Ӟырдыт мылкыд мед паласькоз

Удмурт Дунне
By Удмурт Дунне 19 июля, 2013 10:24
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Ӟырдыт мылкыд мед паласькоз

079055-тӥ июле «Шӧкыч» бамын потэм «Базар» гожтэмез лыдӟыса, мылкыд бугырскиз.

Алнашысь Герберлы трос калык вылӥ дунъет сётӥз, нош Кылбай аламазэ гинэ адӟыны быгатэм, лэся. Та статьяез гожтӥсь мурт, солы 16 арес гинэ, улонэз рос-прос адњемын ӧвӧл. Соин быгатэ-а вал автор дунъет сётыны бадӟым ужрадлы — ачиз со огпол но пыриськемын ӧвӧл на ке таӵе праздникез дасянэ.

Шулдыръяськонэз радъянэ трос кужым но, мылкыд но, дыр но висъямын вал. Герберез ортчытон возь вылэ радъясь комитетэ пырись муртъёс арнялы быдэ кадь потазы. Котькуд шулдыръяськон яке вуз карон, шутэтскон яке ял карон площадка рос-прос чакламын вал. Куноос понна возь вылэз турназы, луд вылысь гопъёсты но ӵошкытъязы.

Гербер 22-тӥзэ ортчиз. Тамында калыкез одӥг район но ӧз на пумиталля вал. Удмуртиысь ёросъёсысь 21 делегация — 1 сюрслэсь трос куноос — лыктӥзы. Алнашъёслэн куно каремзылы синмаськизы палэнысь улосъёсын улӥсь удмуртъёс, фин но эстон куноос. Со сяна, Гербере пырыны быгатӥзы вань мыло-кыдо муртъёс — озьы возь вылын 15 сюрслэсь ятыр калык вал.

Лыктэм муртъёс ужлы ӟудыса ӧз улэ. Соос понна сомында тунсыкоез радъямын вал. Кытысь адӟод на валъёс вылын такем зол ӵошатсконэз? Нош кӧня калык люкаськиз турнасьёс пала — республикаысь кивалтӥсьёс но делегациослэн тӧрооссы кусоос кутӥзы! Тодады вае ай, кыӵе ёросысь Герберын валтӥсь сцена вылын тамында чузъяськиз удмурт кыл? Нош кыӵе тунсыко концерт номеръёс возьматӥзы районысь артистъёс. Валтӥсь сцена вылэ поттӥзы быдэс республикалы тодмо но дано луэм Алнашын кыдам артистъёсты — кыӵе район быгатоз на таӵееныз ушъяськыны?

Зэм, ӝук, оло, ваньмызлы ӧз тырмы. Со трос пуртыен пӧзьтыса дасямын вал ке но. Иське, татын асьмелэн, вань удмуртъёслэн, пичи ке но янгышмы вань — вӧсям ӝукез адями веръяны гинэ кулэ, кӧттырымон сиыны со чакламын ӧй вал, дыр.

Нош кыӵе шырыт луэмзэс возьматӥзы делегациосты пумитась азбаръёс. Ёросысь гурт хозяйствоос но пӧртэм предприятиос, кысык ужъёссы шоры учкытэк, вожмаськыса куно пумитан интыос лэсьтӥзы. Соосты киужъёсын шулдыртӥзы, тунсыко бордгазетъёсын чебер каризы, макем узыр ӝӧк вылъёсын пумитазы. Нош уката сюлмаськизы на кунооссэс шулдыртон понна — кожалод, котькуд гуртлэн аслаз калык артистъёсыз вань.

Таӵе удмурт Гербер кемалась ӧй вал ни. Шулдыръяськонысь бертыса, тросэз делегациос шукыяськись мылкыдзэс ивортыса, тау карыса, Алнаш ёрослэн администрацияз гожтэтъёс ысъязы.

Валамон, кин ке шулдыръяськонэ ӟеч мылкыдын вамыштэ — соку адями ваньзэ ӟечсэ синйылтэ, шумпотэ. Мукет муртлэн, возь вылэ вуытозяз, оло, мылкыдыз урод луиз — соин собыдӟа ужрадысь шекъёссэ гинэ чакласа ветлӥз.

Оскем потэ, алнашъёслэн ӟырдыт мылкыдзы паласькоз яръёслы но. Лымшор ёросысь сьӧразы нуэм Кылдысин пус кужым сётоз уйпалъёслы выльзэ Герберез радъяны.

Нош вань алнаш калыклы вазиськем потэ: эн возе вожпотондэс егит муртлы. Азьланяз мылкыдды медаз куашка бадӟым ужрадъёс радъяны. Тӥ рос-прос ортчытӥды Герберез, талэсь но бадњымъёссэ шедьтыса улэлэ. «Удмурт Кенеш» огазеяськонлэн нимыныз бадӟым тау карисько.

«Удмурт Кенеш» ассоциацилэн тӧроез
Игорь Семёнов.
Туспуктэмез: udmfoto.ru

Удмурт Дунне
By Удмурт Дунне 19 июля, 2013 10:24