«Престижлы» оско: котьку ӟеч лэсьтоз

Удмурт Дунне
By Удмурт Дунне Июль 5, 2013 12:51

«Престижлы» оско: котьку ӟеч лэсьтоз

А. Наймушин

А. Наймушин

Ува ёросын ужбергатонэн вырись огазеяськонъёс пӧлысь одӥгез устоез луэ «Престиж». Та огазеяськон егит ке но, лэсьтӥськон удысын 5 арскын ассэ туж умоен возьматӥз. Солы оско, ноку, пе, возьытэ уз вутты, юртъёссэ оскымон, дыраз но ӟеч-ӟеч лэсьтоз. Вакчи дыр куспын ужаны вуиз ни Воткаын, Эгра но Балезино ёросъёсын.

«Престижен» нырысетӥ нуналъёсысеныз ик кивалтэ, валтӥсь директор луэ Алексей Наймушин.

— Алексей Валентинович, котькытын сямен ик, лэсьтӥськон удысын но конкуренция кужмоя. Кызьы дӥсьтӥды выль уж борды кутскыны?

— Рынокен экономикае ужаны выжим бере, конкуренция котькытын луыны кулэ, озьы ик лэсьтӥськон удысын но. Лэсьтӥськон уг яраты азьтэмъёсты. Соин ик милям нырысетӥ куронмы — ваньмыз вуттэмын луыны кулэ ӟеч но дыраз. Ушъяськемлы медаз пӧрмы, но милем юнме шорысь ӧз оске Уваын XXI гужем Гурт шудонъёслы дасяськонэз. Туэ февральлэн пумаз та бордын ужаны ӧдъямы но вакчи дыр куспын пуктӥмы туж чебер спортзал, туала куронъёсъя стадион но мукетсэ. Ужаммес учкыны ветлӥз Удмуртилэн Президентэз Александр Волков но умой дунъет сётӥз. Со милесьтым мылкыдмес ӝутӥз азьланьын уката ӟечгес ужаны.

Мастер А. Соловьёв, лэсьтӥськонъя участокен кивалтӥсь Н. Митяшин

Мастер А. Соловьёв, лэсьтӥськонъя участокен кивалтӥсь Н. Митяшин

Ми пыриськом шоро-куспо ужбергатӥсьёс пӧлы. Коллективмы огкадьгес, 200 мурт возиське. Ялан юнматӥськом материальной базамес. Али 60-лэсь уно пӧртэм пумо техникамы. Та удысэз огазеяськон кылдэм дырысен туж валаса нуэ Виктор Иванов. Нош лэсьтӥськон ёз оскемын Николай Митяшинлы. Валтӥсь инженермы Александр Наймушин ужзэ ӟеч тодэ. Бетон асьмеос лэсьтӥськом, раствор узелмы умой ужа. Мастерез Вячеслав Шишкин. Металлоконструкциосъя мастер Андрей Соловьёв куинетӥ арзэ дорамы тырше. Со ужамын Москваын, Сибирьын, пыриськемын Байконурез, Саяно-Шушенской ГЭС дорысь алюминий поттонъя заводэз лэсьтонэ. Таӵе ужасьёсмы но кибашлыосмы ванен, кулэ луиз ке, котькыӵе ужез йылаз-пумаз вуттом. Милям асьмелэн пилорамамы, столяркамы. Мукет сямен вераса, ми нокинлэсь кураськыса ум улӥське.

Мастер В. Кононов, директор А. Наймушин

Мастер В. Кононов, директор А. Наймушин

— Эшшо кытын ужаськоды но азьланезлы малпанъёсты бадӟымесь-а?

— Али ми Нылга черкогуртын нылпи сад ӝутӥськом. Сое 15-тӥ августозь вуттыны чакласьком. Отчы 90 нылпи ветлоз. Соин ӵош ик юн кусып возиськом «Увадрев-Холдинг» но «Увамолоко» огазеяськонъёсын. Соослэсь но куронъёссэс быдэсъяськом, лэсьтӥськон нуиськом. Гурт шудонъёс ортчизы ке, рос-прос басьтӥськом «Престиж» вуз карон центр пуктон борды. Ужтэк ум пуке, заказъёсмы вань. Ужасьёсмы умой уждун басьто, котькудӥз мылысь-кыдысь тырше, палэнэ кошкон сярысь уг малпаськы.

— Алексей Валентинович, ужъёсты котькуд ёзын умой мыно, кулэезъя радъямын, нош кызьы шутэтскиськоды?

— Тазэ но ум вунэтӥське. Пушкино бырем гурт доры 3 тымет лэсьтӥм, Уваысен 17 иськем луоз. Отчы мунчо пуктӥм. Умой шутэтскон инты пӧрмиз. Чорыганы но, пӧйшураны но луэ. Дыр гинэ шедьтоно. Ачим но ваньмон дырме отын ортчытӥсько. 11 аресъем Артём пие но 5 аресъем Аня нылы гужем отысь ӧй ик кошкылысалзы. Сыӵе чебер, шулдыр инты.

— Куамын аресады тӥ ужбергатӥсь, 200 муртлы кузё луиды. Секыт-а ныпъетты?

— Капчи ӧй шуысал. Ӵукна 5 часэ султӥсько, 6 часэ пичи кенеш-планёрка ортчытӥсько. Ӝытазе 7-8 часозь но ужано луэ. Кузпалы чида ни. Коллективамы одӥг ньыльмосэз нылкышноос ужало, егитъёсмы ичигес на. Специалистъёс ласянь но шугъяськонъёс кылдыло. Но секытэзлы ӝожтӥськисьёс ӧвӧл. Калыкмы лулысь-сюлмысь тырше. Соин ик азьланьын уката тросгес ӟеч юртъёс пуктэм потэ. Котькудӥз сыӵе мылкыдын ӵукна ужаз лыктэ.

Геннадий Романов
Туспуктэмез: udmfoto.ru

Удмурт Дунне
By Удмурт Дунне Июль 5, 2013 12:51
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<