Кучапиос

Удмурт Дунне
By Удмурт Дунне Июль 5, 2013 11:20
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кучапиос

b_0_650_00___images_article-dogs_article-puppy-5Осто, таӵе ӟар кезьыт куазен но кинлэн киыз пырем синтэм кучапиосты куштыны! Азбар шорын ик ӟечыран улэ. Улазы коть шобрет вале вал!

Зӧк куртка дӥсяса но, тӧл пыртӥ потэ. Одӥг интыын сылыку, пыдчиньыос ик кынмыса кужекъяны ӧдъяло. Таџе куазен, азьвыл сямен, лымыын но уд погылляськы. Урамысь эшъёсын люкаськемлы быдэ лымыез мертаськод ни, макем мур гуштод. Сапег вылтӥд лымы омыртӥд ке, Зӧк кӧт ним лякозы но уйылӥсе пуктозы. Лымы вылын возиськыны пӧрмытӥд ке, тонэ герой карозы, кылчинэд юн возе бурдъёсыз вылын, шуозы. Озьы, оло, ӧвӧл, но толалтэ одӥг нуналзэ но нискылатэк, лымыен лэзьяськытэк, кылем уг поты. Дорад колзӧ кадь пырид ке, дӥсеныд валче астэ но мисьтаськон машинае куштоно, шорад анаед куаретоз. Соин но, оло, лымыез кӧттырымон сием потэ.

Нош туннэ лымы сиытэк но туж кезьыт. Кынмыса лул ик потӥське ни. Эшъёс шонер лэсьтӥллям, кыре потытэк.

Тазьы асэныз ачиз вераськыса, кучапиос азе пыдесъяськиз пичи пи. Вить кузя соос. Шунаны турттыса кадь, ог-огзы борды таш-таш лякиськиллям. Гонзы ӟызы на. Дыгыр-р-р куалекъяло. Ӝожмыт нискето. Ныръёссэс ӝутъяны выро. Зынъясько, лэся, кин ай татчы лыктэм шуыса.

— Эн курдалэ, пичиосы, Ромик мынам нимы. Мон тӥледыз утё, — куалекъясь куараен вазиз эке.

Шуныт пӧзьыоссэ кисыосаз тулляса, дыгыр-р-р куалекъясь киосыныз кыстӥськиз со лул комокъёс доры. Вадьсазы мыкыртӥськыса, витьназэс ик маялтӥз. Соосыз, шунытэз шӧдыса, эшшо золгес куалекъяны ӧдъязы, пыд улысь музъемез ик зуркато кадь. Кие куриськыса выллем, ог-огзы вылэ тубо синтэмъёс: монэ нырысь кут, монэ. Ваньзы ик горд-гордэсь, быж йылъёссы гинэ тӧдьы буёлэ веттылэмын кадь. Пичиесь ныръёссэс вылэ но вылэ ӝуто, тани-тани Ромалэн ымныр бордаз лякиськозы.

Осто, жальзылы уд чида! Пыдесъяськыса сылӥсь Рома эшшо золгес куалекъяны кутскиз. Таяз рад — бӧрдэменыз. Зэм, синвуосыз музозь уг вуо — бам вылаз ик йӧлы пӧрмо. Аслаз киосыз но эбылязы ни. Нош со ялан кучапиосты маялля.

— Мон утё тӥледыз, одно утё, — асьсэлы гинэ кылымон сипыртэ со. — Одно ик шунто тӥледыз, шунто но сюдо.

Кылзӥськисьтэм чиньыосыз дӥсезлэн замоказ кугӟазы. Куртказэ шуак пертчоз но пияз кучапиосты поноз. Озьы малпаз вал Рома. Но замокез ёрказ. Басма юдэс висказ сюрем, лэся — нокызьы но усьтонлы уг сётӥськы. Кысканъяз эшшо золгес ёрказ. Дыртыку уго ваньмыз мыдлань луэ.

— Эх, каръян, мар тон озьы ӧч кариськод? — зар-зар бӧрдыны кутскиз ини Рома. — Усьтӥськы ӝоггес! Кучапиос кынмо ук! Туж зол кынмо ни! Кулӥзы ке? — ялан кыска пияш замоксэ.

Соиз мырдэм сётӥськиз ик. Но отчыозь Ромалэн чиньыосыз ӝуаны ӧдъязы ни. Соосты шунтыны турттыса, эке киоссэ ымдураз вуттӥз. Ну шока ук, ну шока! Но пушкысьтыз воксё но шуныт омыр уг поты ни кадь.

— Дорын шуналозы ай, шуныт ву улэ донги ке, — шуиз со.

Кылзӥськисьтэм киосыныз мырдэм кутӥз огзэ кучапиез. Оло синъёсаз учкыны турттыса, оло тодманы йӧндырыса, Рома шораз уӵертӥз. Черкын баӵколэсь бакельзэ курем сямен, кымесаз чупаз но пияз понӥз. Огез отчы капчиен тэриз. Нош кыкетӥезлы куртка улын инты воксё ӧвӧл ни. Озьы но, тазьы но выриз Рома, номыр уг пӧрмы.

— Салазкиме ке но кутоно вылӥськем сьӧрам. Соку ваньдэсты пуктысал но подъездам кемалась пыртысал ни. Милям отын шуныт. Тубат улэ интыясал, дорысь тӥледлы сиён, небыт ӵушкон поттысал. Мамалэсь чечызэ лушкасал на. Мон кынмисько ке, со монэ чечыен сюдэ. Только аракыен сура. Туж каньыл луэ собере, мугор ик ӟырда. Но тӥ аракы юиды ке, кудӟыса погралоды. Тӥледылы чечыен гинэ но яралоз.

Рома солань-талань уӵертӥз. Азбарысь лошъяськись кылёнкаез ке но синйылтоз кожаз вал. Но номыр но сыӵе-таӵеез ӧвӧл.

Собере кучапиос вылэ, ӧрӟи кадь, шуак лэзиськиз. Пичи ӟыгыртэтаз ваньзэсты кырмыны выриз. Пӧрмиз кадь. Али пыдес йылысьтыз ӝутӥськоз но нуоз соосты ваньзэсты дор палаз. Но султыны дауртонъяз кучапиосыз, чиньы вискытӥ виясь кеньыр сямен, оген-оген музэ усьылӥзы.

— Мар куртчиськыны но уд валаське тӥ! Куртчиське дӥсям!

Рома нош ик кучапиосыныз ӝутӥськыны выре. Нош ик ӧз пӧрмы. Комокъёс сокем секытэсь но ӧвӧл кадь, но оло чиед мугораз кужымез уг тырмы, оло киосыз сокем-сокем кынмемын ни.

— Мон тодӥ, мар карыны! Нырысь куиньнадэс нуо, собере кылемъёсыз сьӧры берытско на.

Та малпанэзлы Рома ачиз ик лӧптӥз. Бурдъяськиз кадь. Шуак ӝутӥськыны кужымез но кытысь ке потӥз. Солэн татчыозь таӵе зол бызьылэмез ноку ӧй вал кадь. Эшъёсыныз уйылӥсен шудыкузы, огзэс но ноку сутыны ӧз быгатылы. Нош татын воксё но перияськиз. Гуштэ, усе, выльысь султэ но бызе. Кучапиос но гылӟыса њыгыртэтысьтыз усё. Пиёк вылазы ик канжаське. Но нош ик љутэ но азьлань бызе. Эшшо ке комокъёссэ буйгатыны кужым но шедьтэ на: ваньмыз умой луоз, эн бӧрдэ, пе. Ачиз шокан пась но уг шедьты ни.

Коркась подъездаз, ярано коть, ӧсэз пась вал. Куртка кисыяз бугыръяськыны солэн али воксё дырыз ӧвӧл. Кучапиоссэ тубат улэ тыриз но, азьчиньызэ ӝутыса, дышетӥсь кадь куаретӥз:

— Татын шыпыт пуке, мон щас вуо!

Вуиз со, зэмен ик, туж ӝог. Кучапиос интыысьтызы вырӟыса ик вуттӥллямтэ кадь. Ачиз но кужымтэк вӧзазы пуксиз. Чиньыоссэ эх, шунтыны выре ук, эх, шока шоразы! Пиньёсыз ваче йыгасько ни. Нош со ялан маке вераны выре:

— Мон тӥледыз ваньдэсты дорам пыртысал ни. Но мамалэн туж зол вожез потоз. Мон солэсь кемалась курисько ни пуны. Нош со вазе гинэ: тон ачид кучапи кадь на, астэ ачид сюдыны но, миськыны но уд вормиськы. Ачим утялто, шуисько но, со мукет вераськон мытэ. Квартирамы, пе, пичи, пунылэн гонэз усёз, зын потоз, бадӟым коркамы луиз ке, соку, пе, утӥсез вордом. Бадӟым коркамы ку луоз ай! Туннэ папамы гинэ но ӧвӧл ай. Нош сотэк нокыӵе корка. Писэй басьтон пумысен вераськон поттылыкум гинэ но, мама нырзэ кисыртэ. Но тӥ эн курдалэ: мон тӥледыз уг кушты! Эшъёсыным шудыны но уг пота — тӥ вӧзын уло. Садысь бертӥ ке, соку ик тӥледыз сюдо, вешало. Эшъёсылы возьматӥ ке, оло, соос но куддэс ке басьтозы.

Кучапиос, верамзэ валаса кадь, вылаз тубыны кутскизы. Нискето но нискето. Таослэн сиемзы потэ, дыр. Озьы шуыса, Рома кисыысьтыз кампет поттӥз. Ачиз ик возьдаськиз кадь: кучапиосыз вить кузя, нош кампетэз одӥг гинэ. Аслаз пертчемез но уг луы — киосыз нокызьы но уг шунало ни.

— Я, пиньды вань ук, бумагазэ кесялэ но пичиен ваньды сюпсе ни. Ми эшъёсынымы чупачупмес ог-огмылы нюлыштыны сётӥськомы ук.
Но ньыльпыдоослы кампет маке кадь, пе! Сое зынъяны но ӧз турттэ. Рома ымазы но сое донганы выриз — толыкез сыӵегес!

— Мар сиёды тӥ? Мама ӵукна курег макес пӧзьтӥз вал. Но ми сое нуназе ик сиимы ни. Лыоссэ но куштӥмы ни. Печення потто. Соиз туж ческыт. Ачим ӵукна чай юи — кылме ньылӥсько вал.

Кучапиос огзылэсь золгес мукетыз нискетыны ӧдъязы. Рома валаз: печенняез соос уг ярато. Соку Рома вазиз:

— Няньмы вань на. Щас шоро но потто.

Кучапиоссэ кымесазы чупаса-чупаса ик, султӥз Рома. Пыдесъёсыз шальтрам уробо кадесь — мугорзэ уг вормо, дыгыр-р-р куалекъяло. Лифт шуонзы ӧвӧл. Мырдэм но кызьы тубиз со куинетӥ этажозь. Усьтонзэ тунгонэ донгиз но эх, позыртыны выре ук — чиньыосыз сое бералтыны уг вормо.

Шальтыртэмзэ анаез кылӥз но ӧсэз усьтӥз. Эбылям пизэ адӟыса, со воксё куалектӥз: тон кытын сокема ветлӥськод, пе. Ромалэн ымыз ик усьтӥськиз ни вал вераны, со кучапиосты быронлэсь утиз шуыса. Но малпаз: анаез таӵе выросэз понна воксё но тышкаськыны быгатоз. Тани ук куаретэ ни: лызэктэмед ни, тани висьыны усёд. Ӝоггес, пе, кылиськы но шуныт вуын пук. Ромалэсь «мынам кыре потано ай» шуэмзэ со кылэм-адӟем ик ӧз кары. Пизэ ачиз кыльыны кутскиз. Ваннае ву лэзиз. Отчы сылал кисьтӥз но пизэ пуктӥз. Ачиз со куспын кошкиз чечыен аракыез пӧсятыны.

Ӵушиськемзэ но, курытсэ юэмзэ но Рома уйвӧтын кадь гинэ шӧдылӥз. Валесэ выдтэм бере со, секыт кор ӝутъям мурт кадь, супрак умме усиз. Сайказ ни ӵукна гинэ, ымныраз шунды пиштэмен. Анаез бордаз пуке. Кӧдэктэмын. Бамыз кузя синву ваське. Тон малы, пе, монэ курдатӥськод. Рома нырысь мазэ-созэ ӧз ик вала. Берло гинэ ачиз но шӧдӥз: мугорыз ӟырдамын, дыльдызэ ньылыны вӧсь, ӟигарыз ӧвӧл.

Озьы ке но со ури-бери султӥз но дӥсяськыны кутскиз. Анаезлэн «тыныд кылльыны кулэ» шуэмезлы пумит Рома вазиз:

— Часталы гинэ лэзь монэ. Мон кучапиосылы кылме сётӥ. Доразы васькало но берен пыро. Соосты сюдоно.

Анаеныз ӵош тубат улэ васькемзы бере одӥг кучапиез но ӧз шедьтэ…

Елена Сараматова

Туспуктэмез: tsamax.su

Удмурт Дунне
By Удмурт Дунне Июль 5, 2013 11:20
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<