Пумтэм пайми но синмаськи алнашъёслы

Удмурт Дунне
By Удмурт Дунне 9 июля, 2013 11:15

Пумтэм пайми но синмаськи алнашъёслы

Гербере пырон капка

Гербере пырон капка

Ми, «Удмурт нылкышно кенешлэн» Ува ёросысь ёзчиосыз, вуылӥм элькун Гербере.

Сыӵе ветлэммы потыса мынӥм, берытским но инбаме ӝутӥськымон лӧптэм мылкыдын. Ваньмыз гань-гань ортчиз, мултэс бызьылон-пӧсекъям чик ӧз шӧдӥськы. Алнаш музъем, зэм но, удмуртъёслэн вашкала дуннезылы укша: татын улӥсьёслэн сямъёссыя но, вашкала йылолъёсты утемзыя но, ас музъемзэс, калыксэс яратэмзыя но, куно карыны быгатэмзыя но.

Ужрадлэн сӥё-дано люкетэз кутскем бере ик сюлэме шуныт пыриз: кузёоссы верасько чылкыт удмурт кылын, кырӟанъёссы но алнаш шӧмоесь. Сцена тыр воргоронъёс — артистъёс — потӥзы, соослэсь куаразэс кылыса, бам кузя синвуос васько. Алнаш музъем, калыксэс яратэмзы сярысь, сюлэмзэс, лулзэс сётыса, кырӟазы.

«Удмурт Кенешлэн» Президентэз Игорь Николаевич Семёнов верамъя, тамында калык нокытчы ӧз люкаськылы на. Нокудӥз но куно ассэ мурт ӧз лыдъя. Калык пазьгиськиз пӧртэм площадкаосъя. Ми кырӟасьёс котырынгес вал. Гур-р карыса, учкисьёс чабизы «айкайёслы». Татын соосты уката ярато. Малызэ валам, «Родина» ООО-лэн куно пумитан азбарез доры вуыса. Пырон азьын дано землякъёссылэн туспуктэмъёссы. Соос пӧлын — артистъёс Геннадий Ганьков, Светлана Смагина («Айкайысь» валтӥсь солистка), тодосчи но писатель Анатолий Уваров но мукетъёсыз. «Родина» хозяйство (Сям-Какси гурт) утялтӥз «Удмурт Кенешез», журналистъёсты, учёнойёсты, УдГУ-ысь дышетӥсьёсты.

Ми но татчы кугӟам. Оломар дуннее вуылӥськиз. Али но музъем вылэ лэзиськыны ум быгатӥське. «Родиналэн» кивалтӥсез Вячеслав Михайлович Максимов азбарысьтыз ӧз кошкылы, котькудӥзлы пырем муртлы саклык висъяз. Сыӵе йӧно, чылкыт, шырыт сюлэмо, йыгмыт воргорон. Нош калыкез кырӟаса утялтӥзы артистъёсыз. Шулдыр кырӟамез кылыса, кин гинэ ӧз кожа татчы. Ваньмызлы утялскон шедьтӥзы. Али но ым пушкын зыретэн табаньлэн, выль шыдлэн шӧмзы.

Али но син шорын азбарлэн пушкыз. Макем кибашлы киос луыны кулэ таӵе киужъёс лэсьтыны! Тӧр сэрегын мудор, со котыртэмын чебер чильпам дуро, пужъятэм ӵушконъёсын. Борддор карыса, ошылэмын киужъёс. Учкыса синъёс мальдо.

Тау тӥледлы, алнашъёс! Нимысьтыз синмаським Вячеслав Михайловичлы но сям-каксиослы. Тамында калыкез утялтэмды понна дурен мед берыктоз Инмар.

Евгения Измайлова
Туспуктэмез: udmfoto.ru

Удмурт Дунне
By Удмурт Дунне 9 июля, 2013 11:15
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<