Туала нылъёс — етӥзэсь

Удмурт Дунне
By Удмурт Дунне 19 июля, 2013 09:25

Туала нылъёс — етӥзэсь

 

Гужем пиналъёсты ялан син азьын возёно

Гужем пиналъёсты ялан син азьын возёно

Нуналлы быдэ кык но солэсь тросгес йыруж лэсьто быдэ вуымтэ пиналъёс. Лыдпусъёс малпаськонэ уськыто, шуэ МВД-ысь быдэ вуымтэосын ужанъя ёзэн кивалтӥсь Светлана Селёва.

Пиналъёс вуно
Гужем тросэз пиналъёс асьсэлы асьсэос кузё луо, доразы огназы пуко. Ижысь Ленин ёросын улӥсь кышномурт пиналъёссэ ӝамдэлы огназэс кельтэм. 3 аресъем пиез, 6-тӥ этажысь укно дуре султыса, анайзэ учкыны малпам… Ярано, пияш улэп кылиз.

Пиналъёс тымет котыръёсын шудо, огназы вуэ пыро. Сарапул, Вавож, Кияса но Кез ёросъёсысь шуръёсын 5 пинал выйиз.

Тросэз тэшкылиос шудон кожало тыл поттонэз. Анай-атайёс пиналъёссы азьын тамак пурккето, юэм йырынызы умме усё. Ижын улӥсь 3 аресъем нылаш, балконаз потыса, спичкаен шудэм. Озьы выронъяз дэремез кенжем, мугорыз но сутскыны шедем.

— Монэ паймыто юэмъёс, — шуэ Светлана Селёва. — Кӧшкемыт учыр вал Вавож ёросын. Песянай-песятай доры гужемлы куное вайиллям Екатеринбургысь пиналъёсты. Кудӟем песятай, малы ке йыркуръяськыса, коркаяз тыл понэм. Ӝуась юртысь ачиз потэм, нош огез нунокез тылын ӝоказ. Яке Дэри ёросын луэм учыр. Кудӟем воргорон валесаз тамакен умме усем, бадњымъёс коркась потыса вуттӥллям, нош 3 аресъем пиналзы тодазы лыктымтэ.

Бадӟымгес нылпиослэн улонзылы кузё луэмзы потэ: ас понназы калгысалзы, эшъёсынызы шулдыръяськысалзы. Таӵе дыръя анай-атайёс нылпиосынызы огкыл уг шедьто. МВД-лэсь статистиказэ эскероно ке, нуналлы быдэ пиналъёс дорысьтызы пегӟо.

Люкиськем кузпалъёс пиналъёссэс доразы вожен-вожен возьыло. Быдэ вуымтэ нылаш нуназезэ Ижысь анаез дорын улылэм, нош уйлы Старки посёлоке атаез доры бертылэм. Одӥг ӝыт нылаш автобуслэсь кылем, кытчы мыныны паймыса, анаезлэн корка котыраз берытскем, но пырыны дӥсьтымтэ. Озьы со быдэс уйзэ куак улын ортчытэм. Ярано коть, урод адямиос нылашез синйылтӥллямтэ.

Палдурес яратон
Юнме шуиллямтэ, дыр: яратон синтэм луэ. Нылпиослэн нырысетӥ синмаськонзылы тросэз анай-атайёс бадӟым саклык уг висъяло, нош кулэ вылэм. Быдэ вуымтэос секыт югдурысь потон амалъёс шедьтыны дышемын ӧвӧл на.

Кызьы вераз Светлана Селёва, кылем гужем одӥг пинал ассэ ачиз быдтыны выриз, но улэп кылиз. Туэ куинь пиналэз ыштӥмы ни. Шудтэм учыръёс пусъемын Можга, Кез но Балезино ёросъёсын.

Берло дыре пиналъёс юн дышо компьютер борды. Одӥг учырын пияшез уриськыны косӥллям, бакчае ӧд поты ке, шудондэ талаломы, шуиллям. Анаезлэн чурыт кылызлы луыса пияш улонысь кошкиз.

Мукетыз учыр Балезино ёросын вылэм. Егит пияш синмаськем аслэсьтыз бадӟымгес нылашлы, телефон пыр трос пол верам яратонэз сярысь. Ассэ быдтон пумысь но кылпум поттылэм, но пияшез кылӥсь луымтэ.

Йыркуро дыдыос
Ижысь Первомай ёросысь егит нылъёслэн эшсэс «визьмамзы» быдэс шаерез зуркатӥз.

Кӧня ар ужасько ни югдурез утён удысын, таӵе учырен пумиськылэме ӧй вал на, шуэ Светлана Селёва. Первомай ёросысь 1998-тӥ-1999-тӥ аръёсы вордскем апокъёс ныл эшсэс визьмано кариськиллям. Шудыны чортыса, дорысьтыз поттӥллям, пи эшъёссэс ӧтиллям на. Ваньзы 8 кузя люкаськиллям. Ышыг интые вайыса, нылашез кылиськыны косӥллям, пиосты сое сантэманы куриллям — ярано, соосыз соглаш кариськиллямтэ. Соку нылъёс мукет ултӥян амал шедьтӥллям, кырсь ужзэс телефоназы гожтӥллям. Нылпиослэсь ышыг интые ватскемзэс синйылтэм арлыдо кышномурт, полицие ивортэм.

Туала нылъёс туж етӥзэсь, лекесь будо. Пиос ог-огзылы урод кылъёс верало, мыжыкъёсын урдско но буйгало. Нош нылъёс эшъёссэс котыр ласянь ултӥяны выро. Югдурез утён удысын ужасьёс ныл будэтӥсь анай-атайёслы вазисько: нылпиостылы матынгес луэ, соосын огкыл шедьтон амалъёс утчалэ. Вань сюлэм висёнъёссэ со нырысь ик тӥледлы мед вералоз.

Тросэз нылъёс социальной сетьёс пыр эшъёс шедьто, герӟасько асьсэлэсь трослы бадӟым пиосын. Гожъяськонзы пумиськонэн йылпумъяське. Озьы одӥгаз учырын пиосмурт нылъёсты ужан дораз пыртэм но эриктэмам. Нокинлы медаз ивортэ шуыса, быдэн 1 сюрс манет сётэм. Нош мукет учырын пиосмурт быдэ вуымтэ нылашез гостиницае пыртам. Дорысьтыз кошкись дыды, эшез дорын кӧлӥсько шуыса, анайзэ пӧям. Жаляса верано, куд-ог анай-атайёс уг тунсыкъясько, кыӵе семьяе мынэ нылзы.

Валентина Емельянова
Тусыпуктэмез: udmfoto.ru

Удмурт Дунне
By Удмурт Дунне 19 июля, 2013 09:25