Сьӧре ветлӥсь адӟон

Удмурт Дунне
By Удмурт Дунне 19 июля, 2013 09:55
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Сьӧре ветлӥсь адӟон

- Тамак кыскон инты корка сигын сяна ӧз кыльы ни, лэся, табере

— Тамак кыскон инты корка сигын сяна ӧз кыльы ни, лэся, табере

Шудо яке шудтэм луонзэ Инмар адямилы вордскемез бере ик гожтэ, пе. Мыным шудо луыны кылдымтэ кадь, улытозям туж трос ужан интыосме вошъяно луи: одӥгаз но кема ӧй ӝегатскылы, ушъян кылъёс но ӧй кылылы, премия но ӧй басья.

Гужемзэ гурт пудоез возьманы медъяськи. Ох, сюлмы шумпотонэн пачылмемын, мылкыды бурдъяськемын. Зэмос курорт, номырин бадӟым зарезь дурын шутэтсконлэсь уг висъяськы. Дун вуын пыласькисько, шунды шорын кыллисько, вож ковёр кадь гуждорын погылляськисько, чылкыт омырен шокасько. Со гинэ мар, йыр вадьсам тылобурдоос чирдо. Майбыр!

Огез умойтэм. Котькуд нунал сямен пудоез шайвыл вамен я со сьӧрысь куакъёс пӧлтӥ улляно луэ. Нош мон туж кӧшкемась. Куакетӥ потыкум, мышкытӥм кин ке но кырмиськоз кадь, потэ. Куддыръя йырысьтым кышетэ вай борды дэмӟыса кыле. Малпасько, кулэмъёс, дыр, ишкалтыса кельтӥзы. Нош скалъёс, юри ӧч карем кадь, куашкам кенер вискытӥ шайвылэ пыро. Мон отысь оло вамышъяса потӥсько, оло лобисько.

Гужем шорозь кызьы но озьы возьмай ик пудо уллёез. Одӥг нуналэ шай дорыгес ик нуназеяны пукси, сиёнэн сумкаме кенер борды оши. Няньме куртчыса ӧй вутты, шӧдӥсько: мышкам кинэз ке вань. Со вие ик, секыт шокаса, пельпумам йӧтскись луиз. Мон интыям ик пуми: кылы-ымы кыстӥськиз, куара поттэме уг луы.

Кӧня озьы пуки, уг тодӥськы. Асме юн карыса, йырме берыктӥ но… шорам сюро, сьӧд гоно ымныр шокыштӥз. Синъёсыз ӝуало. Кызьы султэмме ик ӧй вала. Бызьыса эшъёсы доры вуи. Нош соос, кӧтсэс кутыса, серекъяло: киысь нянь сиыны дышетэм така, пе, сьӧрад бызе. Ох, албасты, малпасько, кышкатӥд ке кышкатӥд.

Кӧня ке буйгатскеме бере сиёнэн сумкае доры берытски. Нош со нокытын уг адӟиськы. Мугоры, токен шуккем кадь, зубектӥз. Кулэмъёс монэн тазьы шудо, дыр, малпасько. Долкаса сылонъям уллё пӧлысь куӵо скал син шорам йӧтӥз. Мае ке туж сиыны выре. Учкисько но, сумкае музын костаське, нош калыз скаллэн сюр бордаз дэмӟемын. Йыры курен пери кадь дораз вамыштӥ.

Скал, мынэсьтым кышкаменыз, тэтчыса ик пегӟиз. Сиёнэн сумкае нюж кыстӥське сьӧраз. Бызёнъям кузьыли муӵ борды канжаськи но кык киыным ик кизер скал «табань» вылэ зыми. Ныры зол шуккиськемен, киме ымнырам лякемме но ӧй вала. Шорам учкыса, эшъёсы позыръяськыса серекъяло, нош мынам синкылие ӵужыр ваське бам кузям.

Шур дуре мыныса, мисьтӥськи. Буш сумкаме но пудо пыд улысь шедьтӥ. Тӧдьы ыж турын йыръён висказ мышкам бӧксыса кылиз: «Бе-е-рло мар на-на». Йырме лэзьыса, вамышъян сямен син пумтӥм адӟисько: скалъёс бусые пыриллям. Эшъёсы уг адӟо, лэся.

Туж зол кесяськыса, пудоез возь вылэ уллясько. Олокытысь-мар колхоз председатель «Нива» машинаеныз вадьсам дугдӥз. Кузё потыса ӧз вутты на, мон малпаськисько ни: нош ик ужме ыштӥ-а, премия басьтэм интые, бадӟым штраф тыроно луоз-а. Адӟон пыд улысь потэ, шуо.

Мынамез нош сьӧрам ветлэ, лэся.

Лапок Надёк.
Пичи Пурга ёрос, Аксакшур

Суредаз Василий Пахомов

Удмурт Дунне
By Удмурт Дунне 19 июля, 2013 09:55
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<