Сад вые бадяр пӧлы

Удмурт Дунне
By Удмурт Дунне 5 июля, 2013 12:58
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Сад вые бадяр пӧлы

Можгалась питомник куашкан калэ вуэмын

Можгалась питомник куашкан калэ вуэмын

Малы быре Можгаысь питомник?

Удмуртиын тужгес бадӟым данэз вал Можгалась сад но емышъёс будэтонъя питомниклэн. Сое туннэ тус-тас каро.

Данэз ыштон
Можга черкогуртын питомник кылдӥз 1926-тӥ арын. Татын бадӟым уж мытӥзы улмопу, грушапу будэтон ласянь. Выжыятыны быгатӥзы арониез, облепихаез. Черешня сярысь но уйбырто вал, но инкуазенымы таиз ӧз тэрытӥськы. Нош макем трос ӟеч эмезьпу, сутэрпу пӧрмиз! Кӧня-кӧня гектар музъем вылын кисьматыны ӧдъязы викториез. Удалтӥз но таид со вакытэ туж зол — ӧжыт гинэ мыжык быдӟа ӧз будылы.

1960-тӥ аръёсы питомникын будэтэм модосъёсыз но емышъёсыз басьтон понна Можгалэн палэназ но улӥсьёс вожмаськыны ӧдъязы. Асьме доры, ӟеч культуралы шуыса, ветлыны кутскизы Свердловск но Москва котырын улӥсьёс.

Кисьмам емышсэс питомникын ужасьёс асьсэ кужымен гинэ бичаны ӧз вормылэ ни. Соослы юрттӥськизы быдэс ёросэн. Кунояськыны вуылӥзы Татариын, Кировын улӥсьёс. Табыдӟа данэз огезлэн но Удмуртиысь питомниклэн со вакытэ ӧй вал. Нош ас вакытаз та удысэн вырыны ӧдъяз вал 6-ез хозяйство.

Нош туннэ сад быдэсыз сямен вые ни бадяр пӧлы. Виктория воксё векчи кылемын, со но бусы шорын ик куасьме. Вылаз ву кисьтаны техниказы ӧвӧл. 70 гектар музъем вылэ вќлскем питомник мырдэм шока.

Бискылиез люкон
Черкогуртысь «Можгинское» хозяйствоын зуркыт луыны кутскиз ни дасо ар талэсь азьыл ик.

— Хозяйство пӧртэм банкъёсысь 18 миллион манет тыр пунэм люказ. Сое кысыны ӧз вормы ни. Банкротэн ялоно луиз. Соку хозяйствоез басьтон мылкыдын вазиськиз Юрий Рябов. Но табере солэсь но мылкыдзэ сӧрисьёс сюрыны кутскизы. Можга палась калык берло дыре тодмантэм воштӥськиз. Алигес гинэ асьсэос паймизы кадь Дэри ёросын улӥсьёслы: колхозысьтызы пото, музъем пайёссэс узыръёслы вузало, озьы бусыосын ӝужало коттеджъёс. Можга черкогуртын но пайёссэс басьтыны турттыса судэ вазиськисьёс люкасько ни ай. Вормо. Нош питомник быдэсыз кылдэмын пайёслэсь. Ческыт бискылиез сямен, ур-вар карыны дасесь. Но мынам питомник понна сюлэмы туж зол висе. Сое быдтэме уг поты. Соин ик пайёссэс басьтӥсьёсты суд пыр косоно: пайдэ аслыд карид, одно љикыт возь, — шуэ ёрос йыр Аркадий Вершинин.

Нош утялтӥсьёсыз ик сюрозы на меда? Мытэм ужез аналтыны капчи. Собере, оло, асьсэос ик куке-соку шуозы: выльысь улӟытоно совхозэз. Но поезд туж кыдёке кошкоз ни.

Ёросысь валтӥсь агроном Маргарита Андреева ивортэмъя, берлозэ «Можгинское» хозяйствоысь бусыосы удобрениос но минералъёс кисьтамын 2009-тӥ арын. Со но 1 гектар вылэ усиз 9 килограммен. Нош 1985-тӥ арын гинэ котькуд гектар вылэ сое пазязы 130 килограммен.

— Кыӵе уксёен мон удобрениос басьтыны кулэ? — пайме хозяйствоен кивалтӥсь Юрий Рябов. — Учке ай, кыӵе кӧс возиське куазь! Зоръёсты 2010-тӥ арысен ум адӟылӥське, шуыны луоз. Сыӵе дыръя урожай басьтод шат? Нош урожай ӧвӧл ке, уксё поттон амал уг сюры.

Ачиз со дыре ик шарая: кылем арын питомник 3 миллион манет тыр барыш поттӥз. Ваньмыз отын ужасез 15 кузя. Уждунзы 6-7 сюрс манет.
Туннэ питомникысь холодильникъёс но вузамын ни. Азьвыл емыш бичало но варення я компот лэсьтонъя заводъёсы келямлэсь азьвыл отчы тыро вал. Туннэ меӵак бусыысь келяло ни.

Ёрос администрациын Рябовез туж ик курланы уг лэзё. Та воргорон ӧй луысал ке, хозяйство воксё бырысалыз ни, пе. Но палэнысен югдур мукетгес адӟиське. Азьвыл татын техниказы но вал. Табере вузамын ни. Фермаысьтызы кысконо 370 скалъёссэс но артысь Вишур хозяйствое выжтӥзы ни.

— Скал кыскисе лыктэмысь дугдӥзы. 10-16 сюрс манет нокинэ но уг гочаты ни. Пудоез воксё быдтыны жаль потӥз. Соин ик вишуръёслы сётӥмы, — вера Юрий Рябов. — Азьвыл 1 сюрс 500 гектар гыроно-кизёно музъеммы вал. Табере, вишуръёс техникаен но ужась киосын юрттэмен, 2 сюрс 700 гектарлэсь но ортче. Хозяйствоез аналтыны мон уг малпаськы.

Кивалтӥсь пудо вордонлы, картошка, нянь будэтонлы дурбасьтэ. Но со дыре ик питомник палэнэ кыле.

Азьвыл Удмуртиысь ваньзэ питомникъёсты бурд улаз возе вал Гурт удысъя но сиён-юнъя министерство. Туннэ котькудӥз кузё ачиз сямен кивалтыны выре, нокинэ кылэм-адӟем карытэк, шуэ министрлэн воштӥсез Аркадий Малков.

— Питомниклы субсидия но уг вуы ни ай, — вера Аркадий Трофимович. — Сое басьтыны но капчи ӧвӧл. Хозяйствоослы юрттэт вуэ, скал уллёзэс йылтыны быгато ке, йӧлзэс уг уськыто ке, гырон-кизёнзэс ӟеч быдэсто ке. Питомниклы но субсидия чакламын писпу басьтыны. Но со модосъёсты нырысь басьтоно, документъёс вуттоно, соку гинэ субсидия кие вуоз. Но выль модосъёсты ваён понна кытысь соос уксё шедьтозы?

Котыр пӧяськон
Питомникын ужась нылкышноослэн туннэ сюлэмзы вирен пылаське тани мар понна но. Можгаослэн шуыса, республикаысьтымы базаръёсын но ярмаркаосын вуз каро Молдавиысь ваем писпу модосъёсын.

— Можга базарын гинэ но милесьтым чик уг возьдасько, — лулӟо кышномуртъёс. — Милемын артэ удмуртъёс ик интыясько, палэнысь модосъёсты калык син азе потто но ялон ошо: Можга питомникысь вуттэмын. Адямиос оско. Соос уг тодо: Удмуртиын будэтэм модос ноку но 2 метр ӝуждалаё, 3 сантиметр зӧкталаё уз луы! Шуныт палан гинэ со кыстӥськыса будэ. Собере, асьме саженецъёслэн выжызы мучоло кадь лусьтыр-ласьтыр, нош Молдавиын со одћг-кык ваё гинэ.

Соослэнэныз артэ питомникысьтымы модосъёс начаресь адӟисько. Таин сэрен ик адямиос синмасько шуныт палась вуэмезлы. Мертто но йыр бордазы кырмисько: модоссы пумен пашмыны кутске. Со уго асьме кезьытъёсты ноку адӟылымтэ. Соин кынмонлы сётӥське. Но басьяськисьёс татын но нош ик ми вылэ урдӥсько: тӥляд питомникады будэтэмзэ басьтӥмы вал. Каргасез но сюре, уксёзэ берен курисез но шеде. Сыӵе дыръя туж шуг валэктыны, тӥ Молдавиысь ваем алдар модосэз басьтӥды шуыса.

Писпу модосъёсты, кунгож вамен поттыку, рос-прос чаклась ӧвӧл. Можга ёросысь гурт удысъя управлениен кивалтӥсь, ёрос йырлэн нырысетӥ воштӥсез Владимир Дерюгин верамъя, алдаськись вузчиослэн писпу модосъёссы вылэ документъёссы но куддыръя воксё но уг луо. Но сыӵеосын нюръяськыны шуг. Штраф — 200 манет. Одӥг интыысь улляськод кадь, соку ик мукетсэ шедьто — пычей кадесь.

Сылмисьтэм оскон
Черкогуртын, документъёслы осконо ке, туннэ 900 мурт улэ. Но коркаостӥ ортчид ке, 780 гинэ люкаськоз. Таос пӧлысь ужась арлыдо муртъёс 416 кузя. Пенсие потэмъёсыз 194. Сомындагес ик быдэ вуымтэос но. Шоразы учкиськод но, мылкыдзы капчи кадь. Улэм-вылэмзы сярысь юалляськыны кутскиськод но, соку ик ӝожомо. Хозяйствозы рос-прос ужаку, адямиос асьсэос но пудо вордыны выризы. Котькудӥзлэн музъем паез вал. Отысь турын ворттӥзы. Колхоз юрттылӥз нянен. Нош туннэ хозяйствоязы техника ӧвӧл. Турындэ тыбыр вылад уд вайы. Таин валче гидъёссы но бушазы. Городскойёс кадь, пе. Котькудӥз аслэсьтыз юртъерзэ гинэ на чакла. Нош артэ зор-кот улын сисьме культурая юртсы. Спортзаллэн липетэз 1998-тӥ арын ик куашказ ни. Сое туннэ ке но нокин уг выльды. Азьвыл черкогуртэ пырон дорын калыкез йӧн-йӧн пумита вал нылпи юрт. Туннэ отын пушъе бадяр. Ваньбурез туж кемалась тус-тас каремын.

Паймиськод: кызьы кирпичъёссэ кесяллямтэ на. Мар нылпи юрт сярысь веранэз? Гуртсы шорын ик 1990-тӥ аръёсы ӝутӥзы, липет улэ пыртӥзы вал 22 квартиралы 2 этажъем чебер юрт. Тыл но кыскизы ни вал. Со туннэ ке но вуттэмын ӧвӧл. Укноостӥ тӧл шула. Езъёсыз кемалась качамын.

Таӵе шимес суредъёсты адӟыса, котькудӥзлэн сюлэмыз ик вырӟе. Интыысь кивалтӥсьёслы номыр но кулэ ӧвӧл, шуэмез потэ куд-огезлэн. Гурт шоры ик ӝутэм черк гинэ на оскон кузьма: ваньмыз ӟеч луоз на. Тани ук туэ гужем пумын татын усьтӥськыны кулэ 60 интылы чаклам выль нылпи сад. Асьсэлэн пичи нылпиоссы воксё но 50 кузя. Но садлэн мугорыз, зэмос дворец кадь, кыдёкысен адӟиське ни. Кин тодэ, азьланяз, оло, питомниксы но выльысь пушъёз.

Елена Сараматова
Туспуктэмез: udmfoto.ru

Удмурт Дунне
By Удмурт Дунне 5 июля, 2013 12:58