«Мон узыр басьяськисьёсын»

Удмурт Дунне
By Удмурт Дунне Июль 25, 2013 14:47

«Мон узыр басьяськисьёсын»

Ужбергатӥсь Г. Алексеев

Ужбергатӥсь Г. Алексеев

Пичи Пурга черкогуртысь Советской урамлэн пумаз интыяськемын Георгий Алексеев ужбергатӥсьлэн магазинэз но складъёсыз.

— Георгий Леонидович, асьтэдыз узыр ужбергатӥсен лыдъяны быгатӥськоды-а?

— Магазинэз усьтон понна нырысь ик отчы товар басьтыны кулэ. Лавка буш луиз ке, басьяськисьёсты кызьы бордад кыскод? Товарлэн ӟечлыкез мед луоз. Со понна олокыӵе но амалъёс утчай. Нырысь-валысь товар нуллыны машинаос басьтӥ. Со ужез нокызьы но огнад уд вормы, шофёръёсты кутоно луиз. Вуз карись но удыссэ огназ нуыны шугомоз, магазинын сяна, складын но ужась кулэ. Огпалась мукет пала кӧня бызьылоно луэ. Вуз карисьёс вӧзы кулэ луизы кладовщикъёс, соос вӧзы — бухгалтеръёс. Со сяна, милям 3 усточи воргоронъёсмы вань: водопровод но, газ гумыосты но кыско, тыл но пырто, сантехникаез но инъяло. Музъемез но асьсэос ик гудыса сёто. Лэсьтӥськисьёсмылэн бригадазы быдэс ёросэтӥ ветлэ, коркаос ӝутыса, ма, кинлы мар кулэ, сое ик лэсьтыса сёто соос. Ми асьмеос ик мунчо гур но, корт капка но, туалет но, пыласькон кабинаос но лэсьтӥськом — ваньзэ дасяк. Со бордын быгатыса тыршо сварщикъёсмы. Милемлы удалтӥз: дорамы ужаны лыктӥз Кунгурын художественной училищеын дышетскем Александр Тимофеев. Вераны луонтэм кибашлы со. Кортэз чеберъяса, оломар но лэсьтыны быгатэ. Трос адямиос со доры вазисько.

Кортэз чеберъя А. Тимофеев

Кортэз чеберъя А. Тимофеев

Вань милям асьмелэн программистмы — Юрий Дмитриев. Смета лэсьтыны дышетскыны ми сое алигес юромо Иже келяллямы.
Узырлык ласянь ке вераськон поттоно, ачим сярысь шуисько: мон узыр басьяськисьёсыным.

— Кинъёс ӵемгес тӥ дорысь октӥсько?

— Одӥгъёсызгес ми доры ветло, товарды кельше, шуо. Пургаос сяна, ӵемысь дорамы вуо Татарстанысь Огырчи городысь, Дэри, Кияса но Можга ёросъёсысь. Соослэсь уно заказъёс вуо, куд-ог дыръя ваньзэ быдэстыны но ум вуиське. Конечно, гужемзэ адями умойгес октӥське, лэсьтӥськон материалъёс но ӟечгес кошко.

— Ужбергатӥсьлэн сюлмаськонъёсыз тырмыт, дыр?

— Сюлмаськонъёс ноку но уз быре. Мон кыӵе удысэ кутскемме тодӥ ук, иське, ваньзэ чидано, лэсьтоно, аслыд бызьылоно. Уж тырме, нуналлы быдэ Иже ветлӥсько, кулэ луись товар утчасько. Вань милям нимысьтыз экспедитормы но. Соин валче тыршиськомы.

— Кинъёс дорады ужало?

— Коллективамы 33 адями. Соос быдэс районысь ветло. Пургалэсь кыдёке интыяськем Улын Юриысь но, Аксакшурысь но, Кечолысь но. Адями ужзэ мед гинэ валалоз, мон соосты шумпотыса кутӥсько. Пиос коллективмы борды чалякгес дышо кадь.

Ужасьёсмы егитэсь, шаплыесь, визьмоесь. Косъяськыса ветлонэз ӧвӧл, ваньзы асьсэлэсь удыссэс ӟеч тодо. Нылкышноос, пиос сярысь, шӧдскымон ӧжытгес.

Ми туж шулдыр улӥськомы. Праздникъёсты ӵош, огинын пукыса, ортчытъяськомы. Вуз карон но лэсьтӥськон удысын тыршисьёсын ужаськом бере, одно ик соослэсь праздниксэс пусйиськом, нылпиосынымы ӵош инкуазе потаськом. Туэ Норья котырысь чебер интыосы вуылыны малпаськомы.

Ӟеч ужасьёсмес синпель кузьымъёсын но таукаронъёсын пусйылӥськомы. Выль аре, 8-тӥ Мартэ но 23-тӥ феврале кузьымъёс сётъяськомы. Нылпиосмес но палэнэ ум кельтӥське. Соослы кыз пуктӥськом, Тол бабай но Лымы ныл, кузьымъёс сётъяса, ветло. Адями, уж пӧлы гинэ выйыса, медаз улы, улонлэсь чеберзэ но мед адӟоз. Ужась калык понна кивалтӥсь сюлмаськыны кулэ.

— Туала арын магазинъёс трос вӧлмемын ини. Ог-огдылы пыд пуктэмлэсь уд-а курдаське?

— Ма, мед луозы соос. Конкуренция милемлы кышкыт ӧвӧл. Ми асьмелэсь ужмес лэсьтӥськом, соос асьсэлэсь быдэсто. Котькудӥз ужбергатӥсь ас товарезлы ачиз дунзэ пуктыны быгатэ, басьяськисьёсын одӥг кыл шедьтэ.

— Кемалы кошкыкуды, кинэ интыяды кельтыны быгатӥськоды?

— Кузпалы Людмила Александровна бур киы луэ. Со ачиз ик валтӥсь бухгалтерлэсь но, кладовщиклэсь но, вуз карисьлэсь но ужзэс быдэсъяны быгатэ. Секытлэсь уг кышка. Мынэсьтым но вань ужме йылысеныз пумозяз тодэ. Котькыӵе удысын со усточи. Сыӵе оскымон адямиед вань ке вӧзад, уж капчиен сётӥське. Озьы ик ми дорын ужа Ольга нылмы. Со — экономист, уксё ужез ӟеч тодэ, котькыӵе удыс борды ӝабыр-ӝабыр басьтӥське.

— Георгий Леонидович, матэкто вуз карисьёслэн но, лэсьтӥськисьёслэн но нуналъёссы. Со праздникъёсын ӟечкыласа, сӥзиськом тӥледлы бадӟымесь азинсконъёс но вормонъёс.

— Бадӟым тау. Мон но вань ужасьёсме та праздникъёсын ӟечкыласько. Сӥзисько соослы ужазы бадӟымесь азинсконъёс, доразы ог-огзэс валаса, мед улозы. Ӵукналы быдэ ужаны шумпотыса мед вамыштозы, тырмыт уксё мед басьтозы, ӝӧк вылзы бусьтыр мед луоз.

Любовь Тихонова

Удмурт Дунне
By Удмурт Дунне Июль 25, 2013 14:47
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<