Кужым сётӥсь ву

Удмурт Дунне
By Удмурт Дунне Июль 5, 2013 13:28

Кужым сётӥсь ву

Гиря ӝутъяло зэмос воргоронъёс

Гиря ӝутъяло зэмос воргоронъёс

Ува каргуртын куинетӥ нуналзэ Гужем шудонъёс мыно. Ужрадэ вань ёросъёсысь командаос вуэмын, 1 сюрс 450 спортсмен 127 комплект медаль понна нюръяське.

Гурт шудонъёслы уваос быдэс ар дасяськизы. Туала куронъёслы тупась стадион, бадӟым спортзал лэсьтэмын, спортъя пӧртэм объектъёс выльдэмын. Учкисьёс сярысь но вунэтӥллямтэ, котькудаз объектын пуконъёс пуктылэмын. Гурт шудонъёслэн утисьсы — Ву шапык. Сое кылдытӥз ёросысь суредась Татьяна Головина. Ву, пе, будыны, кыданы кужым сётэ.

Толон ӝыт ужрадэз сӥё-дано усьтон ортчиз «Юбилейный» стадионын. Шулдыръяськонэ 700 пала адямиос пыриськизы. Ужын вылӥ азинсконъёс басьтэмзы понна данъязы скал кыскисьёсты, гырись-кизисьёсты, Уваысь «Купанча» ансамбльлэсь кивалтӥсьсэ Пантелей Кузнецовез но Бызараысь кибашлыослэн юртэнызы кивалтӥсез Геннадий Сидоровез.

Тужгес бадӟым команда уваослэн — 110 спортсмен но 18 тренер. Угось кузёос ваньмаз ӵошатсконъёсы, 18 амалъя, пырисько. Гурт шудонъёс дыръя арысь аре ӟырдыт нюръяськон пуроме дэриос, пургаос, можгаос но уваос куспын. Трос пол вормисе потылӥзы Дэри ёросысь спортсменъёс. Таяз учыре уваос нырысетӥ инты понна нюръяськыны дась луэмзэс ивортӥзы.

Нырысетӥ медальёслэн кузёоссы тодмо луизы ни. Озьы котькинлэсь кыдёке тэтчизы Можга ёросысь Снежана Николаева но Дэри ёросысь Алексей Беляев. Ӝог вамышъянын висъяськизы Пичи Пурга ёросысь Светлана Трифонова но Якшур-Бӧдьяысь Сергей Корепанов. 3 но 5 иськеме бызьылонын вормисе потӥзы Каракулиноысь Елена Наговицына но Дэриысь Константин Васильев. Гуртысь спортсменъёс футболэн, шар пальылонэн, волейболэн шудо, шальы зћръяло. Бере уг кылё ёрос кивалтӥсьёс но, соос ыбылӥсько, шальыен шудо.

Удмуртиын ортчись Гурт шудонъёс мукет улосъёслы адӟем карымон луо. Таяз учыре удмурт Олимпиадалэн ортчеменыз тодматскыны Киров, Нижний Новгород, Брянск, Самара улосъёсысь губернаторъёс но мукет вылӥ кивалтӥсьёс, Москваысь журналистъёс лыктэмын. Пусйыны кулэ: кыкетӥ арзэ Гурт шудонъёслэсь мынэмзэс учкыны луэ Интернет пыр. Ӵошатскон йылпумъяськоз ӵуказе. Соку тодмо луозы вормись командаос.

Валентина Емельянова
Туспуктӥз Александр Горбунов

Удмурт Дунне
By Удмурт Дунне Июль 5, 2013 13:28
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<