Шаере мӧзмыт гурла…

Удмурт Дунне
By Удмурт Дунне Июль 16, 2013 14:50
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Шаере мӧзмыт гурла…

В. Ар-Серги

В. Ар-Серги

Москваын потӥсь «Литературная газета» алигес печатлаз шаерысьтымы калык писателен Вячеслав Ар-Сергиен интервью. Отын вераськон мынэ Удмуртиысь литератураын кылдэм югдур сярысь.

— Вячеслав, куке но Удмуртиысь литературалэсь данзэ вылӥе ӝутӥзы Кузебай Герд, Михаил Петров, Флор Васильев, Олег Поскрёбышев, Геннадий Красильников. Быгато-а туала писательёс со данэз пыкъяса возьыны?

— Кылем даурысь 90-тӥ аръёсы воксё выль улонэн пумиськыса, Удмуртиысь литература воксё ӵоксузиз, али но ӧрзэ шедьтыны уг быгаты. Солэсь азьвыл огдышем сямъя литература удысын политикаез нуиз интыысь Писательёслэн союззы, соин кивалтӥзы быдэс СССР-лы тодмо писательёс, шаерысьтымы кивалтӥсьёс соосты гажазы, книга поттӥсьёс — асьмелэнъёсыз но, Москваысьёсыз но — дурбасьтӥзы. Мон верасько прозаик Геннадий Красильников, кылбурчи Флор Васильев, романист Семён Самсонов сярысь. Собере Писательёслэн союзазы вуизы мукет адямиос, таосызлэн бурдъёссы вакчиесьгесь вылӥллям, быгатонлыксы сокем бадӟым ӧй вал ни. Озьы литература соос кожен но, дыр, ас дуннеяз ёрказ.

Жаляса верано, милям гинэ озьы ӧвӧл — мукет национальной республикаосын но югдурзы сыӵегес ик. Отын но писательёслэн огазеяськонъёссылэн данзы усиз. Азьвыл писательёс (туж ик кемалась ӧй вал со — 25-30 ар талэсь азьло) гожъязы страналэн идеологиезлы нялтас. Кыӵе идеологиез туала обществолэн, нокин вераны уз басьтӥськы, ма та обществомылы чеберлыко литература, меӵак вераса, кулэ но ӧвӧл, оло… Бадӟым городъёсысь литература удысын табере кузёясько тодмо, узыр издательствоос, Удмуртиын озьы ӧз луы: ичи тиражен, ичи гонорарен потӥсь, тодмотэмгес изданиос — валамон, бюджет чотын печатласькисьёсыз (малы ке шуоно мукетъёсыз ӧвӧл) — нокызьы но дась ӧй вал, кужымзы но ӧй тырмысал литератураез огъя ӧре огазеяны, валанзы но. Литературамылэн вирсэрыз мырдэм йыгаське: пичи-пичи ужрадъёс ортчыло, ӟеч книгаос одӥг-ог пото, литобъединениос но студиос дырын-дырын шокыштыло. Шокамез кылӥське бере, литература улэп ик, дыр, на…

— Озьыен, Удмуртиысь писательёслэн улонзы мукет улосъёсынлэсь пӧртэм ӧвӧл. Кызьы малпаськоды, кыдёкысь авторлы одно ик-а нырысь Москваын тодмо луоно, сое котькытын мед кылозы шуыса?

— Азьвыл вакытъёсын ӵошатыса, шоркарысь книга сэбедэ пыриськыны шуггес луиз. Кун уг сюлмаськы ни книга вӧлмытон сярысь. Кылысь кылэ берыкъясьёс но писательёс куспын герӟет ышиз, берыкъясьёс ик ӧвӧл ни, шуыны луоз, калык лыдӟиськемысь дугдэ. Но национальной республикаосысь авторъёс одӥг-ог пиштыло ик шоркарын.

— Тӥледлы дэмлаллязы Москваын, кунгож сьӧрын ужаны, улыны, но тӥ малы ке но соглаш ӧд луэ вордскем шаерысьтыды кошкыны…

— Куд-ог дыръя жалясько, ӧй вазиськы шуыса — адями ляб… Но ма карод: аслад гуред котьку но мусогес, эстӥськыны пуэз куд-ог дыръя уг тырмы ке но… Гожъяськись адями дуннеез адӟыны кулэ, соин дорысьтым кошкылӥсько огшаплы, кемалы но — сыӵе сюрес бырйи. Вордскем шаерелэн кырњанъёсыз мӧзмытэсь — школаосын вордскем кылъя урокъёс кулэсмем бере тужгес но. Со сярысь ми шара вераськом, но толыкез ӧвӧл — кылымтэ улсы карисько. Ма кароно таӵе дыръя? Анай кылын гожъяськоно, кылысь кылэ берыкъясьёс ӧвќл бере, аслыд тросгес кылъёс тодоно.

— Берыкъян сярысь ке… 21-тӥ даур кутсконын удмурт писательёсты трос берыкъязы фин-угоръёс — Финляндиын, Венгриын, Эстониын. Али соосын кыӵе кусыпъёсты?

— Вал сыӵе ӟеч вакытъёс. Пусйыны кулэ: берыкъясьёс зэмос удмурт текстъёсын ужазы, подстрочник ӧз курылэ, озьы бере, котькуд аспӧртэмлыксэ, чыры-пырызэ шӧдӥзы. Удмурт авторъёсты тужгес ӵем берыкъязы Эстониын. Куке-соку паськыт шур али ӵакмыны ӧдъяз, кылизы на пичильтык ошмес синъёс. Но кусыпъёс воксё ышемын ӧвӧл. Зэм, книга поттыны коньдон шедьтыны шуг…

— Республикаяды кылдо-а выль нимъёс?

— Быгатӥсь егит авторъёс вань гинэ. Гожъясько, вань дауръёслы шуыса. Асьсэды генийёс шуо но котькуд пыкылэмлы пумитэ ортчыт ӝожомо. Ми но куке но сыӵеесь ик вал, вылды. Пӧлысьтызы кыкез-куинез литературае кылизы ке — умой ини.

Литература котырысь кивалтӥсьёс, лыдӟисьёс милям гань-ганесь: милемыз уг кыло, уг адӟо. Соос малпамъя, зэмос литература кытын ке отын — Москваын, кунгож сьӧрын. Удмуртиысь начар сюй вылын со уг пушйы, кожало. Куке-соку Ижевск кылдӥз ож тӥрлык, андан поттӥсь заводъёс бордын. Менталитетэз уд вошты, шӧдске: корт котырын бергась инженеръёслэн, рабочийёслэн стильзы, ужбергатонлэн чурыт куараез кужмоя. Таӵе сюбег системаын кыл котыре думиськемъёслы, быдэс культуралы сямен ик, кылем-мылем гинэ инты шеде на. Ӝож, литератураямы табере пырско литературалы мурт адямиос. Соос тодо, кинэн эшъяськоно, ӟепъёссы зӧкесь — книга бере книга чуръяло, асьсэды таланто адямиос кожаса.

— Но зэмос писательёс но вань. Тӥ малпамъя, кин пӧрмытэ али дор палъёсады гожъяськыны?

— Гожъясько, лыдӟисьёсын пумиськыло мӧйыосызгес писательёс: кылбурчиос Владимир Владыкин, Татьяна Чернова, Герасим Иванцов… Шоро-куспо арлыдоос — прозаик Римма Игнатьева, кылбурчиос Иосиф Иванов но Сергей Жилин, Анатолий Перевозчиков но Владимир Михайлов. Егитъёсызгес пӧлысь: Зинаида Рябинина, Сергей Матвеев, Андрей Баранов, прозаик Лариса Марданова… Воксё егитъёс пӧлысь висъясал Дарали Лелиез, Богдан Анфиногеновез, Арзами Очеез, Татьяна Репинаез, Андрей Гоголевез но «Ваньмон дыр» сайт котыре огазеяськемъёссэ: Маша Золотарёва, Дима Глухов, Аня Загумённова, Маша Векшина, Лиля Юртаева, Аня Бурдина, Аня Ханова… Бигер кылэз кӧня ке тодӥсько бере, вераны быгатӥсько Ижын улӥсь бигер кылбурчиосты но: Ренат Баттал, Гимран Сафин, Ибрагим Биектауллы…

— Йылпумъясь юан: ма бордын ужаськоды?

— Ар пумозь потыны кулэ ӟуч кылын кылбуръёсын бичет но удмурт кылын веросъёсын книга. Кун кисы чотын ӧвӧл… Со сяна, вырисько яратоно чыры-пырыеным: трос берыкъясько, мурт книгаослы — данакез соос тунсыкоесь — рецензиос, азькылъёс но беркылъёс гожъясько, лыдӟисьёсын пумиськылӥсько, паркетӥ малпаськыса калтыртӥсько… Озьы витисько вуоно романме, повестьме яке пьесаме, яке кылбурме, яке чебер чурме…

Вераськиз Анастасия Ермакова.
«Литературная газета», 27-тӥ номер, 2013-тӥ арын 3-тӥ-7-тӥ июле.

Удмурт Дунне
By Удмурт Дунне Июль 16, 2013 14:50
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<