Куар вӧсян

Удмурт Дунне
By Удмурт Дунне 9 июля, 2013 11:01
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Куар вӧсян

 

Куарвӧсьын ваньмыз берга кызьпу котырын

Куарвӧсьын ваньмыз берга кызьпу котырын

Эгра ёросысь Кабачигуртысь культура удысын ужасьёс вань сюлмынызы тыршо вашкала сямъёсты но йылолъёсты утьыны. Берло дыре котькуд ар ёросамы ортчыло фольклорлы сӥзем нуналъёс. Туэ ми басьтӥським Куарвӧсь праздникез улӟытыны. Со Троица нуналэ ортчиз.

Фольклорлы сӥзем арнямес усьтӥм «Шур дурын мисьтаськон» сям-йылолэн. Вашкалаосмы Куарвӧсёзь сукманъёссэс, гын сапегъёссэс, ковёръёссэс, пӧзьёссэс, ыж гон пыдвылъёссэс чылк-чылк миськыса, сӥзьылозь ӝик-ӝик утялтозы вылэм. Пӧзь-носкизэс миськемлэсь азьло соосты кузэн-кузэн вурылӥллям. Нош мисьтаськиллям, шур дуре тылскыса, пуртыын ву шунтыса. Миськем дӥсьсэс, турын вылэ вальылыса, куасьтӥллям. Та сям-йылол сярысь нылпиослы мадизы вашкала сямъёсты тодӥсь гуртоосмы Лидия Николаевна Чиркова но Юлия Леонидовна Широбокова. Собере пиналъёс кузэн вурылӥзы носки-пӧзьёсты, пулэсь лэсьтэм пуртэн вуштыса, миськизы гын сапегъёсты, пальчаен тышкаса, сузязы сукманэз но выж лёгетэз.

Арнямылэн кыкетӥ нуналаз бадӟымъёсызгес пиналъёс ветлӥзы клубын ужась Ирина Митрофанова доры, Куарвӧсь поминкалы дасяськыса, пӧраны дышетскизы. Арлыдоос соослы мадизы, ма нуо та нуналэ шайвылэ, кыӵе сиён-юон басьто сьӧразы.

Куинетӥ нуналаз, Куарвӧсь праздник нуналэ, кызьпу арамаын гуртоос понна радъямын вал шулдыръяськон. Вашкалаосмы сямен ик, егитъёс ӵогизы егит кызьпуэз, кырӟаса чеберъязы сое лентаосын, асьсэлэсь кыӵе ке но лемлет малпанзэс быдэстыны курыса. Пуктӥзы сое нимысьтыз дасям интые. Арамае люкаськем калыклы клубын ужасьёс вакчияк мадизы Куарвӧсь сярысь, валэктӥзы, малы со озьы нимаське. Азьвыл аръёсы чеберъям кызьпуэн ульча кузя ортчо вал кырӟаса, эктыса, котькуд корка вадьсы дугдылыса, юрт кузёослы ваньзэ умойзэ сӥзьыса. Гурт пумын кызьпу котыре пересьёс котырак султо но куарез вӧсяло вал. Куарвӧсь бере веник тӥяны луэ ини.

Табере вӧсяськон вунӥз, Инмарлы вазиськон-куриськон кылъёс калык йырсазьысь тӧлӟизы — кӧня юалляськи, огез но песянай тодаз ӧз вайы вӧсь кылъёсты. Кылиз на юмшан гинэ. Люкаськемъёсты шулдыртӥзы «Ерпечкаос» нылпи фольклор коллектив, арлыдоослэн «Визыл» ансамбльзы но клубысь усточиос. Чеберъям кызьпу котырын шудонъёс но эктонъёс нуназе берозь кыстӥськизы на. Шудэм-серектэм бере ческыт ик кошкиз тылскем вылын пӧзьтэм чорыг лым.

Куарвӧсь бере ми палан Музъем нуналэз пусъё (кин ке сое Музъем именник шуэ). Мӧйыос та нуналэ музъемез исаны, копаны уг лэзё. Вулэсь именниксэ пусъё Куарвӧсь бере пуксёнэ (вторнике). Та нуналэ возиськыны косо мисьтаськонлэсь, вуэз пожамлэсь. Нош вирнуналэ тылын вырыны уг лэзё, малы ке шуоно Тыл нуналэз пусъё.

Вань та нуналъёсын ми тодматӥм пиналъёсты, соосын пӧртэм шудонъёс но ӵошатсконъёс ортчытӥм. Озьы тыршим улӟытыны чебер вашкала праздникез, ужрадъёсамы пӧртэм арлыдо гуртоосмес кыскыса.

Вера Чиркова,
Эгра ёросысь Кабачигуртысь библиотекарь

Удмурт Дунне
By Удмурт Дунне 9 июля, 2013 11:01