Юнме куалекъян?

Удмурт Дунне
By Удмурт Дунне 7 июня, 2013 10:33

Юнме куалекъян?

Сӥль дун усе ке, малы колбаса уг дунтэма?

Сӥль дун усе ке, малы колбаса уг дунтэма?

Шукке-а Удмуртиез Россилэн Дуннеысь вуз каронъя огазеяськонэ (ВТО-е) пыремез? Та юанэз 6-тӥ июне сэрттӥз-пертчиз Удмуртиысь Общественной палата А. Волков Президентэн ӵош.

Аслэсьтыз малпанъёссэ нырысь ик шараяз экономика наукаосъя доктор Олег Боткин. Залын пукисьёсты со воксё гуньдытӥз: Россия, пе, дась ӧй вал ВТО-е пырыны — гурт удысмы пумен быроз.

— Асьме дорын поттэм товармес мукет кунъёсы келяны, правоосмес утьыны дась луись специалистъёсмы гинэ но ӧвӧл. Вуз карон удысэз рос-прос валась юристъёс сярысь веранэз ик ӧвӧл, — лулӟе О. Боткин. — Гурт удыслы кунмы пумен юрттыны но уз быгаты ни — ВТО-ысь куронъёс киоссэ керттылозы. Озьы 2017-тӥ арозь Россиысь хозяйствоослы 4,5 миллиард доллар гинэ на висъялоз. Туннэ та лыдпус 9 миллиард доллар.

Асьмемыз сюдымон йӧл-сӥль поттыны гинэ но ум ни ворме кадь йӧтэ. Соин гинэ уз тырмы. Россиысь музъемъёсты эскерыны мылкыд карисьёс кунгож сьӧрын трос гинэ луозы. Кылсярысь, мувӧй люкаськем выль интыосты шараязы, сое кыскыны кутскизы ке, кивалтӥсьёсмы соосты дугдытыны уз быгатэ. ВТО-лэн куронъёсызъя уго сыӵе утчаськисьёс-эскерисьёс музъемысьтымы мар шедьтэмзэс но асьмелы вератэк кельтыны быгато. Та туж кышкыт, — вераз О. Боткин.

Но туннэ берлоез пумысен йырез сокем-сокем тӥяны кулэ меда? Промышленностья но энергетикая министр Олег Радионов оскытэ ук: музъем узырлыкез поттон Удмуртиын умой азинскемын. Мувӧй кысконэз ик верано ке, кылем арын асьмеос ог 11 миллион тонна сое поттӥмы. Азьло 10 миллион тоннаозь но уг вуы вал. Мукет удысъёсмы но синмаськымонэсь. Кылсярысь, кунгож сьӧры трос кошке электрооборудованимы, пияла я солэсь лэсьтэм арбериос. Быдэс промышленностез учконо ке, та удысын уждун берло дыре 15 процентлы йылӥз — шорлыдын 20 сюрс манет луиз.

Зэм, капчи промышленность зол чутэ. Но та югдурез но пумен вырӟытыны луоно, дыр, пӧртэм программаосты но субсидиосты уже кутыса. Нюръяськоно на вал куртчылӥськись кредитъёсын. Кылсярысь, предприятиослы банкъёс али 22 процентъем кредит сёто, нош США-ын — 2 процентъем. Валамон ни: таӵе югдурын США-ен вожвылъяськыны туж шуг.

* * *
Промышленностьмы ВТО-лэн бурд улаз, оло, юнмалоз ик ай. Кунгож сьӧрын уго туж зол дунъяло асьмелэсь сьӧд но чибориё кортъёсмес. Нош гурт удыс, зэмен но, али ик зурка ни. Тани ма со сярысь вера гурт удысъя но сиён-юонъя министрлэн воштӥсез Виктория Ушакова:

— 1990-тӥ арын Россиысь вань улосъёс пӧлын йӧл кысконъя Удмуртия басьтэ вал 39-тӥ инты. 2012-тӥ арын асьмеос 6-тӥ интыын вал ни, нош Приволжск федерал округе пырисьёс пӧлын — 3-тӥ. Ма, вань поттэм йӧлмы пӧлысь 63,8 процентэз вылӥ сортъем лыдъяське. Шумпоттыны кутскизы ни вал парсь но курег вордӥсь хозяйствоос. Таосъя асьмеос Россиысь улосъёс пӧлын 5-тӥ но 2-тӥ интыосын. Но мар луоз туэ — вераны ик шуг. Уноез сӥлен вырись комбинатъёс асьме гидъёсын будэтэм пудоез басьтэмысь дугдӥзы. Кунгож сьӧрысь ваемез дунтэмгес усе, пе.

Палэнысезлэн ӟечлыкез шоры учкемысь воксё дугдӥзы. Озьы республикаямы скал сӥль дун 15 процентлы усиз, парсь сӥль — 20 процентлы.
Виктория Ушакова югдурысь потыны амал шедьтӥськомы кадь, шуиз. Кылсярысь, покчи классъёсын дышетскисьёсты гинэ йӧлэн сюдоно ӧвӧл, нимысьтыз программа кылдытоно нылпи ваёно но пинал ваем кышноос пумысен но. Сыӵе программаосты улонэ пыӵатыны нокыӵе ВТО уг люкеты. Озьы, Удмуртия быгатоз хозяйствоосмылы пичи ке но юрттыны.

* * *
— Туннэ ВТО кылэз кыло ке, уноез куалекъяны ӧдъяло. Юнме! Шаркан ёрос, кылсярысь, одӥг но уг куректы. Син медам усьы, но ми пушйиськомы, — шуэ Шаркан ёрослэн йырыз Александр Прохоров. — Зэм, 2001-тӥ арын ик юн кариськимы. 1998-тӥ арын районамы 29 колхоз лыдъяськиз. Куд-огезлэн нимыз гинэ вал — ужаны кужымзы ӧз тырмы. Бусыоссы но, гидъёссы но пашмизы. Тазьы кыдёке уд вуы шуыса, 14 колхоз кельтӥмы. Соосын туннэ кивалтэ 12 мурт. Пайдаез шӧдскымон. Кылсярысь, 2000-тӥ арын районмы кыске вал 16 сюрс 934 тонна йӧл. Туннэ 32 сюрс тонналэсь ортче! Туннэ районамы 8 сюрс 980 скал. Та лыдпусъя республикаын ми басьтӥськомы 5-тӥ интыез, Глазов, Ува ёросъёслэсь площадьмы пичигес ке но. Район ас кужыменыз 1 миллиард 91 миллион манет тыр ваньбур поттӥз!

Вераськонъёс ветло: ю-нянь будэтыны осконо юн хозяйствоослы гинэ. Малпасько: озьы карыны уг яра. Ӟечгес луоз, та вакытлы бадӟым кредитэ пырем хозяйствоослэсь пунэмъёссэс кысыса я 10 арлы ке но «кынтыса». Озьы котькудӥзлэн хозяйстволэн луонлыкез кылдоз ӝутскыны. Мукет амал но вань: субсидия висъямысь дугдоно, со интые вытлэсь быдӟалазэ кулэстоно.

* * *
Вань та мылкыдъёсты-малпанъёсты Президент А. Волков но Общественной палатаысь ёзчиос туж сак кылзӥзы. Вань ӵектонъёсты санэ басьтомы но Россиысь Общественной палатае вуттомы, шуизы. Таосыд, пе, вылӥ кивалтӥсьёслы вазиськыны быгатозы ни. Улонын оломае но чидамы ни, ВТО азьын гинэ ум чигналэ, шуиз А. Волков.

Елена Фёдорова
Туспуктэмез: udmfoto.ru

Удмурт Дунне
By Удмурт Дунне 7 июня, 2013 10:33
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<