Тэкитам уробо капчи мынэ

Удмурт Дунне
By Удмурт Дунне 12 июля, 2013 12:51

Республикаысьтымы куд-огез вылӥ кивалтӥсьёс ас вакытазы ӝутӥзы пӧртэм районъёсысь колхозъёсты. Кызьы туннэ уло кельтэм хозяйствооссы?

«Трактор»
Кун Кенешлэн Тӧроез Владимир Невоструев Юкаменск ёросысь «Трактор» колхозлэн председателез вал.

Палагайысь, Гулекшурысь калык туннэ ке но Владимир Петровичлы музъемозь йыбырттэ. Со вылэ уго усиз колхозэз ӝутонлэн тужгес секыт вакытэз. Техника начар. Складъёс ӧвӧл. Ӵапак соосты ӝутон бордысен ик кутскиз Владимир Невоструев. Тысь куасьтон но шертон комплексъёс пуктӥзы, мастерскойзэс липизы. Гуртъёсын кылдћз асфальт сюрес. Хозяйствозэс эшшо но азинтон вылысь специалистъёссэс дышетскыны лэзьязы Пермьысь, Кировысь усто хозяйствоосы. Мукетъёс вожъяськыса учкыны ӧдъязы «Трактор» шоры: ми но, пе, сыӵе ӟеч но кужмо кивалтӥсен ужасалмы. Кивалтыны быгатонлыкъёссэ адӟыса ик, Владимир Невоструевез Юкаменск ёрослы йыр каризы. 2000-тӥ арын гурт удысъя но сиён-юонъя министре пуктӥзы.

Владимир Невоструев колхозысь кошкем дырысен хозяйствоын ньыль кивалтӥсь воштӥськиз ни. «Трактор» котькыӵе югдуре вуылӥз. Тужгес секыт тупаз 2009-тӥ ар. Ёрос администрация ивортэмъя, соку «Тракторез» банкротэн ялӥзы вал, но сое бурд улаз басьтӥз «Куркан» хозяйство.

— Колхоз ӧз быры — нимыз гинэ воштӥськиз, «Куркан» луиз, — шуэ Владимир Невоструев. — Туннэ хозяйство районын ваньмызлэсь уно йӧл поттэ. Котькуд скаллэсь араз 12 сюрс килограмм люкаське. Калык трос ужа, уждун дыраз тыро. Выль техника басьто. Гидзэс миым выльдӥзы.

Туннэ хозяйствоын 4 сюрс 791 гектар гыроно-кизёно музъемзы. 740 кысконо скалзы. Сюро таза пудозы 1 сюрс 695 лыдъяське. Парсь но вордо вал. 2012-тӥ ар кутсконын 1 сюрс йыр вал соос. Но та удыссылы син усиз, лэся. Мумы парсьёслы кыӵе ке чер йӧтӥз. Парсьпиос вордскемзы бере быро. Эмъян понна специалистъёсты но ӧтчазы — пайдаез ӧй вал. Таин валче вань парсьёсты быдтоно кариськизы. Туннэ соос 160 кузя кылемын. Югдурзэс маде хозяйствоез валтӥсь Булат Абашев.

Владимир Невоструев верамъя, Удмуртиысь уйпал ёросъёс азинскыны мед быгатозы шуыса, нимысьтыз программа кылдытон ласянь сюлмаськиськом.

— Пӧртэм районъёсын инкуазь но, музъем но висъясько ук. Шуом, Сюмсиын — луо, нош Алнашын — сьӧд сюй. Юрттэт кыӵе ке сыӵе одно луыны кулэ, музъемлэсь ӟечлыксэ лыдэ басьтыса, — шуэ Владимир Невоструев.

Хозяйствозэ син азьысьтыз со туннэ ке но уг лэзьы. Юкаменск пала вуылыкуз, одно дыр шедьтэ вордскем интыосаз кожаны, гурт калыкен но кивалтӥсьёсын пумиськыны.

«Выль сюрес»
Гурт удысъя но сиён-юонъя министрлэн воштӥсез Аркадий Малков Кизнер ёросысь «Выль сюресэн» кивалтӥз.

1980-тӥ аръёсы пичиесь колхозъёсты огазеяны ӧдъязы. Озьы Кизнер ёросысь «Выль сюрес», М. Горький но В. Ленин нимо хозяйствоос одӥг кыткетын ужаны кутскизы. Но гурт калыклы та пумен кельшемысь дугдӥз. Пуктӥськон, культура, техника — ваньмыз шор усадьбаын — Вуж Бӧдьяын гинэ — азинскизы. Нош бригадаосын номыр но ӧвӧл. Куашкась фермаосты гинэ но ӝутӥсь ӧз шедьы ни. Уждун начар. Таӵе югдуре шедьыса, «Выль сюресысь» ужасьёс, азьвыл сямен нимаз колхоз кариськемзы потэ шуыса, вазиськизы пырак Россиысь Гурт удысъя министерствое но Правительствое.

Но колхоз кылдытон понна нырысь ик шедьтоно кивалтӥсь. Кин луоз? Вишурын (Вичуркаын) улӥсьёслэн кандидатсы одӥг: ас вакытаз колхозазы управляющийын ужам Аркадий Малков.

Аркадий Трофимович соку кивалтэ ни вал партилэн Кизнерысь райкомезлэн орготделэныз. Район понна со пичи должность ӧй вал. Соин ик кивалтӥсьёслэн сое колхозэ лэземзы ӧз поты.

— Аслым но вырӟыны капчи ӧй вал, — тодаз вае министрлэн воштӥсез. — Пырак синме вераны кутскизы: номыр но тӥляд уз пӧрмы — «Выль сюрес» быремын ни. Нош Вишурын 300 улӥсез, шорам оскыса учко. Шуи: одно пӧрмыто! Озьы 1988-тӥ арын 15-тӥ июле «Выль сюрес» нош ик кылдӥз.

Зэм, бадӟым хозяйство-лэсь люкиськыкумы, милемлы техника но, специалистъёс но ӧз сётэ. Вишурын улон интые ӧвӧлэн быдэс арзэ Кизнерысен гуртэ машинаен ветлӥ. Семья куспамы но таин сэрен валамтэос ӧжыт ӧй вал. Бадӟымез нылы соку 8-тӥ классэз йылпумъяз. Вишуре семьяме выжтӥ но, нылы быдэс арзэ, школае ветлӥз ке но, ӧз дышетскы — сокем пумитъяськиз. Туннэ ке но тодам вайылэ на та учырез.

Ма, сюресъёс ӧвӧлэн урам вамен выжыны гинэ но кузь кунчиё сапегтэк уг луы вал. Гуртоос, соос пала кариськемме адӟыса, асьсэос но ужаны ӝутӥськизы. Пенсионеръёс гинэ но, кин мар быгатэ, лэсьтӥзы. Юисьёс быризы. Ӵукна 6 часлэсь бер уже нокин уг поты ни вал. Тыршылӥмы, шунды пуксьытозь. Нырысь ик кутскимы тӥяськем но куштэм техникаез пыдъяны. Пудолы тросгес сётъямы фураж. Уксёмы кылдыны ӧдъяз.

Колхозэн кивалтыны кутскыкум, фермаос доры матэктыны уг луы вал. Кыед поттыны шуыса гудӥллям гу. Быдэс трактор тэрымон. Сюрес лэсьтӥсьёсын вераськи. Озьы ферма котыръёсты бетон плитаосын шобыртӥмы. 200 йырлы чаклам выль ферма ӝутӥмы. Быдэс гуртэ асфальт сюрес кисьтӥмы. Таӵезэ ноку адӟылымтэ пересьёс со понна али ке но тау каро на.

Егитъёслы пуктӥсь-кыны юрттыны кутскимы материалэн. Гуртын школазы ляб вал ни. Мынам хозяйкае — дышетӥсь. Шуи: гурт школатэк уз улы, соин кивалтод. Ёросысь кивалтӥсьёс туж пумитъяськизы: гурт пичи, отчы школа пуктыны уг яра. Но колхоз та ужез ас кожаз вормиз. Гуртысь кошкисьёс быризы.

7 ар ужатозям, одӥг вуж трактор но, комбайн но колхозын ӧз кыле. Татысь нокытчы уг кошкы, малпалляй. Но 1995-тӥ арын монэ Кун Кенеше депутатэ бырйиськыны косӥзы. Нырысь пумитъяськи ик. Но мыным шуизы: тон, пе, пыриськы, оло, уд поты. Но быръёнъёсыз ортчи. Кун Кенешын гурт удысъя, музъем кусыпъёсъя но инкуазез утёнъя комиссиен кивалтыны оскизы. Но мон отчы бадӟым осконэн кошки: колхоз ужалоз монтэк но. Юрттӥсьёсы но воштӥсьёсы туж юнэсь вал. 10 ар ӵоже «Выль сюресэн» кивалтӥз Анатолий Агафонов. Али сое валтэ Александр Морозов.

«Выль сюресъёслы», оло, уг но кельшы, мон туннэ ке но соосты весь чакласа возисько шуыса. Морозов ачиз но џем жингыръя. Туннэ колхозмы районын огез умоез. Зэм, азьвыл аръёсын ӵошатыса, музъемен лябгес ужало. Ми кыед но, торф но, изваска но бусыосы поттӥськом вал. Весь визьмасько кыӵе кидыс басьтыны. Техниказэс выльдыны выро, но рос-прос ужан понна кужмозэгес басьтоно. Кышкалогес: басьтод, маке мында уксё кисьтыса, нош дунзэ берыктыны пӧрмытод-а, пе. Пудо вордон но йӧл кыскон удысъёс кужмоязы. Но туннэ пинал калык гуртын ӧвӧл. Рос-прос механизаторез но животноводэз утчалэ, амал шедьтэ дорады кыскыны, валэктӥсько. Вань ужасьёссы туннэ ог 50 кузя. Ми дыръя 140 вал. Тае валало. Но оскисько: уз чигналэ азьланяз но.

Собино
2002-тӥ арын гурт удысъя но сиён-юонъя министр луэмезлэсь азьвыл, 1990-тӥ аръёсы, Николай Собин Шаркан ёросысь Собино гуртын фермер хозяйство кылдытӥз.

Николай Иванович верамъя, нырысь вамышъёс лэсьтыны туж секыт вал. Гурт бырон калэ вуэмын, юн пересьмемын. Огез ласянь гинэ ке шат капчи йӧтӥз: ёросазы но солэн палэназ Николай Собинлэн нимыз тодмо ни вал. Шаркан районын со валтӥсь агрономлэсь ужзэ быдэсъяз, ёросысь агрохимия огазеяськонэн но, потребобществоен но кивалтӥз. Соин ик хозяйствояз артысь ёросъёсысь специалистъёсты но кыскыны шуг ӧй вал.

Туннэ Собинлэн фермаез республикаямы но, Россиын но туж тодмо. Тужгес зол азинскиз со Николай Иванович хозяйствозэ Вера Николаевна кузпалыз вылэ кельтэм бере. Ачиз уго 2002-тӥ-2007-тӥ аръёсы министр вал. Племенной скал вордэм сяна, 2004-тӥ арын Собиноын рос-прос басьтӥськизы парсь будэтон борды. Ёрос администрациысь гурт удысъя управлениен кивалтӥсь Николай Медведев верамъя, сӥльзылэн ӟечлыкезъя районын нокин но соосын ӵошатскыны уг быгаты. Али туртто усьтыны пудоез вандонъя но утялтонъя цех. Татчыозь пудо-животсэс вузаллязы улэпкын. Нырысь кутскыкузы сярысь, Собинъёс али сюрс поллы кужмогес луэмын, шуэ Н. Медведев.

Бакча емыш будэто, нюлэс дасяло. Етӥн поттонъя заводзы вань. Со кунгож сьӧрысь вуттэмын. Скал кысконзэ но, нянь октонэз но — ваньзэ лэсьтэ татын техника. Быдэс республикаын Собиноын кадь ӟечесь гидъёс но лапасъёс ӧвӧл. Озьыен, куке-соку бырон калэ вуэм хозяйство туннэ 18 сюрс гектар музъем вылын рос-прос ужа.

* * *
Кивалтӥсь бордысь туж тросэз потэ. 1980-тӥ аръёсы дано удмурт воргоронъёсмы колхозъёсты ӝутон понна вань кужымзэс но сюлэмзэс ӧй понысалзы ке, со хозяйствоослэсь нимзэс туннэ тодазы возись но ӧй сюрысал ни. Калык веран вань: урободэ огпол рос-прос тэкитад ке, вольыт мыноз ни. Юкаменскысь Булат Абашев шуэ ук: «Тракторлэн» туж юн базаез кылемын вал. Дасез вылын ужаны капчигес но шулдыргес. Хозяйство аналтэмын луысал ке, сое туала вакытэ, оло, азинтӥсь но ӧй сюрысал. Кымаськем возэз ӝог уд ӝуты уго.

Елена Сараматова

Удмурт Дунне
By Удмурт Дунне 12 июля, 2013 12:51