Ижын — «ПарИж»

Удмурт Дунне
By Удмурт Дунне 1 июля, 2013 17:46

Ижын — «ПарИж»

 

Эстониысь Элина но Удмуртиысь Лара

Эстониысь Элина но Удмуртиысь Лара

Туэ ньылетӥзэ радъяське «ПарИжевск» калыккуспо фестиваль.

Со кыстӥськоз 7-тӥ пӧсьтолэзёзь. Парижысь Иже вуизы Мари Казен, Стефани Аккетт но Жереми Накаш, соосын ӵош — кырӟась, композитор Вероника Булычёва.

Фестиваль ужзэ мытӥз Эшъяськон юртын усьтэм «Экология но ми» адӟытонэн. Ижкарысь устолыкъя 13 номеро нылпи школаысь но Эстониысь Пылва карысь 14-18 аресъем пиналъёс бумага вылэ кисьтӥзы инкуазен герӟаськем шӧдонъёссэс. Тунсыко соиз: эстон пиналъёс суредасько абстракт амалэн, син азе пукто пичи арбериосты — шепъёсты, писпуосты, пейзажез, нош удмуртъёс ӵемгес реализм амалэз куто, улӟыто калык улонысь сям-йылолъёсты, корка котырысь суредъёсты.

Экология инкуазез утёнэн гинэ герӟаськемын ӧвӧл. Тунсыко котрес ӝӧк сӥземын вал эколингвистикалы. Кызьы утёно кылэз? Кызьы нюръяськоно кырсёмемен? Парижысь Шундыӝужан пал кылъёслэн но культураослэн институтысьтызы (INALCO) дышетӥсь Мари Казен француз кыл сярысь вераз. Француз кыл кун кыл сямен кутӥськыны кутскиз 1539-тӥ арын. Парижысь кыл вӧлмиз быдэс Францие — кужмысь, вир кисьтыса но. Но ӵапак та вамыш юрттӥз государствоез юнматыны. Кыллэн кужымез бадӟым. Француз сямен верасько 50 странаосын ог 220 миллион мурт. Туала вакытэ француз кыл но кырсёме, шуом, пӧлаз сюро трос англицизмъёс. Азинско пӧртэм арго-вераськетъёс, кылсярысь, верлан кыл. Нимыз но потэмын «мыддорин» кылэз мыддорин вераса — асьме сямен со луысал «доринмыд». «Мон тонэ яратӥ» шуэм луоз «ном нэто тӥяра».

Кыллэн шуг-секытъёсыз котькытын огкадесь, итӥськиз вераськонэ Эстониысь вуэм куно, Кохтла-Ярве карысь сланецлы сӥзем музейлэн кивалтӥсез Айнар Варинурм. Эстон кылэ туннэ озьы ик трос англи кылъёс мертчо.

Удмуртиысь тодосчи Василий Ванюшев малпанзэ шараяз: удмурт егитъёс но «сьӧлыкало», мултэс кылшудонэн ёрмо. Кылсярысь, егит кылбурчи Богдан Анфиногенов шугъяськытӥсь учыръёс сярысь гожъя ке но, поэзиез серемес адске, пародилы пӧрме — удмурт но ӟуч кылъёсты сура-пожа угось. Пумит малпанзэ вераз Нациосын ужанъя министерствоысь эксперт Лариса Буранова. Кылэн шудо ке, сое кыскало, кырыжто-таркало ке — иське, со улэп. Озьыен, кылмы азинске, со уз быры, оскытӥз Буранова.

Тодосчи Любовь Фёдорова пусйиз выль кылъёсты кылдытон ужлэсь бадӟым инты басьтэмзэ. Венгер тодосчи Янош Пустаи кичӧлтэмъя фин-угор калыкъёс поттӥзы ньыль пӧртэм удысъёсъя нимкылъёсын (терминъёсын) кылбугоръёс. Удмуртъёс висъяськизы — соос та уж борды пыр-поч басьтӥськизы. Озьы ке но терминъёсты выжыятон (соосты «гур дурысь» кыре, улонэ поттон) — со кема но секыт уж. Туннэ кыӵе ке нимкыл малпад ке, витёно ӧвӧл, ӵуказе ӵукна соин вань газетъёсын-телевидениын вераськозы шуыса. Лексикаез паськытатон — со пиналъёсмы, соослэн пиналъёссы понна сюлмаськон.

* * *
«ПарИжевск» ассоциацилэн тӧроез Вероника Булычёва но Эшъяськон юртысь кураторез Надежда Уткина Парижысь вуэм куноослы Удмурт шаерез возьматозы. INALCO-ысь студентка Стефани Аккетт но видео удысысь ӧнерчи Жереми Накаш Урал котырысь каръёс сярысь кино лэсьтозы. Соос вуылозы Камбаркае, Сарапулэ, Воткае. Нош Мари Казен ужзэ азьланьтоз удмурт гуртъёсын но архивын, со удмурт социологияя эскерон ортчытэ. Фестиваль йылпумъяськоз Ижкарын 7-тӥ пӧсьтолэзе. Вань мылкыд карисьёс быгатозы лыктыны Космонавтъёслэн парказы, 18 часысен отын ортчоз удмурт-француз мылкыдо шулдыръяськон-позыръяськон.

Дарали Лели

Удмурт Дунне
By Удмурт Дунне 1 июля, 2013 17:46
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<