Турналод — ӝук сиёд!

Удмурт Дунне
By Удмурт Дунне 11 июня, 2013 10:55
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Турналод — ӝук сиёд!

1992-тӥ арын Гербер ортчиз Алнаш ёросысь Кузёбайын

1992-тӥ арын Гербер ортчиз Алнаш ёросысь Кузёбайын

29-тӥ инвожое Алнаш черкогурт вӧзын ортчоз элькун Гербер

Гужгетыса Герберлы дасяське Алнаш ёрос. Районысь кивалтӥсьёсты та дыре интыысьтызы шедьтыны уг луы — соос нуналмысь потало элькун шулдыръяськонэз ортчытон интые.

Кызьы ивортылӥм ни, Герберез радъяны чакламын Блатгурт палан, Алнаш шур котырын. Ёросын котькуд гурт поселенилы висъямын быдэстоно ужъёс. Нош гурт хозяйствоослы но трос мукет предприятиослы оскемын куноосты сюдыны-утялтыны. Уго ёросэ 21 делегация возьмало — 1 сюрслэсь ятыр муртэ. Куноосты алнашъёс нырысь ик ужатыны малпало — делегацилэн йырыз, пе, кусо кутоно луоз. Пӧсям вузы васькем бере гинэ вӧсям ӝук сиёзы.

Алнаше лыктыны быгатозы котькуд мылкыд карисьёс. Кылсярысь, кылем арын Лудорвае 10 сюрс пала мурт ветлӥз. Алнаше, оло, сомында мынӥсь уз луы, озьы ке но 5 сюрслэсь ӧжыт уз люкаське.

Республикаысьтымы Эшъяськон юрт кыл кутэ ужрадэз шулдыртон понна. 10-тӥ июнёзь отчы вазиськизы кырӟаны-вераны мылкыд карисьёс. Та нуналлы тодмо ни 30-лэсь трос коллективъёс но кырӟасьёс сярысь. Соосты адӟыны быгатомы «Мыло-кыдо» площадкаысь.

«Шундэктон» инты понна кыл куто «Шунды» огазеяськонысь егитъёс. Пинал калык понна конкурсъёс но эктонъёс кутскозы 7 часын ӝыт — кыстӥськозы уйшор вуытозь.

Кыӵе Гербер луоз вожвылъяськонъёстэк. Куноосты пумитась Анлаш батыр эскероз пукыӵен ыбылӥськыны быгатэмез но, дунъялоз вал вылын ворттылӥсьёсты но, мукет амалъёсын ӵошатскисьёсты но.

Мар сётэ элькун Герберез ортчытон ёросъёслы? Та сярысь верало «Удмурт Кенешлэн» ёзчиосыз.

Ассоциацилэн президентэз Игорь Семёнов:

И. Семёнов

И. Семёнов

— Малпасько, Герберез ёросъёсы выжтыса, трослы умойгес. Район гинэ солы уг дасяськы, котькуд гурт но сюлмаське кадь, потэ мыным. Юрт кузёос дор котырзэс утялто, азбарзэс, капка азьзэс сузяло, кенерзэс ӝуто, палисадниксэс буяло.

Празднике ветлэмъёс ӵошато, кызьы ужрад кылем арын ортчиз, маин таиз шулдыръяськон висъяське. Таӵе ӵошатскон туж пайдаё, соин котькуд район тырше умойгес ортчытыны. Ёросын утчало тужгес синмаськымон, адӟем карымон удмуртъёсты. Кызьы республикаысь Гурт шудонъёс арысь аре золгес луо, озьы ик Гербер но кужмогес, чебергес ортче.

Мон тросаз шулдыръяськонъёсы вуылӥ. Озьы ке но али но тодам Кизнерын ортчем Гербер. Пичи тымет дурын туж шулдыр интыын ортчытӥзы выль кен пылатон йылолэз. Собере куазь дурыныз кисьтыса зориз. Котмыса но, калыклэн мылкыдыз ӧз пуксьы, кема шулдыръяськизы на.

Паймымон чебер инты бырйизы Дэбесын — Варни гурт вӧзысь Байгурезь. Программаез но сыӵе зол дасямын вал. Али но син азям удмурт дӥсен пӧрмытскем пичи нылъёс но пиос.

Гырон-кизён ужъёс бере шулдыръяськон ортчытонмес асьмелы вунэтоно ӧвӧл. Та пересь песятайёсмылэн кылем йылолзы. Озьы бере, али но вӧсям ӝук сиёно, куриськоно ӟеч ю тысь басьтон понна, куспамы тупаса улон понна.

Г. Сидоров

Г. Сидоров

Геннадий Сидоров, Ува ёросысь Узей-Тукля гуртысь Кибашлыослэн юртэнызы кивалтӥсь:

— Одӥг Герберез но кельтэммы ӧвӧл. Киужъёсмес нуллӥськомы ке но, барыш поттон понна ум ветлӥське. Туж шумпотӥськомы кибашлыослэн азбаразы шаерысьтымы вылӥ кивалтӥсьёс кожо, ушъяло ке. Калык кырӟан-эктонъёс сяна, та ужрадын удмуртъёслэн киужъёссылы бадӟым саклык висъяло. Гербер ёросъёсын ортчыку, куно пумитасьёслэн йылол-сямъёсынызы тодматскиськомы. Одӥг интыын ортчыку, азьпал ик тодӥськомы кытчы султон интымес но нимысьтыз экспонатъёс лэсьтыса дасяськомы.

В. Иванова

В. Иванова

Валентина Иванова, Алнаш ёрос администрациысь специалист:

— Куно пумитан — бадӟым дан, нырысетӥ Гербер но Алнаш ёросысь Кузёбай гуртын 1992-тӥ арын ортчиз вал. Таяз учыре но ужрадлы быдэс ёросэн дасяськиськомы. Берло дыре Герберлэн удмурт шӧмыз ӧжытгес кылиз, кожасько, сое но берыктыны кулэ. Бен, вань ужрадэз анай кылын гинэ уд нуы, пӧртэм выжы калыкъёс дорамы куное дасясько бере. Куно пумитан сяммес утёно луоз.

8

М. Главатских

Мария Главатских, Марий Элысь удмурт культурая центрен кивалтӥсь:

— Коллективенымы котькуд ар Гербере ветлӥськомы. Ёросъёсын ортчись ужрадъёс шулдыресьгес, гуртоослы но сюлэмзыя матынгес кадь потылӥзы. Куно пумитась ёрослэн улэм-вылэменыз тодматскыны луонлык кылдэ. Нош мукет ласянь, Лудорвай музей-заповедникын интыез паськыт, вӧл-вӧл. Кылем арын ӝыт шулдыръяськон но радъямын вал.

Н. Иванова

Н. Иванова

Наталья Иванова, «Удмурт Кенешлэн» Кез ёросысь ёзэныз кивалтӥсь:

— Гербер шулдыръяськонэ одӥг пол гинэ пыриськи — Дэри ёросысь Тяма гуртэ. Калык шулдыръяськон туж кельшиз. Мукет ёросъёс но куно пумитаны тыро-пыдо дасясько. Та дырозь Кезлы ӧз кылды на Герберез ас ёросамы орчытыны. Пичи каргуртамы ми но шаерамы ортчись бадӟым ужрадъёсты умой радъяны быгатӥськом: Гурт шудонъёс ортчытӥм, алигес пусйимы Вӧйдырез. Оло, вуоно аре Герберез но ми дорын ортчытозы, со сярысь вераськонъёс юнме уг ветло, дыр, ёросын.

Елена Скворцова, Валентина Емельянова

Удмурт Дунне
By Удмурт Дунне 11 июня, 2013 10:55
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<