«ШунКо», яке «Шундылэн» коркаез котьку шуныт

Удмурт Дунне
By Удмурт Дунне 23 июля, 2013 10:38
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

«ШунКо», яке «Шундылэн» коркаез котьку шуныт

Гожъяськись отряд

Гожъяськись отряд

Школаын дышетскыкум, Выль арез сямен, чидатэк возьмалляй «Шундыкар» лагерез. Арлы быдэ со эшъяськытэ уно удмурт нылпиосты, юрттэ соослы быгатонлыкъёссэс волятыны, усьтӥськыны.

Туэ «Шундыкар» ортче 17-тӥ июльысен 26-тӥ июлёзь. «Лесная страна» лагере вуим но паймыса дугдӥм: кудаз корпусын уло «шундыкарчиос»? Та вакытэ соослэн дышетсконзы луыны кулэ. Кӧня ке азьлань мыныса, синйылтӥм ӝӧк сьӧрын пукись нылпиосты. «Литература» отряд фин-угор кылбурчиослэсь чуръёссэс ӟуч кылысь удмуртэ берыктэ вылэм.

— Туэ нырысьсэ бадӟым но покчи литераторъёс огазеямын. Соос тодматско берыктон удысэн. Вань ужъёссэс чакласькомы поттыны нимысьтыз бичетэн: со нылпиослы но тунсыко луоз, мукетъёслы но адӟем карымон, — вера удмурт егитъёслэн «Шунды» огазеяськонзылэн тӧроез Ольга Тронина. — Со сяна, сборнике ик пыртомы «Шундыкар» шудонъёсыз: соос милям трос луизы ни.

Литератураен вырисьёс дорысь ми вамыштӥм «Проектирование» отрядэ. Пичигес гинэ кабинетын 4 дышетскисьёс пуко: огез маке гожъя, куинез куспазы кенешо. Выль проектсы бордын ужало вылэм. Кин ке со вакытэ ик, коньдон утчаса, лагерьлэсь кивалтӥсьёссэ котыръя, кин ке смета, вазиськонъёс гожъя. «ШунКо», яке «Шуныт корка» проект, 2 нунал куспын кылдӥз. 24-тӥ июле солэсь емышъёссэ адӟыны луоз ини: «шундыкарчиос» «Лесная странаын» мукет шутэтскисьёсын ӵош лагерьысь 2 беседкаос вылэ удмурт пужыос суредалозы, удмурт шӧм отчы пыртозы. Презентацие лыктозы «Лесная странаын» ял карись нылпи юртъёсысь пиналъёс. Соос понна «шундыкарчиос» ортчытозы удмурт калыкен но культураен тодматӥсь, шудонъёсын но конкурсъёсын нимысьтыз программа. Вераны кулэ, беседкаосыз выльдыны уксё висъязы «Лесная страна» лагерь но удмурт егитъёслэн «Шунды» огазеяськонзы. Юрттэт курыса, ветлӥзы асьсэос «шундыкаръёс» ик.

«Проектировщикъёслэсь» ужамзэс дунъяса, азьлань вамыштӥм. Отӥ-татӥ удмурт пиналъёс ветло кин камераен, кин ручкаен-блокнотэн… Со «Журналистика» но «Видеоискусство» отрядъёс вылӥллям: гожъяло материалъёс, клипъёс лэсьтыны дышетско. Ватсалом на: туэ «Эстрада» отрядысь усточиос 4 кырӟан гожтозы (азьвыл таӵеез ӧй вал на!), со кырӟанъёслы клипъёс пуктэмын луозы. Ваньзэ лэсьтозы асьсэос пиналъёс, специалистъёссы юрттэмен.

Корпусэ пырыны ӧм на вуттэ, Марина Галичаниналэсь кырӟанзэ кылӥм. Аха, «Эстрада» татчы интыяськем, чилектӥз йырын. Зэм но, актовой залэ люкаськиллям кырӟаны устоос. Татын соос тодматско туала гуръёсын но кырӟасьёсын, куара пукто. Шонер кырӟаны дышетскем сяна, пиналъёс эктозы но: соос доры вуылоз хореограф.

Чылкыт омыре, корпусъёс вӧзы, умой гинэ интыяськиллям «Дӥськут дизайн» но «Суредаськон» отрядъёс. Суредасьёс туэ живопись амалэн тодматско. Нош «Дӥськут дизайн» отрядын нылъёс басма вылэ акрилэн суредаськыны дышетско. Егит специалистсы, Ксения Ворончихина, вера:

— Мон нырысетӥзэ «Шундыкарын». Школаын дышетскыкум, конкурсэз ортчи вал, но лагере мыныны ӧй быгаты. Соин туэ, специалистэ ӧтемзы бере, пайми но, туж шумпотӥ но, куалектӥ но: уг тодӥськы вал, кыӵе пиналъёс дорам лыктозы, мар карыны соос быгато ни но малы мон соосыз дышетыны быгато. Али мон кивалтӥсько Удмурт кун университетысь «Неофолк» этностудиен. Студентъёсын ми, гань-гань вераськыса, киноос учкыса, ужаськом, нош «Шундыкарын» дырмы туж ӧжыт. Шумпотӥсько, укмысэз ик нылъёс туж быгатӥсесь, тыршисесь, ваньмызлы ӝог дышо.

«Дӥськут дизайн» отрядэз бырйиз Алнаш ёросысь Усо гуртысь Аня Бурдина. Лагере со шедиз, «Удмурт дуннелэн» конкурсаз вормыса.

— Мынам ӵужатае суредась, мон но суредаськыны яратӥсько. Азьланяз дизайнер луэме потэ, соин та отрядэз бырйи. Мыным «Шундыкарын» туж кельше. Паймисько вожатойёслы: соос котьку капчи мылкыдоесь, вераськисесь, ноку уг жадё, кожалод. Туж яра специалистмы но: со ваньзэ рос-прос валэктэ, малпанъёсмылы дурбасьтэ. Отрядэ но усто: ми, 9 нылъёс, ваньмы одӥг комнатае улыны сюрим. Кӧня ке нунал куспын ог-огенымы туж эшъяським, аръёсын тодмоесь ни кадь! — вера Аня Бурдина.

«Удмурт дуннелэн» конкурсаз вормыса, «Шундыкаре» вуиз Шаркан ёросысь Ульяна Вахрушева но. 8-тӥ классэ выжем нылаш «Театр» отрядэз бырйиз:

— Мыным котьку туж тунсыко потэ вал, кызьы шудо артистъёс, кызьы соос улонэз возьмато. «Театр» отрядын дышетӥсенымы Василий Ушаковен сценарий бордын пыр-поч ужаськом, пуштроссэ, валтӥсь малпанзэ эскериськом, геройёслэсь психологизэс, пуш дуннезэс усьтӥськом. Со туж секыт, но тунсыко. «Шундыкарын» мыным яра. Дыр ӝог лобӟе. Туж кельшо специалистмы но, вожатойёс но, соослы паймемысь уг дугдӥськы!

Вожатойёслэн улэмзы сярысь ке верано, со капчи ӧвӧл. Уйёсты изьытэк, ялан ужрадъёслы дасяськыса, нылпиосыз чакласа, соослы номер пуктыны яке газет лэсьтыны юрттыса, вань ӟигарзы быре. Но лагерьын ортчытэм кӧня ке нуналъёс шуныт гинэ тодэ ваёнъёс кельто. Удмурт кун университетысь удмурт филологияя факультетын дышетскись Алексей Софронов «Шундыкаре» туэ нырысетӥзэ вожатой луыса мынӥз:

— Мыным сюриз «Сюй мунё» отряд. Отын 5 пиос но 4 нылъёс. Пиналъёсы туж кельшо: соос нырысетӥ нуналъёсаз ик эшъяськизы, вазиськисесь, капчи мылкыдоесь, мыным соосын капчи. Но! Ялан изем потэ! Тодӥсько вал, «Шундыкарын» кӧлыны дыр ӧжыт луоз шуыса: дасяно ужрадъёс, отрядлы дыр висъяно — но такем коскало шуыса, ӧй но малпа.

«Шундыкаре» вуылыкумы, ӧм пумиське «Фольклор» отрядэн. Туэ со нырысетӥзэ потӥз экспедицие Дэри ёросысь Шаберды гуртысь кырӟанъёсты-веранъёсты гожтыны. Зэмос фольклористъёс кадь! Лагерьлэн ворсаськоназ соос тодматозы люкам материалъёсынызы.

10 нунал ӵоже 110 нылпиос 10 отрядъёсын тодон-валанзэс будэтозы, выль эшъёс шедьтозы, шутэтскозы. Лагерь йылпумъяськытозь, кылиз на 3 нунал. Пайдаен мед ортчоз дырды!

Лена Рябина
Туспуктӥз Владимир Беломорских

Удмурт Дунне
By Удмурт Дунне 23 июля, 2013 10:38
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<