Кусо кутӥз Президент

Удмурт Дунне
By Удмурт Дунне 2 июля, 2013 11:24
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кусо кутӥз Президент

А. Волков 12 аресысен турнаны дышиз

А. Волков 12 аресысен турнаны дышиз

Гербер праздникез быдэс республикаен пусйыны кутскизы 1992-тӥ арысен. Нырысетӥез сыӵе ужрад ортчиз Алнаш ёросысь Кузёбай гуртын. Пӧртэм ёросъёсы вуылыса, туэ со нош ик ӧръяськиз Алнаш черкогуртын.

Берло аръёссэ Гербер ортчылӥз Дэри ёросысь Лудорвай музей-заповедникын. Удмурт шӧмын пыӵам интые республикаысьтымы котькыӵе ёросысь лыктэмъёслы огкузьдагес сюрес ортчоно вал. Нош Алнаш пала мынонэз ваньгес ик, уката ик — уйпалъёслы. Соин но, лэся, нырысь-валысь вераськонъёс ветлӥзы: алнашъёс калыкез люканы быгатозы меда? Но нациосын ужан политикая министр Владимир Завалин шуиз: 13 ар ужатозям, тамында калыкез ӧй на адӟы. Ма, удмуртъёс сяна, татчы вуэмын вал Финляндиысь, Эстониысь, Пермьысь, Татариысь, Кировысь куноос.

Котькуд ёросысь куноосты пумитаны нимысьтыз азбар лэсьтэмын. Ёросысь котькуд гурт поселенилы уксё висъямын вал: кулэ материалъёс шедьтыны, ӝӧк пуктыны. Кӧня ке нунал ӵоже тӥръёсын-молотъёсын ужамысь ӧз дугдылэ татын гуртоос. Ог-огзы куспын вожвылъяськизы но: кинлэн азбарез устогес луоз. Турын ӝоктон вакыт вуэмын шуыса, ужлэсь огез но ӧз палэнтӥськы. Коркась корка пыраса, шедьтӥзы 30 чугун пурты. Ӵапак отын 3 центнер чабейлэсь кӧжыен-сӥлен ӝук пӧзьтӥзы.

Концерт пуктонэ кыскемын вал ог 60 коллектив. Туэ нырысьсэ Герберлы сӥзем гимн чузъяськиз. Кылъёссэ гожтӥз Алнаш ёросысь Туймыйыл гуртысь кылбурчи, ёросысь Ашальчи Оки нимо премиен пусъем Татьяна Пчельникова, гурзэ малпаз Удмуртиысь культура удысысь дано ужась, композитор Вячеслав Адаков.

Валъёсын ворттылон

Валъёсын ворттылон

Гимн малпам сяна, алнашъёс выль ӵошатсконъёсты но вашкалаысь улӟытӥллям. Тужгес паймытӥз валъёсын ворттылон. Ваньзэ-ӧвӧлзэ таяз вожвылъяськонэ пыриськизы Алнаш, Грак, Можга ёросъёсысь, Татариысь Менделеевскысь но Елабугаысь 31 валъёс. Пӧлазы вал огшоры ужасьёсыз но, чылкыт арабской выжыысь потэмъёсыз но. Тузон пурӟытыса ик, ворттӥзы. Кызьы адямиос вал вылазы возиськизы на — ӧйтӧд. Вормисьёс куспазы люкизы 80 сюрс манетэз.

Быдэс нунал ӵоже калык ӧз бырылы нюръяськисьёсты учконысь но. Шунды пыже, нош ог-огзэс тыбыр вылазы уськытыны турттӥсьёс вужер утчаны ӧз ик дыртэ. Зэм, куд-огез, кужмо нюръяськисьёс шоры учкыса, кужымзэ мертаны ӧз дӥсьты, ассэ списоке пыртӥз вал ке но. Озьы таяз ӵошатсконэ пыриськиз 10 мурт.

Пу вандӥсьёс но, пукыӵен ыбылӥськисьёс но вал. Но тужгес секыт йӧтӥз турикукен ветлӥсьёслы. Гопо-нюко сюресэн но ӵышкем турынэн сэрен одӥг-кык метр кеме но мыныны ӧз быгатылэ. Но огзы но ӧз ӝожоме.

Ӵошатсконъёсы пыриськизы республикаысьтымы вылӥ кивалтӥсьёс нӧ таосты ӧтизы возез турнаны. Турынзэс, юромо ву кисьтаса, удобрение пазяса, будэтӥллям. Гуртоослэсь 19 кусо куриллям. Шерыса дасямын. Учкомы, пе, кызьы кивалтӥсьёс кусо возьыны быгато.

Литовкаез нырысь ик кутӥз Президент Александр Волков. Калык синъёсызлы ӧз оскы. Сипыртыны ӧдъяӟ таид, пе, турнаны быгатэ шат? Нош Александр Александрович вылысьтыз пенжаксэ ик куштӥз, саесъёссэ пужалляз но удыссэ мытӥз. Паськыт басьтэ, турынэз огкадь шонер выдэ. Талы паймемъёс чабыны кутскемзэс но ӧз валалэ. Нош Президент шуиӟ

— Мон музъем ужез адӟылымтэ мурт ӧвӧл. Пичи дыръям милям асьмелэн хозяйствомы, асьмелэн скалмы вал. 12 аресысен киям кусо кутӥ. Зэмос воргорон уж со.

Отӥяз Александр Волков музон кивалтӥсьёслы валэктыны ӧдъяз, кызьыгес кусоез кутоно. Ма, соос ваньзы сямен ик гуртъёсын будэмын ке но, куд-огез киын мурт кусо соку ик ӧз кылзӥськы. Кун Кенешлэн Тӧроезлы Владимир Невоструевлы урод кусо сюрем — уг ӵогы. Но мылкыдзэ ӧз юскы — гурт удысъя но сиён-юонъя министрлэсь Алексей Стрелковлэсь литовказэ кутӥз но аслэсьтыз чурзэ пумозяз нуиз. Озьы син куспын ӝужыт турын погыртэмын вал.

Озьыен, кивалтӥсьёслы но, огшоры ужасьёслы но Герберын мӧзмыны маза ӧй вал.

«Удмурт дуннеос» но калык пӧлы потӥзы. Азбарамы кожасьёсты пумитаны, соосты шулдыртыны но пӧрам-пыжиськемъёсынызы утялтыны юрттӥськиз Пичи Пурга ёросысь Яган-Докъя гуртысь «Буртчин» ансамбль. Эшъяськонмы кыкетӥ арзэ азьланьтӥське ни.
Вуоноез Гербер ортчоз Ярын.

Елена Сараматова
Туспуктэмез: udmfoto.ru

Удмурт Дунне
By Удмурт Дунне 2 июля, 2013 11:24
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<