Адями ужтэк быре

Удмурт Дунне
By Удмурт Дунне 5 июля, 2013 12:29

Адями ужтэк быре

 

Г. Белозёроваез Герберын пусйизы "Россиысь дано фермер" нимын

Г. Белозёроваез Герберын пусйизы «Россиысь дано фермер» нимын

Можга ёросын фермер хозяйство возисьёс туннэ 87 кузя. Таос пӧлысь 16-ез — нылкышноос. Сардан каргуртысь удмурт кышномуртэ Галина Белозёроваез Герберын пусйизы «Россиысь дано фермер» нимын.

Галина Белозёровалэн пичи дырыз ортчиз Можга ёросысь Поршур гуртын. Еж дыръяз, жадён вакытъёсаз, пудо утялтонэз каргалляз но. Узыргес улӥсьёслы вожъяськонэз но вал. Ёзъёсыз уго чебер дӥсясько, ческыт сиё-юо. Нош соос семьяязы 9 пинал. Галя — самой бадӟымез. Анай-атаез юон вылэ чӧлскылэмен, гидысьтызы пудоез утялтон вылаз усиз. Гурт калык но кивалтӥсьёс мумы-бубызэ отӥгес карыны кутскемзэс шӧдыса, сюлэмыз вирын пыласькылӥз. Соин но, школазэ кельтылыса ик, со анаез интые ӵемысь ветлылӥз фермаысь скалъёсты кыскыны. Секытэсь тыро ведраосты ӝутъяса уг тырмы — доре бертыса, кыед поттоно на. Та тужгес секытэз потылӥз нылашлы. Сузэр-вынъёсыз медаз курадње шуыса, гидэ огзэс но ӧз лэзьялля.

— Эсьма умой мед дышетскозы, малпалляй, — тодаз вае Галина Васильевна. — Ачим «куиньёс» басьямен, тырмоз ни, кожай. Ма, куд-ог предметъёсты «витьлы» но тодылӥ. Но дышетӥсьёс ӟеч отметказэс мыным жаляллязы. Таид пала нокин но дур уз басьты, шуизы, дыр. Малы ке адямиос дышемын ук дӥсья но анай-атайёсъя дунъет сётыны. Но ӟеч дышетскем ёзъёсы туннэ мынэсьтым умой уг уло. Куд-огез аламагес но интыяськиз ай.

Нош соку, еж дыръяз, Галя аслыз ачиз кыл сётӥз: ноку но курытсэ уг юы, кужмо луо, кураськисьёс радысь пото.

Школаез йылпумъямез бере шудзэ утчано кариськиз со колхозазы ик. Пичиысен пудо котырын выременыз, ассэ мукет удысысь ӧз адӟы ни. Скал кыскыны, кунян сюдыны кутскиз. Пичи муртъёсты кадь вешалляз аслэсьтыз сюрооссэ, йӧлзэс жалятэк тросгес сётыны курылӥз. Соосыз кылӥзы, лэся: Галина колхозазы азьветлӥсь вал. Быземез, нылпи ваемез бере но гань-гань ӧз кариськы. Ас дораз котьку вордылћз 7 ыж, 12 скал но парсьёс. Олоку вуттӥське вал котькудӥз дӥне. Эшшо ке тулысысен сӥзьылозь бусыысь ӧз пыралля. Ужась киос тырмымтэен, сое куризы трактор руль сьӧры пуксьыны. Пиослэсь но ӟечгес быдэстэ вал тазэ но оскем ужзэс: чылкыт гыроз-кизёз, бусы сэрегъёсты буш уз кельты.

Зэм, таӵе кужмо кышномурт вӧзын картэз ӧз чида — курытсэ ӟамыръяны ӧдъяз. «Вож кыен» эшъяськисьёсты адӟемпотостэм карись Галина Васильевна вожомиз. Сомында уж вань дыръя кызьы, пе, аракы юыса, лӧж-лӧж пукод, уксёдэ пож вулы кисьтод но сое ӧскыса поттод. Таин сэрен одӥг юртын ӵош улыны ӧз быгатэ ни. Кышномурт эшшо но мургес выйиз уж пӧлы.

* * *
Котькуд ужез сюлмысь но гижысь-пиньысь быдэстэмысьтыз ик, ёросысь кивалтӥсьёс ӵектӥзы Белозёровалы Сардан каргурт котыре интыяськем лесокомбинатлэсь куашкам гидъёссэ басьтыны. Со вал 20 ар талэсь азьвыл. Туннэ ачиз гинэ тодэ, кыӵе шуг-секытъёс пыртӥ потћз со 450 гектар аналтэм музъемез выльысь улӟытон понна. Секытлы чидатэк, бӧрдыса ортчытэм уйёсыз но вал. Кредитэ пырытэк, уксё люканы быгатӥз. Кӧс нянь вылын но пукемъёссы вал. Тужгес секыт йӧтӥз нырысетӥ тракторзэс басьтон. Соку одӥг трактор ньыль легковой машина тыр сылэ вал.

Но мытэм удысэзлэсь ӧз куштӥськы. Бурдъясь но сюриз — оскымон воргоронэз пумитаз, ӵош улыны кутскизы.

Али Белозёровалэн фермаяз 120 скал, 174 парсь, 800 ыж, 25 вал. Пилорама басьтӥз.

— Нылы огпол юаз ик: малы тыныд сомында пудо? — тодаз вае Галина Васильевна. — Шуи: кытын ке но ужано ук, тӥледыз но сюдоно-вордоно. Ваньзэ аналтомы шат? Табере та ваньмыз асьмелэн! Мон шумпотӥсько, сомында пудомы вань шуыса. 1 валысь 25 карыны быгатӥ ук та аръёс ӵоже! Асьмелэн котькуд нунал ужмы вань, ӝӧк вылысьтымы уг бырылы вӧй, йӧл. Та шуд ӧвӧл шат? Куд-огезлэн ужан интыез гинэ но ӧвӧл.

Адями ужтэк бырыны-сисьмыны кутске.

Пиезлы городэ квартира но басьтӥз вал. Но кыкез ик нылпиосыз туннэ бордаз ужало. Сарданын улӥсьёслы но уж сюриз. Гуртоос кытчы кариськыны паймо вал ай. Татын уго 8 корка сяна ӧвӧл ни. Нырысетӥ картэз но бордаз ик тырше. Белозёрова сое ачиз ик дораз ӧтиз: нылпиосыд но татын ик, тон но лыкты, пе. Мукет азе мынон инты ӧвӧл ук. Азьвыл колхоззы куашказ. Али нырысетӥ картэз но вала ужлэсь кулэлыксэ, кылмы тупагес ни, шуэ нылкышно. Туала картэз нырысетӥез шоры нырысь-валысь кырыжгес ик учкылэ вал. Табере ӵош тыршо ни. Нылкышно вожан муг уг сёты.

Ма, ачиз но Белозёрова воргоронъёсын артэ ик пудозэ сюдэ но, кыске но, кулэ дыръяз йӧнатэ но, пастуха но. Монэ, пе, уд вошты ни — ваньзэ чиданы, ас вылам нуыны дышемын. Йӧлзэ гинэ но «Можгасыр» заводэ, молоковозлэн руль сьӧраз пуксьыса, ачиз ворттэ. Ас синмыным, пе, адӟеме потэ, кыӵе сортэн, кӧня белокен кошке йӧл.

* * *
Вожъяськисьёс нылкышнолы лачак. Ужаны азьтэмъяськисьёсыз ик золгес куртчыны выро ай.

— Кӧс 2010-тӥ ар сюлэмысь уг поты ни, — тодаз вае фермер. — Иже мынӥ. Нылы жингыртэ: кин ке лыктӥз но гидъёстӥмы ветлэ, пудомес лыдъя. Воксё юатэк-вератэк вуиз. Бӧрысь тодӥ: ёрос администрациысь воргорон ветлэм. Ас синмыным, пе, адӟеме потӥз, кӧня йыр пудоез. Ӧй, пе, оскы вал, сомында шуыса. Со интые юа вал, тырмыт-а мынам пудо сиёнэ дасямын, кыӵе юрттэт кулэ шуыса! Но таиз огезлы но тунсыко ӧвӧл. Коть сюроосыд сютэм мед кулозы! Ярано коть, ӟеч адямиос шедё но ужамез дунъяло на. Дано фермер ним сётэмзы но туж бурдъяз монэ.

Галина Васильевна, кык ар ортчыса, пенсие потон вакытсэ пумиталоз. Но кивалтон биньгозызэ нокинлы но сётыны туннэ со дась ӧвӧл. Тазалыке тырмиз ке, 70 аресозь но кивалто, шуэ со.

— Пудоме но йылэтыны малпасько на, — вера Белозёрова. — Куинь фермаез буш уд возьы ук. Эшшо ке алигес ваньзэ выльдӥмы. Зэм, парсь вордӥсьёслы али секытгес йӧтэ. Россия Дуннеысь вуз каронъя огазеяськонэ пыремен валче, сӥлен вырись комбинатъёслэн, дунтэм сӥлез утчаса, асьме дорын будэтэм нурскетӥсьёсты басьтэмзы туж уг поты. Али одӥг парсь 5 сюрс манет тыр сяна уг усьы ни. Но ми та югдурысь потон амал шедьтӥськомы ни кадь. Сӥльмес тросгес, шашлык карыса, вузаломы. Озьы 1 парсь 20 сюрс манет табыш ваёз. Пельнянь кутыны кутскомы, голубцы лэсьтомы. Улон котьмалы дышетэ — тазэ но удысэз вормомы.

Елена Сараматова
Туспуктэмез: udmfoto.ru

Удмурт Дунне
By Удмурт Дунне 5 июля, 2013 12:29