«Мыным али ке но уг тырмо поэтъёс…»

Удмурт Дунне
By Удмурт Дунне 19 июля, 2013 09:41

«Мыным али ке но уг тырмо поэтъёс…»

Владимир Романов кылбурчилы 1-тӥ августэ тырмысал 70 арес

Та Кылбурчи чебер адями, туж учкымон воргорон вал — чылкыт тусо, югдӥсь синмо. Пӧртэм дыръёссэ мон солэсь адӟылӥ, но котьку синмаськылӥ сайкыт, йӧно тусбуезлы. Кыӵе данъяськылӥ соин артэ вамышъяны ӟеч вакытъёсаз, нош кыӵе нискетӥз сюлэм, кучапилэн музэн, секыт вакытъёсаз — валамтэен, кызьы юрттоно талы…

Сыӵе ик чеберен гинэ со кылиз ваньзылэн сое валась яке валалляны тыршисьёслэн тодэ ваёнъёсазы — туж оскеме потэ. Сомындалы кылиз, кӧня кылдоз сое аслазэн карисьёслы улыны. Соос трос ке но ӧвӧл, но соос вань, луозы азьланяз. Дасэн-а, сюэн-а гинэ но коть… Соос — удмурт кыллэн-бурлэн омыреныз шокась-улӥсь муртъёс, сотэк ӝокасьёс… Соос, кинъёс казна чотын гинэ уг ужало удмурт ӧрын, но нырысь ик — лулзы куремъя. Соос, кинъёс удмуртлыкмы пушкысь сюресъёс вылын асьсэлы быгато чурытэсь куронъёс пуктыны, мукетъёсыз вылэ чӧлскылытэк. Соос пӧлын, туж валамон ини луэ, уг адскыло коньдон пӧлын уясьёсыз, кивалтӥсьёс вискын гужласьёсыз. Тыр кӧтъёслэн — асьсэ «кылбуръёссы», нош калыклэн кылбурчиез — аслаз. Сыӵе муртэз, чебер адямиез, Владимир Романов кылбурчиез тодэ вайыса, кылдо кагаз вылам та чуръёсы.

Владимир Васильевич улэп дыръя но, улонысь кошкемез бере укатагес ик мон трос кылылӥ сое курласьёсты. Но со «визьматӥсьёслэн» огез но жоб кылзы ӧз пӧрмытскы огезлы но гожезлы Кылбурчилэн зэмос портрет вылаз, кудзэ мон ачим аслым суредай но пушкам кельтӥ даурелы. Яркытэн, шунытэн, югытэн кылиз Владимир Романовлэн тусыз мон азям. Кылбурчилэн, кудзэ ачиз ик Инмармы но, дыр, кузьмаз вал ас шырытэзъя калыкмылы, но со кузьымез туж ичиез санэзъя-данэзъя валазы, кемызъя дунъязы. Озьы ини луэ: дунтэк шедемезлы, инмысь усемезлы со шедемлэн ышем бераз гинэ ӧпкельыло угось…

Кызьы вазен дырысь выжыосмес вунэтӥськом, озьы ик анлатэк кельтылӥськом со выжыосын кылдытэм емышъёсты. Озьы бӧрдо, курекъяло удмурт нюлэсъёсмы, собере — куасьмо… Нош ойдолэ пыром ай мурегес, адӟом яратонэн тымем синзэ, кылом мырдэм гинэ жильыртэмзэ… кыло-буро ошмесмылэсь. Солэн вуэз ноку уг сылы интыяз, чылкыт кужымзэ усьтэм сузьёсмылы со ӵектэ.

В. Романов

В. Романов

* * *
Петыр Васьлей Лади, кызьы сое нималлязы вордскем гуртаз, Бигер шаерысь Бавлы ёросысь Удмурт Ташлыын, ӧз яратылы вылӥ кылъёсты, соя — «пычкиськыса визьмооссэ», вераськоназ но, гожъяськоназ но. Буш кылэз ӧз яраты, туж гажалляз тырозэ: со мед луоз валамон, оскымон, пайдаё. Вераме потэ, улонам мон ньыль муртэ гинэ пумиталляй сыӵе но сыӵе, ява, удмурт кылмес сак кылӥсь-шӧдӥсьёсты: лулынызы-вирынызы, шуэмъя. Соос вал туж кужмо специалистъёс, туж гажаса тупатъязы музонъёслэсь но гожтэмъёссэс… Пӧлазы — Василий Григорьевич Широбоков, милям ВасГригмы; Михаил Иванович Федотов — Мусурманмы; Семён Андреевич Перевощиков — милям СемПермы но Владимир Васильевич Романов, со ик ВладиВас, со ик Каймасты, со ик Баулы, куддыр — Рюминов… Та адямиос, кыр пӧйшуръёс сямен, кыдёкысен, лул зынъя шӧдылӥзы зэмос удмурт кылэз. Ваньзы соос кылбурчиос вал, пӧлысьтызы Василий Широбоков гинэ прозаен гожъяськиз. Табере сыӵеос ӧвӧл… Али дыре та мискинь удмурт кылмес узырмытыса-узырмытыса воксё но быдто ини. Но кылизы ук Инмарен вешалтэм гожъясьёсмылэн, таланто кылбурчиосмылэн шырыт синпелетъёс чотын книгаоссы, соос уз кошке ни дорысьтымы. Ойдолэ ук со книгаосты бордамы матэгес карылом! Озьы гинэ ӟечгес, оло, кылом та дуннеысь удмурт куараосты…

Тодам вайисько, куке Владимир Васильевич, кинлэсь ке ляб кылбурзэ, шакрес гожтэмзэ лыдӟыса потэ ке, шуылэ вал:
— Э-э, таидлэн пельыз секыт, киыз — тӧло… Э-э, мискине-куанере…
— Володя, — ӧй чида мон юатэк огполаз, — нош луэ-а кылэз дышыны кылыны, сое шӧдыны? Поэт кабын…
— Кылбурчилы уг лу дышетскыны, кулэ кыллы уг луы дышыны, дышетскыны, — лулӟем кариз со, — маиз вань — соиз вань, нош вӧзаз уд ватса ни… Сари ужпи ас мылкыдызъя уз кариськы кельыт… Адямиос, мушъёс сямен, вордско асьсэ удыссылы: огез — мӧль бича, мукетыз — кунгожъёсты уте, куинетӥез нош — воксё узыри… Мӧзмыт ук луысал, ваньмыз ке поэтъёс кариськысалзы. Соку ваньзы но Пушкинын ветлысалзы, кытчы гинэ ӧд учкы — Пушкин, Пушкин, Пушкин…
— Яке Романов, — шонертӥ мон сое каньылак.
— Хм, — кариз со, — востэм сямыя ӝотрак пумит луыны та верамедлы, марым, уггес дӥсьтӥськы. Но таӵе мур темаез быдэскынзэ адӟыны но валаны суртэк уг лу… Мынӥм. Ато мон черод кельтӥ вал отчы… Да и Федот Миша но вуиз ни, дыр… Ато со вань сур барез кӧсатоз…
— Сюрес сярысь одӥг поэт тазьы гожъяз, — ватсай на мон, ӧс вискытӥ потыкумы. (Володьлэн кӧт пичи ӧвӧл, кыкен шуак уд поты ӧсэтӥ — мырӟиськоно луэ. Дыг но мог!)
Кытчы ке но ӧте
кузь сюрес.
Гурт пумын ик гома
горд шупу.
Со доры огшаплы
дугдыку,
Сюлэме ик усе гизьыез…
(В. Романов)
— Умой ик ведь гожтэм албастыед! — гор-гор серектӥз Владимир Васильевич.

* * *
Владимир Васильевич туж яратэ вал мынам вордскем гуртам, Дэри ёросысь Виль Каӟмасам, ветлыны. Ижкарлы — матын, аэропорт дорысь — ог 5 иськем… Сюрес — лякыт. Вылаз ик верано на, Романов кӧс бурдо вакытаз туж быгатэ вал адямиосын кусып радъяны, быгатэ вал ортчыт кельшыны. Сыӵе ӟеч вапумаз ик мон сое нырысьсэ нуи вордскем гуртам, сэре ни солы сюрес лёгиськиз Виль Каӟмасам. Ваньзы солы гуртам синмаськыса ик быризы, ява. Визьмо (школаез зарни медален быдтэмын), кыло-буро, ассэ ӝикыт возе — сапрес ӧвӧл. Володь со вие «кӧсгес» улылӥз, вож кыйзэ мурӝолаз улляз. Ӵемысь ветлӥм Виль Каӟмасам кык кузя, шергес — куинен (вӧзамы Миша Федотов луылӥз — ваньмылӥз ке), нош сэре — нош ик кыкен (Володя Романовтэк ини). Нош армиын дыръям Владимир Васильевич анае доры юртъя-еръя юрттӥськыны вуылӥз. Кытӥ воргоронъёсын пу ворттӥзы нюлэскысь, кытӥ турын вайылӥзы, куддыр юон дыре шедьылӥз…

— Тон, Володь, пие, татчы ас гуртад кадь бертылы, — шуылӥз солы мынам анае, Афанасья Фёдоровна, гурт сямъя Дыды апай, Дыды ӵужодӥг, Дыды кума… Володь син азьын ик шуналляз та кылъёслэсь но, пуш тыремзэ ватыса, кызэм карылӥз, нош анай, мукет пала берытскыса, соку ик Федотовен но монэн кивалтыны кутскылӥз, сержант мактал…
— Так, Педотовлы — кусо, яръёс картошка копанэз ӟечгес тодо, уг сэмберъясько мульыосты мурысь копышъяны… Нош тон, — таиз ини мыным, — лопаткаосты нуод! Пельпум тынад кужмо, соин ик — азьлань!
— Нош тӥ, Романов эш, мае нуоды? — юасько.
— Самой секытсэ — сюлмысьтым малпанъёсме, — нырзэ чатыртылӥз эшмы, — ваньзы понна малпаськоно, куректоно луэ мыным: изён — ӧвӧл, сиён ыме уг пыр… А тӥледлы нош весь капчиез гинэ шеде — турнаны да лопатка нуллыны… Созэ-то ведь шузиез но быгатэ… А вот бадӟым малпаськонэз нуыны… Таиз не вщакоезлы сётэмын!

Тӥни озьы мынӥськом ини картош кесэг пала. Мон — куинь-ньыль лопатъёсын, Миша — кусоосын, саникен, Володь — мурлэсь но мур малпаськонэн, Муско азьын Наполеонлэн кадь тусын — керӟег адске. Со, пе, али малпа, кызьы Сатурн котырысь спутникъёслэн бергамзыя луэ удмурт ямбез шонертыны, чылкыт чузъятыны. Секыт малпан, ужпум — капчи ӧвӧл…

Ужмес вис карыса, таман вакытэ, пукиськом ни милям бакча шорысьтымы куинь (азьло ньыль вал) ба-а-адӟымесь кызьпуосмы улын. Ӝамай, угось. Анай пӧзьтэм курег ваем, огреч но помидор, вӧзаз — векчи виятэмзэ. Ӧжыт гинэ. Анае соиз ласянь ӝотрес вал: кабакез, пе, мертэто медло… Кабакез но винаез. Со весь индылӥз, туйылӥз: «Мултэс вина ворӟон — мултэс куректон».

Сием-юэм бӧрсьы шутэтскыны выдӥськом ожо вылэ — гаӵоло. Куазь — чебер, шундыё, лыз инмын тӧдьы пилемъёс дыртыло, тӧлыз — ыралэс ке но, уг на юзматы. Нясь-нясь югыт дуннеын!
— А ведь насколько же китроесь со кык Иосифъёс, — шуак вера Владимир Васильевич.
— Ивановен Бобров-а? — мылпотытэк выжыятэ Миша Федотов. Синъёс солэн кынемын, кӧт — тыр, вырем уг пот.
— Соос.
— Марлы? — таре мон юасько.
— Соос юри уло Удмуртилэн лымшораз, а ведь Алнашын-то картошсэс октыса быдтӥзы ни, нош асьмелэн — эшшо ӝыны бакча, — лулскем каре Романовмы.
Ми, соглаш луыса, йыръёсмес сэзъяськом: озьы, озьы…

Картошмес копанъямы ми доры бускель лыктэ. Со — ӝужыт мугоро, учкымон воргорон, Дэриын РОС-ын шофёрын, лэся, ужа. Туннэ бускель кӧня ке капчиямын. Шол-пол гинэ матэктэ Владимир Васильевич доры но, юромо лек кариськыса, юа:

— Тон Романов-а?
— Марым… Романов, иське, — шуэ соиз.
— А мон тынэсьтыд ведь вочаксэ романъёстэ лыдӟи. Вот так вот, ява, эшко!
— Туж умой, — вӧям табань кадь пальпотэ соиз.
— Слушай, югдур, значица, таӵе: кышно — ужын, настойкаез — гулбечын. Тон ойдо сьӧрам, оген уг лу… Фонарикен югдытод, нош мон утчасько.

Син куспын таос ышо. Ми доры вуо, ог часэн ятырен ортчыса, кыкназы ни шадраесь, шулдыресь… Эшъёс сямен бакча тыр лабырто, мар ке горо куспазы, ӝоген дуэт кисьматозы. Ми нош картош копаськом…

— Афанасья Фёдоровна ӧз вуылы-а? — шугъяське Володя.
— Ӧз… Но мон солы тон вылэ чагисько, кызьы тон ужысь пегаськод — аморально! — кышкатэм карыса, ӝотрак шуэ солы Миша.
— А мон шуо солы: Миша, пӧй, ыстӥз монэ, Федотов, бускельлы юрттыны. Так что, мотри, ява… Астэ шараяло!

Огшап ченгешыса, ми нош ик чуръёсмес азинтӥськом. Миша люко картош пуд борды берыныз мырӟиське но со улысь пияла банка шедьтэ — тыро.

— Нош таиз мар? — ортчыт пайме со.
— А тон кожад лудкеч салам? — шораз кескич учке Володь. Али со кисьтэм-басьтэм укша Швейк солдатлы — валамтэ улэ кариське.
— Кожай но, дыр… но кызьы ай меда со лудкечлэн нимыз? — юа ини Миша.
— Вот ведь таин! Ма бускель ук кельтӥз сое асьмелы — бускель салам. Нош мон сюрприз понна сое тынад чурад понӥ. Ойдо, пӧй, мед та куанер егит кылбурчиос но пичияк шумпотозы та мӧзмыт Инсьӧрын… Аллилуйя!

Бускель саламез кельтӥсь-ком ӝыт мунчо берелы. Володь одно ик дегустация каре — ярамон, пе. Гучыкъёс солэн, конешно, пичиесь ӧй вал. Милямъёсыз — пичиесьгес, но — ӵемысьгес.

Яратӥзы Владимир Васильевичез мынам гуртам. Куддыраз со одӥг нуналскын вуылӥз дорамы но, бускельёс дорын но мунчое пырыны… Ваньзылы со шедьтылӥз задор мылкыдо кыл, ваньзэс тодӥз нимъёссыя. Келяськыкуз анай одно ик солы саламъёс лэзьялляз, бадӟым сумкаяз тырылӥз. Ӵемгес, гуртысь столовойлэн кивалтӥсез бере, сӥль. Угось сое басьтон гуртын трослы вал дунтэмгес, город дунэн ӵошатыса.

— Володь, сӥльдэ гуртад, квартираяд ик вутты, ява, — индылӥз солы анай, — ато огнад улса, сиён, но, дыр, уд пӧраськы. Тон бадӟым каструле шыд пӧзьты та сӥлен, тыныд арнялы тырмоз, пӧсятод но сиёд, кылемзэ холодильникад возь.
— А та пиосты мон дорам но уг лэзьы, — дан поттэ, мынчыръяське ини Романовмы, ми шоры чиньыеныз возьматыса, — ато соос, Фёдоровна, вань сӥльме сиёзы, тау но уз шуэ, курокъёс! Тодско мон соосты!..
Владимир Васильевичлэн гадь урдэмын, солы сюресвыл чарка сёто. Урамын машина пипкетэ ини — анай кинэ ке ӧтем кунооссэ келяны.
— Володь, таки ведь вунэтско юаны… Мар ай тон огнад улӥськод? — юа анае. — Кытчы пыриз кышномуртэд?
— Кудӥз? — гольтыръяське Володь.
— Кудды-о ог-огдэс улляды? — анай уг лэзиськы юанэзлэсь.
— Взаимно! — вера Володь, сылалтэм огречез куаӵ куртчонъяз.
— Маиз ӧз кельшы?
— Кукъёсыз кожоесь луизы, — Володь ымдурзэ саесэныз ӵушалтэ.
— Ма тон но соку… кожа ук вал… кытчы ке…, — серекъя ни анай.
— Уг бы-га-тӥсь-кы! Мон честной ук! — таре Володь, быдэс зуркаса, ачиз горе ини.
Сэре ми машинае, «газик»-а, «уазик»-а каде, пуксиськом но Иж пала вырӟиськом.
— Учкы ай, — возьматэ мыным Владимир Васильевич, — бакча бер кенеред куашканы ни шӧта… Мукетъяз вуыкумы, одно ик сое асьмелы тупатъяно — кенерез, пӧй… Валад-а, Миша?
— Валай. Но нырысь ик тонэ тӥр кияд кутыны дышетоно луоз, — меӵкытэ соиз, пельпумзэ зуркатыса — сыӵе сямыз.
— Тӥр кутыны, кӧня верасько ини, шузиез но быгатоз, нош ужез визьмын, валаса радъяны — соиз ини мынам курадӟонэ…
Ми Мишаен ог-огмы шоры мыр-мыр учкиськом но валаськом: кенер тупатъян усе ми вылэ, кыкнамы вылэ…
— А-эх! Умой ик та Виль Каӟмасын! — шуак гудыртэ машина тыр Володь, — Ӟизми ульчаысен Чербаетӥ ми мынӥськом, ваньзэс ӟеч мылкыдын веськатӥськом!
Ми чус гинэ соглаш луиськом соин… Ойдо мед эркияськоз!

Владимир Романовен эшъяськыны шулдыр вал. Со вал ӟеч эш. Весь мар ке но выльзэ шедьтылӥз, мае ке но тодмотэмзэ мадьылӥз, пӧртэм учыръёсы шедьылӥз (ӵемысь ми но соин ӵош): уродъёсаз но, умойёсаз но. Соин артэ ноку но уг сюры вал дыр мольк гинэ пукыны, нырез ошыса. Макмыр дыръя коньдон шедьтон но соин пӧрмылӥз быдэс проектлы, кампаниялы, ожмаськонлы…

* * *
Нош литератураез со кадь ӟеч тодӥсь адямиез мон, со вие егит автор ай, нокытысь ӧй пумиталля. Редакциосын но, университетын но… Володя удмурт литератураез гинэ тодонэн ӧз буйгалля, со ужан бакчаяз дунне литературае но кысказ. Тодам вайисько, кыӵе синмаськыса со лулӟылӥз, испан кылбурчиез Гарсиа Лоркаез лыдӟыса, солэсь творчествозэ, улон сюрессэ лорковед кадь ӟеч тодӥз. Лыдӟылӥз но сэре ватсалляз:

— Эх, вот дугдо ай юэмысь, патерме йӧнала радъяло, сэре одно ик испан кылэз дышето! Уг жаля улонысьтым ӝыны арме!

Кылъёс солы сётскылӥзы шугъяськытэк, озьы мыным адскиз. Удмуртсэ, ӟучсэ тодэм сяна, со валаз бигер но немец кылъёсты. Армиын службазэ ортчытӥз ГДР-ын, связь ёзэтын радиоперехватчик луыса — ФРГ-ысь немец кылын кулэ ивор люкаса. Нош лӧптэмгес дыръяз Владимир Васильевич фронтын бырем чуваш атаезлэн но кылыныз вераськонэ шугъяськытэк выжылӥз. Ми соин чуваш кылын задор кырӟанэз но уртче кырӟаллямы ӝӧк сьӧрын — солэн дышетэмез.

— Нӥмдэ! Нӥмдэ! — йыркуръяськыкуз со чуваш сямен кеськылоз вал. Удмурт сямен — номыр, номырлы.

Романовен тодмо луэм вакытысенымы но солэн Хохряки шайвылын буйгатскытозяз, со кадь тодмо кылбурчиос асьме шаерамы ӧй вал но кадь. Кӧня ке ар сое ӧз печатлалэ (яке шер но псевдоним улсын, шуом, Юрасов) Ижкарысь газет-журналъёсын, со сярысь ӧй вал лэземын вераны радиоын но телевидениын. Но Москваысь, Ленинградысь, музон бадӟым городъёсысь изданиос сое печатлазы ӟеч мылкыдын, тодмо берыктӥсьёс курылӥзы гожъямъёссэ. Вылаз ик, Россилэн тросаз областьёсаз но ваньмаз ик, оло, республикаосын солэн ни вал оскымонэсь юлтошъёсыз. Тросэныз соосын Володя ас дыраз тодматскиз поэтъёслэн Всесоюзной фестивальёсазы (Москва, Горький, Ереван, Пермь, Астрахань, Чебоксары…) но странаысьтымы гожъяськисьёслэн мукет бадӟым сэбедъёсазы. Со эшъёсыз, асьсэ шаеръёсазы тодмо адямиос, ӧз куштылэ Романовез, кылбуръёссэ асьсэ кылэ берыктылӥзы, печатлазы сое — мылкыдзэ ӝутъязы. Соос пӧлын Татарстанысь калык кылбурчи Роберт Миннуллин, Азербайджанысь калык кылбурчи Сабир-бей Рустамханлы, Чувашиысь Атнер Хузангай но трос мукетъёсыз. Тау ваньзылы соослы.

Нош сьӧд пилемъёс Романовлэн йыр вадьсаз ялан напчылӥзы — лекен, умойтэмен. Соос ӧз сэраське кулытозяз. Солы укыр вожъяськизы бурдтэмъёс, шуныт каръёсын пукисьёс. Кин, пе, мар, пе, со исьникут… Ветлэ, кӧтсэ мычыса Иж урамтӥ, кылыз ӵемысь быгыльмемын, бордысьтыз «Шипр» зын уг лӧсъяськы — бургыез мукет, нош вера ке — синме ик меӵкытэ. Гыжкалэз шуэ гыжкал, лушкаськисез — лушкаськись, шузизэ — шузи… Ӧз яратэ домблёосыз кивалтӥсьёс Романовез. Марлы меда сокем? Поэт туж лек серекъялляз соосты — номыр но пумит вераны луонтэм, нош тазэ уг чида одӥгез но кивалтӥсь — векчиез но, пичиез но…

Ӧз тыршылы Володь «визьмаськыны», кызьы шуо, калык сямен йӧскадь улыны. Со вамышъяз, тыршиз вамышъяны, аслаз сюрестӥз. Со сюресаз ик трос гинэ шуг-секытэз куддыр аслыз ачиз ик кылдытъяз, но со уг быгат вал, ӧй вал со вордскемын мукет улон-вылон понна, ассэ мукет карыны. Соку со ӧй луысал ни Владимир Романов — зэмос, бадӟым поэт. Оскымон адӟисьёс верало: огпол Романовез «пыжыны» ӧтем обкомысь огез секретарь. Владимир Романов солэсь «визьнодамзэ» ӧвӧл кылзэм пумозяз, султэм но кошкыкуз шуэм:

— Мон канаваын ке но кылли, ортчись муртъёс тодмалозы, нош тонэныд, ӵуказе татысь ке уллязы, ӟечбуръяськись но уз шедь.
Озьы ик луэм.
— Уг удалты мыным тушмонъёсын, — мӧзмыт пальпотылӥз Володь, — ваньмыз соос чиндыр-вандыресь но пакисесь. Вань кужымзы — чибинь уллё. Лушкем юо вирез, но туж тросэн…
Ӧм малпаське. Малы малпаськонэз!
Котьку югыт, кожам, луоз сюрес.
Кожам, капчи тӧдьы пужы ноку
Уз шуна. Уз. Ноку уз лу синву…
(В. Романов)

* * *
Владимир Романов улонысь шуак кошкиз 46 аресказ. Ӧз кошкы… Лек адӟон сое порыштӥз улонысь… Акар сильтӧл погыртӥз сое пыд йылысьтыз. Берло дыре солэн ужъёсыз но тупатско ни вал — выль книгаосыз потаны кутскизы, выль семья но кылдытӥз — кельшымон, ярамон. Но…

Романов кулэм бере мон, еж маке, малпалляй, таре ваньмыз воштӥськоз. Адямиос, шайвылын синвуосын выльдӥськыса, мисьтӥськыса, валалозы, оло, таре, кинэ ыштӥзы. Соос таре мукетэсь луозы, анай кылзэс юнгес гажалозы, йырзэс ӝутозы, асьсэ поэтъёссэс бурдъялозы, ӟечен дунъялозы — ведь ичи соос. Ой, туж ичи… Зэмосъёсыз… Номыр ӧз воштӥськы, нокин мукет ӧз лу. Выль вакыт вуэмен, лул-сюлэм чылкытэз но сереме-мыскылэ каризы… Ӧз быгаты ни бурд вылаз выльысь ӝутскыны Владимир Романовлэсь чӧлтэмзэ азинтӥсь кылбурчи Михаил Федотов, юг кылчинэн пусъем йӧно бесерман адями. Ӧз чида со эшезлэн кошкемезлэсь вӧсьсэ. Кылбурчиос озьы ик кылизы — чол огназы, кулэ луисьтэмен. «Шакрес пусэн пусйылэмъёс», шуылоз вал Михаил Федотов.

Тодам вайисько, огпол Горький нимо парклэн одӥгез лапасэз улын пукимы. Владимир Васильевичлэн кулонэз дорозь кылемын на вылэм одӥг ар. Со соку етӥз тусо, ӝутскем мылкыдо вал. Куаӵ-куаӵ сиським но юим, макмырозь вуонтэм.

— Володь, — юасько, — тон 1-тӥ августэ вордскид. Кылем арын вордскем нуналдэ кызьы пусйид, уг тодӥськы, сюрес вылын вал мон.
— Ӧйтӧд, — шонскиз со, — ӧй но шӧды кадь… Но наверняка пусйи ик, дыр…

Сэре вераськонмы, литератураысь потыса, вуиз нылкышноос доры. Озьы ни луылэ шутэтскись пиосмуртъёс пӧлын…

— Мон уг тодскы огзэ но йӧнала удмурт поэтэз, писателез, шуом, гожъяськисез, кудӥзлы кышноен мед удалтоз, — шуиз Володя, — нокудӥзлы но ӧз шедь сыӵеез, кудӥз сое лулвизьмыныз кылбур инбамъёсы мед ӝуткасал… Кузебай Гердлы но ӧз удалты бере со купеч нылыныз, мукетъёслы-а, пе, шуд усёз… Соин ик гердмемын асьме литературамы. Кылбурчиосмы но вань кадь, нош Муза шуонзы артэ ӧвӧл. Паймод, удмурт нылкышно ӟеч кышно луэ тросэзлы — ушъясез вань, но поэтлы — уг. Марлы? Оло, со муген: кинэз-о быгатоз кык дуннеын улӥсь муртэн улыны? Яратӥсез гинэ, шат. Яке соин-а: кылбурчилэсь уг пӧрмы юрт возись…
— Ну, озьы ке шуоно, — дышем сямъя мон солы эчешон ӵектӥ, — пиосъёс но асьмелэн ӧвӧл ук зарниесь.
— Егит эше, — нод-нод вераз соку Володь, — яратонэз, пе, Инмар котькудӥзлы огпол гинэ сётэ. Нош асьмеос ум валаське сое, кожаськомы, мурт гуртъёсын уло эшшо но чебергес нылкышноос.
— А-а, тон нош ик тодад, дыр, вайид егит дырысьтыд Сания нимозэ, Бавлы палысьтыд…Кильтырак гинэ шуоно кожай, тодћсь кариськыса.
— Ойдолэ, пиосы, мукет сярысь вераськом, — шокыштћз Романов.
Соку ми кема лабыртӥмы. Ми — куинь кузя, ньылетӥез — Мӧзмон. Ваньмыз сярысь, но уката ортчем нунал сярысь, ыштэм луонлыкъёс сярысь, вуонозэ бусысь адӟытэк.

* * *
Вань ужъёс мытӥсько кыл бордысен. Калык лулэз югыт инме ӧтё, ӝуто кылбурчиос, анай кылын ӟечлык понна вӧсяськисьёс, калык лулэз чылкыт карисьёс. Сыӵеос пӧлын Владимир Романов но…

Туннэ кылбурчиосмы удмурт сюрес вылысь туж палэнэ донгытэмын. Соос мегдомемын ёрмон, висён но курадњон, куашкам малпан но чигем мылкыд пќлын — зэмосъёсыз. Соос кылемын ас кожазы. Соос уг быгато бурдъятыны калыкмылэсь пуксем мылкыдзэ. Нокин юрттымтэен, бадњым ужзы љегатэмын, кылбур визылъёссы њоскатэмын…

Вячеслав Ар-Серги, Удмуртиысь калык писатель

Удмурт Дунне
By Удмурт Дунне 19 июля, 2013 09:41
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<