Ӟечезлы оскон

Удмурт Дунне
By Удмурт Дунне 9 июля, 2013 11:40

Ӟечезлы оскон

 

Чебер дӥсяськыса, кышноос пото Элен Вӧсе

Чебер дӥсяськыса, кышноос пото Элен Вӧсе

Мар курыса, вӧсясько камсьӧр удмуртъёс?

Камсьӧр удмуртъёс туэ 6-тӥзэ ортчытӥзы вашкала куриськонзэс — Элен Вӧсьсэс. Туэ со ортчиз Пермь улосысь Куеда ёросысь Кирга гуртын.

«Выль сюресын» улон выльдӥське
Сюрес вылэ потӥмы 6 часын ӵукна ик. Ижысь камсьӧр удмуртъёс эшшо вазьгес — автобуссы 5 часын ӵукна кошкиз. Уго мынон сюресмы вакчи ӧвӧл — 250 иськемлэсь данак.

Пермь улослэн лымшор палаз — Башкириен кунгожын — интыяськемын удмурт гуртъёс: Бадӟым Гондыр, Кипчак, Кирга но 3-тӥ участок. Котькуд гуртлэн аслаз хозяйствоез, паймымон чебер удмурт нимъёсын: гондыръёслэн «Горд кужым», кипчакъёслэн «Югдон», киргаослэн «Выль сюрес». Азьло аръёсы татын сельсоветъёссы но нимаз вал, нош муниципальной реформа ортчем бӧрсьы ваньмыз пыризы Бадӟым Гондыр гурт поселение. Таиныз кивалтэ бигер воргорон Фидаиль Гайтиев — удмурт кылын куд-ог удмуртъёслэсь трослы чебер вераськись воргорон.

— Милям поселениямы 3 сюрс 300-лэсь данак улӥсез, 1500 хозяйство, 97, 5 процентэз калыкмы — удмуртъёс, — вера Фидаиль Раульевич. — Уж вань, колхозъёсмы вожмаськыса ужало. Адямиос пуктӥськыны инты куро — 60-лэсь трос заявление кылле, нош музъем уг тырмы. Тани 3 ар ӵоже тырмашиськом (тыршиськом) музъемлэсь статуссэ воштон понна — уго гурт котырысь вань муос гырисько-кизисько. Ӝоген 47 участок сётомы.

Элен Вӧсе калык нуназе котыр лыктыны кутскиз. Таяз радэ удмуртъёс куриськыны лыкто Киргае. Гуртысь воштӥськонъёс — син азьын. Водопроводзэс выльдо, ульчаоссы гудылэм бервыл. Талэсь азьло киргаослы ФАП пуктӥзы — лэсьтӥськонэз вылаз басьтӥз улосысь Заксобрание быръем депутатсы. Табере со ик медпунктэз шунтыны 6,5 миллион манет сётӥз — та уксёен газэн ужась котельной лэсьто. Киргаослэн коркаосазы чагыр эстӥськон уг на вуы. Нош матысь дыре проектсы улонэ пыӵалоз ни, шуо.

Куазь понна
Киргае вуисьёслы йыромыны нокытчы — гуртэ вуисьёсты бадӟым баннер пумита. Удмурт вӧсе вуэмын ёрос администрациысь йырлэн воштӥсез Сергей Клабуков, Ижысь Камсьӧр удмуртъёслэн центрзылэн азьветлӥсез Флюра Чибышева, Башкортостанысь Удмуртъёслэн историзыя но культуразыя центрен кивалтӥсь Татьяна Шайбакова но мукет куноос.

Гурт пумысь вашкала лудэ калык быдэс семьяен лыктэ. Гуртоос пыдын вамышто, ветлыны быгатӥсьтэмъёсты инвалид коляскаосын но ваё. Куноос машинаосын ширто. Киргаын, пе, 560 улӥсез. Нош калыкез сюрслэсь ятыр кадь — озьыен, сомында мурт палэнысь вуэмын!

Лудлэн огпалыз кенерамын. Отчы пырыны быгато вӧсясьёс гинэ — соос 7 кузя. Быдӟым вӧсясь — Башкортостанысь Бурай районысь Алтау гуртысь Анатолий Галиханов. Ӵапак Галиханов агай-вынъёслы луыса кӧня ке ар талэсь азьло улӟиз камсьӧр удмуртъёслэн таӵе Быдӟым вӧсьсы.

Луд вылэ вуэмъёс одно ик кожо кенертэм пала. Татын соослэсь кизэс кобыысь вуэн пылатэ быдӟым вӧсясь. Собере котькуд адями огъя пуйые коньдонзэ сётыны быгатэ — корт уксёез но, бумага манетлыкез но одно ик гылъяса куштоно. Бӧрысь та уксё мыноз огъя сӥль-кеньырлы.

Калык вуэмлэсь азьло ини пиосъёс пудо вӧсязы. Со понна Киргаысь «Выль сюрес» ветыл сётӥз, Башкириысь Алтау, Качак, Каськын, Вараш гуртын улӥсьёс ыжъёс-такаос вандыса вайизы. Кӧня ке пуртыосын ӝук пӧзьто — та котырын но воргоронъёс бергало, одӥг-ог нылкышноослы гинэ соослы юрттӥськыны лэземын.

12 час нуназе кутскиз вӧсяськон. Вӧсясьёс пала кариськыса, адямиос пыдесъяськизы. Микрофон ӧвӧлэн, вӧсясьёслэсь куриськон кылзэс кылыны уг луы, нош киргаос сотэк но ваньзэ валало, лэся. Луд котыр шуккиське «Омин», ваньзы, йырзэс мыкыртыса, музъемозь йыбыртто. Котырак чус-чус, векчи нылпиос но уг бӧрдо, уг алякто. Куриськон вискын султылӥмы но — шундыя куинь пол ас котыртӥд берытсконо, собере пыдесъяськыса нош ик вӧсяськоно.

Куриськонын вис карыса, ӝук сиыны вазё. Котькуд пуртыын пӧртэм љукъёс — огаз рисэн, мукетаз йыдыен, куинетӥяз кӧня ке пумо кеньырен. Ӝук понна вожмаськон ӧвӧл, ваньмыз, бӧлякен, семьяен кариськыса, ӝук сиё. Нокинлэн но мултэс номыр сиёнэз ваемын ӧвӧл — вӧсь интыын ӝук гинэ кушало. Ведраосын, тазъёсын ур-вар вырисьёс ӧвӧл, уго вӧсям ӝукез ваньзэ быдтыны кулэ, тус-тас карыны уг яра. Ӝук сиемзы бере ваньмыз чылкыт ву юо — со быдэс бекчеен ваемын, чай, уката ик аракы, утчась ӧвӧл. Пересьёс верамъя, вашкала вакытъёсы Элен Вӧсь дыръя гуртын одӥг шапык аракы но юыны уг лэзё вылэм.

Ӝук сиён йылпумъяськем бере куд-ог калык кошкыны ӧдъяз — со куноос вылӥллям, тапалась калыклэсь сям-йылолзэ тодӥсьтэмъёс. Таосты кужмо куараеныз берыктӥз «Выль сюреслэн» кивалтӥсез Алексей Кузиев: фестивале дыртӥськоды-а, пе, нош тау карыны кин кулэ? Кошкисьёс нош ик берытскизы: уго кӧт тырем бере адямиос эшшо пыдесъясько на — таяз радэ, Инмарлы тау карыса.

«Мар курыса, вӧсяськиды» юанлы тросэз калык валэктэ: ӟеч куазь медло шуыса, пудо-живот мед удалтоз шуыса, сэре гинэ котькудӥз ас семьяез-нылпиосыз понна куриськонзэ шараяны быгатэ.

Жингыртӥз фестиваль
Вӧсь бере ваньмыз дыртӥзы гуртысь парке — со юри бадӟым праздникъёс ортчытъянлы кылдытэмын. Татын ик сцена ӝутэмын, ӟусъёс пуктылэмын. Вуз карыны лыктэмъёс юзмыт ву, ческыт сиёнъёс, мороженой ӵекто, нылпиослы аттракционъёс ваемын. Нош со вакытэ пӧртэм интыосысь вуэм коллективъёс дасясько фестивальлы. Учкисьёс интыясько, нокин но висъяськыса сиыны-юыны уг пуксьы, нимаз юон дыр уг кары. Калык татчы концерт учкыны потэмын: мӧйыос но, егитъёс но — ваньмызлэн синъёссы сцена шоры мертчемын.

Пермь улосысь удмуртъёслэн котькуд гуртын асьсэлэн культурая но спортъя центръёссы вань, котькудаз ик — удмурт коллективъёссы. Нош татын соос инты сёто вуэм куноослы, асьсэос сцена вылэ потон понна уг вожмасько — «Тюрагай» ансамбль гинэ одӥг йылолэз возьматӥз. Со понна сюрес паськыт усьтэмын вал куноослы — Башкириысь Татышлы ёросысь «Уӵы ныл» ансамбльлы, Нефтекамскысь «Выжы кумлы», Татарстанысь Набережные Челны городысь «Ӟардонлы», Бавлы ёросысь Утор гуртысь кырӟась-верасьёслы, Киров улосысь Вятские Поляны городысь «Чипчирганлы», Ижысь Камсьӧр удмуртъёслэн центрзылэн «Ӟаныкай» ансамблезлы. Одӥг коллектив но сцена вылысь кузьымтэк ӧз васькы. Нош учкисьёслы паймод: гужем шорын ужзы ӧвӧл, кожалод — пӧсь шунды шорын, концерт адӟыса, пуко, киоссэс жалятэк, чабо.

Шырыт сямзыя фестивале пыриськемъёсты киргаос пӧсь шыдэн, ӝӧк выл тыр сиёнъёс пуктыса, утялтӥзы, кырӟаса-вераса бертон сюрес вылэ келязы.

Верано созэ но — тамында калыкез пумитан, фестиваль радъян понна сюлмаськиз Бадӟым Гондыр гурт администрация.

Вуоно арын Элен Вӧсе ӧтчаське Башкортостанысь Бурай районысь Алтау гурт.

Алёна Ионина
Туспуктӥз Иван Лебедев

Удмурт Дунне
By Удмурт Дунне 9 июля, 2013 11:40