Утялтӥзы Дыдыксин, Италмас но Зангари

Удмурт Дунне
By Удмурт Дунне 11 июня, 2013 12:54

Утялтӥзы Дыдыксин, Италмас но Зангари

А. Бердова

А. Бердова

Глазысь Эшъяськон юртлэн ужамез пумысен кенешиськом пӧртэм калыкъёсын ужась ёзысь методистэн Антонина Борисовна Бердоваен.

— Удмурт нылпи кырӟанлы сӥзьыса, туэ ми ортчытӥмы «Удмурт гуръёс» фестиваль. Отчы пыриськизы Юкаменскысь, Ярысь, Балезиноысь, Глаз карысь но ёросысь удмурт нылпиос. Ваньзы туж чебер но яркыт дӥськутъёсын дӥсяськемын. Эшъяськон юртэ туж трос калык люкаськиз, фестиваль кык нунал ӵоже кыстӥськиз. Ӧтчамы Удмуртиысь калык артисткаез Надежда Уткинаез. Вормисе потэмъёслы со ик синпель кузьымъёс но тау каронъёс сётъяз. Фестиваль ворсаськыку, Надежда Эдуардовна финалэ потэм нылъёсын ӵош гала-концерт возьматӥз. Со Глазов палан улӥсьёслы бадӟым ужрад вал. Учкисьёс но конкурсэ пыриськем нылпиос ӝутскем мылкыдын люкиськизы, вуоно арын нош люкаськом, шуизы.

Глазовысь В. Короленко нимо пединститутын инкуазез утёнлы сӥзем «Мынам пичи дуннее» научно-практической конференция ортчытӥм. Соин кивалтӥз Альбина Владимировна Баженова. Та конференцие но трос ёросъёсысь мылкыд карисьёс пыриськизы. Туж тунсыко со ортчиз.

Уйпал ёросъёсын улӥсь егитъёс понна ортчытӥмы этно-дискотека. Таиз ми понна ӵыжак-выль вал. Ужрадмы тунсыкогес мед луоз шуыса, отчы удмурт сэрег усьтӥмы. Ӝӧкъёс пуктылӥмы, соосты чебер пужъятэм но чильпам ӝӧккышетъёсын валимы. Ӝӧкъёс вылэ удмурт пӧраськемъёс тыримы. Нимысьтыз официантъёсмы вал — Дыдыксин, Италмас но Зангари. Соос калыкез быгатыса, удмурт кырӟанъёсты кырӟаса, утялтӥзы. Ӝытэ туж трос калык люкаськылӥз, ваньмызлы пуксьыны инты ӧз окмы. Малпамы, азьланяз таӵе ужрадъёсты бадӟымгес интыын ортчытъяно шуыса. Удмуртъёс угось трос люкаськыло ини, мыло-кыдо пырисько котькуд ужрадэ. Соиз шумпоттэ: ӝытэ лыктэмын вал Глазов ёрослэн йырыз Юрий Дягилев но Глазовысь егитъёсын ужанъя отделэн кивалтӥсь Андрей Ушаков. Андрей Борисович удмурт кылын одӥг кыл ке но уг вала, пумозяз пукиз, ӧз кошкы. Тросгес мед ветлозы вылэм таӵе ужрадъёсы бадӟым кивалтӥсьёс.

Туэ нырысьсэ «Удмурт нылкышно кенеш» кичӧлтэм улсын «Чупчипал Чеберай — 2013» конкурс ортчытӥмы. Ужрадэ пыриськизы 6 нылъёс. Нырысетӥ интыез басьтӥз Глаз ёросысь Люм гуртысь Даша Григорьева. «Дыдыкай» ним шедиз Понино черкогуртысь Катя Урсеговалы. Визьмо ныл луиз Глаз пединститутысь Даша Лекомцева. Ужрадэ пыриськем нылашъёслы ваньзылы ик синпель кузьымъёс но дипломъёс сётъямы. Та ужрад Понино черкогуртысь культура юртын ортчиз. Калык туж трос люкаськылӥз.

Туэ май пумын Глаз ёросысь Карась гуртын бадӟым ужрад ортчытыны малпаськом. Со гуртын усьтӥськоз «Карасево» туристической центр. Гурт шортӥ ик бызе Жаба шур. Солы сӥзьыса, гуртлэн историез, калыкез сярысь трос материал люкамын ни. Куке-соку отын черксы вылэм. Ужрадэ пыриськозы уйпал ёросъёсысь пӧртэм коллективъёс. Котькуд калык ас сяменыз возьматоз эбеклэсь улэмзэ-вылэмзэ.

Ёросамы трос пӧртэм калыкъёс уло. Удмуртъёслэн, ӟучъёслэн, бигеръёслэн но мукетъёслэн огазеяськонъёссы вань — ваньмыз укмыс. Котькудӥз огазеяськон быгатыса но синмаськымон ужа.

Любовь Тихонова

Удмурт Дунне
By Удмурт Дунне 11 июня, 2013 12:54
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<