Сютэм кӧтын визь уд люка

Удмурт Дунне
By Удмурт Дунне 5 июля, 2013 13:05
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Сютэм кӧтын визь уд люка

 

П. Пономарёв

П. Пономарёв

2006-тӥ арын шаерамы — Россиысь улосъёс пӧлын нырысьсэ — пыӵаны кутскиз «Школаын дышетскисьёсты йӧлэн сюдон» программа. Солэн быдэсъяськемез пумысен кенешиськомы вуз каронъя но калыклы юрттэт сётонъя министрен Пётр Пономарёвен.

— Пётр Парфельевич, кыӵе ужпумъёсыз та программалэн? Кӧня уксё висъяськиз?

— Мар ватонэз: пиналъёсты сюдон шаерамы сокем ӟеч радъямын ӧй вал. 60 процентэз гинэ школьникъёс школаосын кӧтсэс тыризы. Сиён пӧран техника вужмемын, соин пӧралод шат ческыт, кӧттыр сиён!

2006-тӥ арын Президентлэн А. Волковлэн косэмезъя Вуз каронъя но калыклы юрттэт сётонъя министерствоен дасямын вал школьникъёсты сюдонэз радъянъя программа. Со чакламын вал 2006-тӥ-2009-тӥ аръёслы. Солы дурбасьтэмзэс веразы Кун Кенешысь депутатъёс но.

Та программаез быдэстон улсын шаерысьтымы 50 процентэзлы дышетскисьёслы дунтэк сиён висъяськыны кутскиз: городысь школьникъёслы — витаминэн йӧл но пыжос, нош гуртысь пиналъёс ӵукназэ сиизы пӧсь сиён. Озьы ик кӧтсэс дунтэк тыризы 1-тӥ классысен 11-тӥ классозь ёрмись семьяосысь пиналъёс.

— Та программалы висъям коньдонлэн пайдаез шӧдӥськиз-а? Валтӥсь интые пуктэмын вал ук нылпиослэсь тазалыксэс юнматон.

— Шӧдӥськиз. Программаез пыӵатон улсын чакласа возимы пиналъёслэсь тазалыксэс. Покчи классъёсын таза нылпиослэн лыдзы 89 процентозь йылӥз. Ичигес луизы анемия, пинь сисьмон, ты висёнъёс. Чиед нылпиослэн лыдзы кулэсмиз.

—  Та программаын бадӟым саклык висъяське школьникъёслы сиён дасянъя базовой столовойёслы (ШБС).

— Соослы тужгес но бадӟым саклык висъяське. Таӵе пӧраськонниосты усьтон огазеяны юрттоз, шуом, одӥг городысь вань школаосты. Отысь сиськонниосы вуозы вылӥ ӟечлыкен, ческыт полуфабрикатъёс. Туннэ нуналлы вань ни кык таӵе пӧраськонниос. 2008-тӥ арын Вотка городын усьтӥськиз нырысетӥез ШБС: сутка ӵоже отын потто нылпиослы чаклам 28 сюрс порция сиён. Вакуум пуйые интыям сиён-юон люкылӥське Воткаысь 16 школаос куспын — ваньзэ-ӧвӧлзэ 8 сюрс дышетскисьлы. Ӵукна сиёнлэн шоро-куспо дуныз — 32 манет, нуназе — 38 манет.

2010-тӥ арын 20-тӥ сентябре таӵе пӧраськонни ужаны кутскиз Глазов городын но. Туннэ нуналлы отын дасяло 85 пумо полуфабрикатъёс. Валамон, сюдонэз ӟеч радъян соку ик пайдаен шӧдӥськиз пиналъёслэн тазалыксы вылын.

— Арлы быдэ та программаез быдэстон паськыта…

— Ӵукна сётӥськись дунтэк сиёнэн кӧтсэс тыро шаерысьтымы покчи классъёсын 80 сюрс пала дышетскисьёс. 2007-тӥ арын ӵукна дунтэк кӧтсэс тыризы 85 процентэз пиналъёс, нош кылем арын та лыдпус 93,4 процентозь йылӥз ни. Пӧсь сиёнэн сюдон радъямын ни 90,4 процентэз пиналъёс пӧлын. Россиын та лыдпус 83,5 процент вылын возиське.

Туннэ нуналлы шаерамы быдэсъяське нылпиосты сюдонъя 2010-тӥ-2014-тӥ аръёслы чаклам программа. Сое пыӵатонлы чакламын 1 миллиард манет. Кылем программаын сямен ик, таяз но валтӥсь интые пото пиналъёсты сюдонэз эшшо но ӟеч радъян, школьникъёслэсь тазалыксэс юнматон.

Со сяна, нимысьтыз саклык висъяське гуртысь школаослы но. 2010-тӥ арысен 2012-тӥ арозь выльдэмын 393 столовойысь оборудование. Туннэ нуналлы воштэмын ни 50 процентэз вужмем техника. Туала технологиос луонлык кылдыто пӧрам сиёнлэсь ӟечлыксэ ӝутыны, но со вие ик солэсь асдунзэ кулэстыны, бюджетмылы тупамон карыны.

Кылем арын покчи классъёсысь школьникъёс пӧлын ортчытэм юалляськон возьматӥз: 97 процентэзлы кельше ӵукна йӧл юыны.

Арлы быдэ шаерысьтымы школаос куспын ортчытӥськомы пиналъёсты сюдонэз радъянлы сӥзем ӵошатскон. Отчы пырисько городъёсысь но, гуртъёсысь но школаос. Вормисе потэмъёслы ӝоггес коньдон висъяське столовойёсысьтызы вужмем оборудованизэс выльдыны. 3 ар куспын та конкурсэ пыриськиз 82 школа, со пӧлысь 48-эзлы уксё висъяськиз ни.

— «Школаын дышетскисьёсты йӧлэн сюдон» программаын саклык висъяське ёрмись семьяосысь пиналъёсты дунтэк сюдонлы но. Макем шӧдскымон соослы та юрттэт?

— Зэм, та программа улсын дунтэк сюдон радъямын 1-тӥ классысен 11-тӥ классозь пиналъёс пӧлын. 2007-тӥ арын соосты сюдонлы бюджетын чакламын вал быдэн 5 манет. Но Президентлэн А. Волковлэн сюлмаськемезъя туэ юрттэтлэн быдӟалаез пиналлы быдэ 24 манет 80 копейкаозь ӝутскиз. Та дырлы ёрмись семьяосысь пиналъёс 6 сюрс пала лыдъясько. Соосты сюдыны бюджетысь туэ висъяськоз 32 миллион манет. Азьланяз но саклык висъяськоз нылпиосмес ческыт сиёнэн сюдонлы, тазалыксэс юнматонлы.

Печатлаське «Удмурт Республикалэн 2011-тӥ-2013-тӥ аръёслы чаклам бюджетысьтыз расходъёсты ӟечомытон» программаез но «Шара бюджет» проектэз быдэстон улсын.

Сергей Захаров

Удмурт Дунне
By Удмурт Дунне 5 июля, 2013 13:05
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<