Инкуазьлы оскон уг кысы

Удмурт Дунне
By Удмурт Дунне 5 июля, 2013 12:42

Инкуазьлы оскон уг кысы

"Чутырский" эштослэн тӧроез Т. Скрябина

«Чутырский» эштослэн тӧроез Т. Скрябина

Эгра ёросысь гурт удысын котьку сямен азьпал радын ветлэ «Чутырский» СПК. Со умоятэ музъемен ужанэз, бадӟым саклык висъя пудо вордонлы, тырмыт но ӟеч сиён дасянлы но выль амалъёсты пыӵатонлы.

Эштос быдэс шаерамы данэ потэмын, трос йӧл кыскеменыз но холмогор выжыысь пудо вордэменыз. Чемошурысь дояркаос луизы Удмурт Республикалэн Кун премиезлэн лауреатъёсыз, нош Удмурт Лоза фермаысь эшъёссы али пыртэмын Удмурт Республикалэн Данъян пул вылаз.

Эштосысь скал кыскисьёслэн бадӟымесь азинсконъёссы ас кожазы уг лыкто. Хозяйствоын трос сюлмасько тырмыт но ӟеч пудо сиён дасян сярысь. Али та ужлэн ӟырдыт вакытэз, вань калык бусыын — гуос тырмо жалем сиёнэн, люкаське турын. Кысык ужъёссы сярысь маде СПК-лэн кивалтӥсез Татьяна Скрябина.

— Татьяна Сергеевна, кышномуртлы гурт хозяйствоен кивалтыны капчи ӧвӧл ке но, тӥ ваньзэ вормиськоды-чидаськоды. Кытысь сыӵе кужым шедьтӥськоды?

— Ужаны кужым сётэ ачиз калык. Котырам бергало усто специалистъёс. Валтӥсь агрономе, Лев Олин, армие кошкемезлэсь азьло но татын ужаз, али но, дырзэ но кужымзэ жалятэк, тырше, вань ужъёсты син азяз возе, кылсярысь, пудо сиён дасянэз. Озьы ик вазь ӵукнаысен бер ӝытозь фермаын, бусыын бергало Чемошур но Удмурт Лоза отделениослэн кивалтӥсьёссы Вячеслав Кожевников но Александр Корепанов.

— Пудо сиён дасянды кызьы ортче?

— Эштослэн пудо уллёез бадӟым бере, сое ӟеч сюдытэк, трос йӧл-сӥль уд басьты. Соин ик та вакытэ милям вань кужыммы понэмын трос аръем турынъёсты утялтонэ. Кӧс турынэз, тюкъёсы керттылыса, лапас улэ тыриськом, нош кӧнязэ ке рулонъёс-ты тӧдьы полиэтилен плёнкаен бинялтӥськом. Отчы ву но, мар но уз шедьы ни. Чемошурын та ужез быдэсъя устоез механизатормы Алексей Шкляев. Солы юртто Ольга Шкляева, Сергей Дундученко, Григорьева но Леконцева Валентинаос. КамАЗ машинаен рулон ворттэ Виктор Машковцев.

Алексей Шкляев со рулонъёсты туж ӝог плёнкае бинялтэ. Усто механизатор хозяйствоын 25 ар тырше ни. Солы сётэмын Удмуртиысь Гурт удысъя но сиён-юонъя министерстволэн Данъян грамотаез. Нош толалтэ фермаын ужа, дояркаослы пудо сюдыны юрттэ. «Уг» кылэз уг тоды. Таӵе ӟеч ужась механизаторъёсмы трос. Соос вылын азинске-возиське гурт хозяйство.

Та вакытэ котькытын уж пӧзе. Хозяйствомы бадӟым, кылсярысь, Ледянцы бырем гурт дорозь Чутырысен 25 иськем луоз. Отын клевермы туж удалтэмын, котькуд гектарысьтыз ичизэ 100-120 центнер вож сиён люкаське. Сое «Ягуар» немец техникаен автомашинаосы тыре валтӥсь агрономмылэн атаез Николай Олин. Та лудын ик Е-303 немец косилкаен клеверез туж чылкыт турна Юрий Сергеев, нош валокъёсты огазея Александр Коротаев. Вож сиёнэз силос гуэ нулло КамАЗ-эн Владимир Белых, Т-150 тракторен Сергей Корепанов но мукетъёсыз. Гуосмы ӝог тырмо. Сиёнлэн ӟечлыкез умой луоз.

— Кӧня пудо сиён дасяны чакласькоды?

— Миым Чемошурын выль сушилка лэзим, одӥг часкын 10 тонна тысез куасьтэ. Но туэ мае шертом-тӧлатом — туж секыт вераны. Пудо сиён дасяны куазь умой, уг зорылы, нош тысё но пуртэсо юосмы ляб будо, нош-а мар-а, 2010-тӥ арын кадь, ваньмыз куасьмоз!

Пудо сиён люканъя малпанъёсмы бадӟымесь. Турын дасяно 2 сюрс 125 тонна, сенаж — 4 сюрс 200, силос — 11 сюрс тонна. Сенажмы планлэсь вылтӥ тыремын ни. Силос но турын нуналлы быдэ люкасько. Калыкмы котькуд удысын вожмаськыса ужа. Одӥг но ӝыны сюрс гектар юосмес жаг турынлэсь утим, химпрополка лэсьтӥм. Урожайлы осконмы бырымтэ на. Миым ёросын тысь кутсанъя нырысетӥ инты басьтӥм вал, нош уйпал ёросъёс пӧлын кыкетӥе потӥм. Инкуазьлы оскыса, улӥськом, туннэ-а, ӵуказе-а зороз шуыса.

Геннадий Романов
Туспуктэмез: udmfoto.ru

Удмурт Дунне
By Удмурт Дунне 5 июля, 2013 12:42