӥзы. Палэнысь куноослы гол пыртыны ӧз удалты, со понна Александр Волков йыръёслэн капкаязы кык гол пыртӥз. Нош огъя шудон 4:2 лыдын йылпумъяськиз.

Ужрадэз сӥё-дано усьтон дыръя выленыз паймытыны шуг ни. Таяз учыре режиссёр Павел Поздеев малпаз возьматыны спортын ӟырдыт нюръяськонлэсь мынэмзэ. Вань сценарий радъяськиз тыл, ву но ыргон гумыос котырын.

— Малпанъёсме улонэ пыӵатыны быгатӥ кадь, одӥгзэ вератэк — удмурт кыл ӧжыт чузъяськиз, мынам со янгыше, — шуиз режиссёр. — Та ласянь арысь аре шуг-секытъёс кылдо, вылаз ик, ачим вераськыны шугъяськисько. Кылысь кылэ берыктӥсьёс дыраз уг шедё.

Кызьы пусъе Павел Поздеев, Гурт шудонъёсты усьтон ужрад сотэк но часлэсь ятыр кыстӥське, нош вань веранъёсты удмурт но ӟуч кылэ берыктыса, ужрад, пе, эшшо нуйтӥськоз. Бен, чик ӧвӧл шуэмысь ужрадэз нуисьёс но Кун Кенешлэн Тӧроез Владимир Невоструев гинэ удмурт сямен ӟечбуръяськизы. Со сяна, удмурт кырӟан чузъяськиз, Уваысь композиторез Пантелей Кузнецовез но Бызараысь кибашлыез Геннадий Сидоровез данъяку. Отӥяз быдэс ужрад ӟуч сямен радъяськиз.

Ужрадэз усьтонэ 700 пала адями пыриськиз. Тодӥмы, Уваын но асьсэлэн «Брангурт песянайёссы» вань шуыса. Соосты вошто Ивановна но Васильевна песянайёс.

30 градус пӧсьлы чидатэк, концертэ пыриськись тросэз пиналъёс йырсазьзэс ыштыны кутскизы. Гурт шудонъёс ортчон нуналъёсы какалмытӥз пӧсь куазь.

Пилемъёс котыр бергазы ке но, зорыны ӧз вормы.

* * *
Отӥяз ини быдэс ужрад огдышем сямъя радъяськиз. Ёросъёсысь вуэм командаос синмаськизы Уваысь чебер стадионлы. Вӧл-вӧл бусыын ваньмызлы инты шедиз. Бызьылон сюресъёс, футболэн но шальыен шудон интыос, кык этажъем спортзал туала куронъёслы тупало, огъя дуныз 160 миллион манет пала усиз. Озьы ке но уваос соин гинэ буйгатскыны уг малпало, пуктыны чаклало хоккеен шудон коробка, удалтӥз ке, оло, бассейнзы но луоз.

Ньыль нунал ӵоже гуртысь спортсменъёс выль вормонъёс понна нюръяськизы. Трос рекордъёс пуктэмын вал. Сарапулысь Екатерина Пелевина бызьылонъя ӵошатсконъёсын куинь зарни медаль басьтӥз. 1500 метре бызьылонын 2 секундэз ӧз окмы спортъя калыккуспо мастерлэсь куронзэ быдэстыны. Паймытӥз Дэри ёросысь Алексей Беляев. Бызьылонын сяна, кузьдалае тэтчанын но вормисе потӥз, Уваысь со но куинь зарни медален бертӥз. Гира ӝутъянын 20-тӥ зарни медальзэс утӥзы кык Коляос — Пичи Пурга ёросысь Николай Семёнов но Дэри ёросысь Николай Мамонтов.

Зарни медаль басьтон понна Гурт шудонъёсы 31 пол пыриськоно луиз Шаркан ёрослэн йырызлы Александр Прохоровлы. Со вормиз ёрос кивалтӥсьёс пӧлын шальыен шудонын.

Тросэз спортсменъёс одӥгзэ но гурт шудонъёсыз уг кельто. Уваын тужгес арлыдоез вал Глаз ёросысь Пётр Арафаилов. 1944-тӥ арын вордскем воргорон полиатлонъя ӵошатсконэ пыриськылэ. Котькуд аре медален бертэ, таяз учыре 40 арес но солэсь бадӟымгес спортсменъёс пӧлын витетӥ интые кылиз. Пусйыны кулэ, арлыдо воргорон турникын 44 пол ӝутскиз — тӥни кинлэсь адӟем кароно. Паймытэ нылкышноослэн кужмо луэмзы. Суй кужымез эскеронын 113 пол ӝутскиз Вавожысь Нина Суворова, Уваысь Жанна Кудрявцева — 103 пол.

Нюръяськисьёс, туп мыжгасьёс окыт спортзалын вормон понна вожвылъяськизы ке, гира ӝутъясьёс, суй кужымзэс эскерисьёс но мукет спортсменъёс шунды шорын пыжизы. Жаль потӥзы ӝог вамышъясьёс: 16-17 часын омыр гинэ ӧвӧл, асфальт но ӟырда ни, нош соослы стартэ потоно. Ярано коть, сюрессылэн оглюкетэз писпуос ултӥ — вужеретӥ — ортчиз. Пичи Пурга ёросысь Светлана Трифонова вордскем нуналэзлы зарни медаль утыны быгатӥз, нош кыкетӥ нуналаз куинетӥ интыез мырдэм басьтӥз. Пӧсь куазь но кезьыт ву троссэ спортсменъёсты катьтэммытӥз.

Ӟырдыт нюръяськон пуромиз воргоронъёслэн 100 метре бызьылоназы. Финалэ шедем куать мурт пӧлысь ньылез одӥг кадь лыдпус возьматӥзы. Финал дыръя но ваньзы дэмен финиш гожез выжизы, вормисез шараяны юрттӥз видеокамера, эшъёссэ азьпалтћз Дэриысь Алексей Беляев.

Озьы ик ӟырдыт вал шар пальылӥсьёс дорын. Куас база, кытын соос шудӥзы, центрлэсь тужгес кыдёке интыяськемын, соин но, лэся, котькытынлэсь трос кылӥськизы тышкаськон кылъёс, черекъямъёс. Пӧсекъясь спортсменъёсты буйгатылӥзы югдурез утисьёс.

* * *
Уваын ортчем шудонъёс ӟеч радъямын вал ке но, сюлэм пӧсь кылиз учкисьёс пумысен. Соос татын чик ӧй вал, шуыны луоз. Спортэз гажасьёссы Ува каргуртын ӧжыт ӧвӧл кадь, нош ӵошатсконъёсты учкыны чиньыен лыдъямонэз гинэ ветлӥз. Лыктэмъёсыз но, ёрос командазы келяку, стадионысь султыса кошкылӥзы.

22-тӥ Гурт шудонъёс йылпумъяськизы. Вуоно арын гурт спортсменъёс люкаськозы уйпал ёросъёсы: толалтэ — Балезиное, нош гужем — Глазэ.

Валентина Емельянова

Удмурт Дунне
By Удмурт Дунне Июль 12, 2013 13:27
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<