Кыӵе умой тӥ вераськиськоды удмурт кылын…

Удмурт Дунне
By Удмурт Дунне 23 июля, 2013 10:50
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кыӵе умой тӥ вераськиськоды удмурт кылын…

Япониысь куно Масая Сешимо

Япониысь куно Масая Сешимо

Удмурт кун университетысь удмурт кылосбуръя факультетын гужемлы быдэ радъяськыло кунгож сьӧрысь студентъёслы удмурт кылъя курсъёс.

14 ар ӵоже куноос вуылӥзы ни Европалэн пӧртэм сэрегъёсысьтыз: Венгриысь, Финляндиысь, Германиысь, Польшаысь, Болгариысь… Таяз аре тодмо луиз: удмурт кыллы синмаськемъёс Япониын но вылӥллям.

Масая Сешимо жадиз ни, вылды, та юанлэсь: «Малы тон дышетӥськод удмурт кылэз?» Ма, ачим но юатэк ӧй чида. Нырысьсэ со удмуртъёс сярысь тодэм, фин кылэз дышетыкуз: фин-угор калыкъёслэн нимъёссы пӧлысь «удмурт» кыл йыраз кылем, тунсыко, пе, кылӥське. Кӧня ке ар ортчыса, Масая адӟем удмурт кылъя курсъёс сярысь ялонэз Нидерландыысь одӥг университетлэн сайтысьтыз (отысь студент куке но та курсъёсы пыриськылэм ини). Озьы япон пияш Ижкаре вуиз.

Удмуртъёслэн улон-вылонэнызы тодматскон сямен студентъёс поталлязы гуртъёсы. Масаяез мон ӧтчай дорам — Пичи Пурга ёросысь Орлой гуртэ. Малпасько, гуртоосы кема вераськозы на удмурт сямен вераськись япон пияш сярысь…

Гуртэ вуэммы бере ик поръяны малпамы бускель гуртозь — Баграш-Биграез, дышетскем школаме возьматэме потӥз. Масая та понна дӥсяз аслэсьтыз кимонозэ но пулэсь лэсьтэм катаоссэ, кияз кутӥз веерзэ. Ваньзэсты дэймытъяз. Машинаос гинэ но вӧзтӥмы калленгес ортчылӥзы. Масая мынӥсь-ветлӥсьёсын удмурт кылын ӟечбуръяське, нош удмуртъёс кышкасагес «Здравствуйте…» вазё. Зэм но, пе, удмуртъёсты воздаськисесь шуо, вераз со мыным. Ма, японъёсты но востэмгес, сабырлы адямиосын лыдъяло кадь, шуисько. Озьы, пе. Вераз на: японъёс, пе, чылкак воштӥсько, караоке кырӟаны ӵошен люкаськыкузы. Соку ваньзы шулдыръясько, возьдаськон сямзэс вунэтыса. Тодам лыктӥз, кызьы удмуртъёс кашаосты (нылпи вордскемлы сӥзем юон дырез) ортчыто. Ма, ми но куддыр возьдаськон сяммес вунэтӥськом…

Масаялы ӵапак удалтӥз удмурт юон дыре сюрыны: со нуналэ ӵыжы-выжыосмес куное ӧтчам вал. Ваньзы, корка пырыса, юало: «Тӥ тодӥськоды-а, тӥляд азбарады удмурт кылын вераськись японец пуке шуыса?» Масая со вакытэ пуке вал корка азьын, удмурт кылъя гуртысь ужзэ лэсьтыса. Ваньмызлэн потӥз со ӝытэ куноенымы мадиськемзы — нош со быгатэмезъя тыршиз удмурт кылын вераськыны. Ваньзы юало, кельше-а солы ми дорын. «Кельше» шуэ, ма, кызьы «уг кельшы» шуоз куно кузёослы? Эшшо ке но Япониысь куно — соос, асьмемын ӵошатыса, «тау» кылэз трослы ӵемгес куто.

Масая со ӝытэ япон кылын кырӟаз но. Собере кырӟанъёсызлэсь пуштроссэ берыктӥз. Япон но удмурт кырӟанъёс кельшо вылэм — дорлэсь мӧзмон сярысь, чебер инкуазьлы синмаськон сярысь… Нош малпаськид ке, кыӵе калык меда, ас шаерзэ данъяса, уг кырӟа? Ӧвӧл, дыр, сыӵеосыз…

Серемес учыръёс но кылдылӥзы. Масая шуэ, уг яратӥськы, пе, кезьыт куазез. Мамае но, куамын градусозь кезьыт луись толъёсмес тодаз вайыса, соглаш луиз, мон но, пе, уг. Юаз, кезьыт-а луэ Япониын толалтэ. Ноль градусозь лэзиськылэ, пе. Удмуртъёсты но японъёсты трос гинэ ӵошатылӥм на. Япониын но, пе, вань пичи калыкъёс, кудъёсыз асьсэ кылын верасько. Отын но висьытӥсь югдур кылдэмын: егитъёс анай кылзылэсь палэнско, япон кылын вераськыны кутско. Таӵе учыръёс но, пе, луо: егитъёс анай кылзэс тодазы ваё на, арлыдо мумы-бубыоссылэсь уксё курыкузы. Нош пересьёс, шумпотэменызы бӧрдыса, соослы коньдон сёто. Масая туж чебер но ӝож кылбур лыдӟиз на — сое окинава кылын гожтэм, Кыкетӥ дунневыл ожысь гуртаз бертыса, Яманокучи Баку кылбурчи.

Лёгиськи гинэ шормуџмылэн музъем вылаз,
Соку ик вази вӧзтӥм ортчисьлы: «Ӟечбур, кыӵе улӥськод ни?»
«Тау, туж умой», — вазиз со мыным япон кылын.
Вордӥськем музъемелэсь мӧзмонэ тулкымскиз.
Юай солэсь: «Окинава кылмы но шат
та ожын виемын вал?»
Нош со мынектӥз но вазиз:
«Кыӵе умой тон вераськиськод окинава кылын».

Алигес кунгож сьӧрысь студентъёсын потам Кез ёросэ. Отын школаын дышетскисьёсын пумиським. Зэмзэ ке, туж возьыт вал адӟыны, кызьы кунгож сьӧрысь куноос вазё Удмуртиысь пиналъёслы удмурт кылын, нош соос ӟечбуръяськыны но шугъясько. Паймыса верало: «Кыӵе умой тӥ вераськиськоды удмурт кылын…»

Анастасия Шумилова
Туспуктӥз Ирина Зангарик

Удмурт Дунне
By Удмурт Дунне 23 июля, 2013 10:50
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<