Турнало, лысву усьытозь

Удмурт Дунне
By Удмурт Дунне Июнь 27, 2013 14:15

Турнало, лысву усьытозь

 

"Югдонын" клеверзы удалтӥз

«Югдонын» клеверзы удалтӥз

Пичи Пурга ёросын гурт хозяйствоос пӧлысь одӥгез огсыр азинскисез, пыд йылаз сылӥсез луэ «Югдон». Хозяйствоез бадӟым уд шуы, гыроно-кизёно муэз кык но ӝыны сюрс гектар. Эшшо кӧня ке сю гектар музъем гыро-кизё, арендаын возё Норъя по Постол палъёсын.

СПК-ез 13 ар ӵоже валаса но быгатыса нуэ ни йӧно удмурт кышномурт Надежда Баранова. Талэсь азьло со татын 20 ар валтӥсь бухгалтер луыса ужаз.

Нуназе котыр пумиським эштос кузёен — Надежда Васильевнаен. Али, пе, милям ваньмыз сямен калыкмы, фермаын ужасьёс сяна, пудо сиён дасянын тырше. Гужемлэсь ортчемзэ но уд шӧдылы, вуоз тол. Солы али ке ӧд дасяськы, йӧлыд но, сӥльыд но уз луы.

Кӧня ке вис карыса, Надежда Васильевна веранзэ азьланьтӥз:

— Азьло аръёсы сямен ик, туэ но 1 сюрс 100 гектар трос аръем турынъёсмы. Хозяйстволы дасяно 500 тонна турын, сенаж но силос — быдэн 4 сюрс тонна. Фуражмы 2 но ӝыны сюрс тонна луоз. Оглом вераса, йырлы быдэ 30 центнерлэсь уно кормовой единица пудо сиён люканы чакласьком. Со толбыт сюдыны тырмоз, но йӧл поттонмес ум кулэстэ.

Вераськон куспамы конторае вуиз гуртысь одӥгез дано но быгатӥсь адями — бригадир Иван Крючков. Таза мугоро воргорон хозяйствоын 40 ар пала ужа ни, нош бригадирын — 18 ар. Солэн сузэрез Светлана Иванова «Югдонын» валтӥсь агроном луэ.

Иван Петровичен Починка бусые вуэммес ик ӧм шӧдэ. 150 гектар вылын клевер синмаськымон чебер будэм, котькуд гектарысьтыз ичизэ 150-180 центнер вож сиён люкаське. Сое ХТЗ-150 кужмо тракторен турна эштосысь азьмынӥсь механизатор Иван Иванов. Со 34 ар нянь будэтэ ни. Солы сётэмын «Удмуртиысь гурт удысысь дано ужась» ним. Вож сиёнэз силос гуэ чупрес нулло водительёс Анатолий Соловьёв но Рудольф Тёмкин.

И. Иванов котыр бӧрсьы котыр лэсьтэ, дыртэ, туннэ, пе, бусыез турнаса быдтоно.

Хозяйствоын вань ужъёс радызъя мыно. Силосэз ДТ-75 тракторен ӟеч-ӟеч лёгало Вячеслав Пушкин но Виталий Мушегов. Толалтэ эшъёс фермаын тыршо: Виктор миксерен сиён дася, Сергей кыед утялтэ. Эштосын музъем ужасьёс сярысь трос сюлмасько. Механизаторъёсты нуназе ческыт сюдо пӧрасьёс Антонида Верёвкина но Валентина Пислегина. Нош ӝытазе бусые сиён вуттэ ачиз бригадир Иван Петрович.

Кабыста гурт дорысь лудын но уж пӧзе. Кӧс турынэз чурен-чурен валоке тыре Анатолий Черняев. Рулонэ прессовать каро Сергей Сидоров но Виктор Иванов. Кӧня ке нунал талэсь азьло та бусыез асьсэос ик турназы. Рулонъёс син азьын йыло. Ӝытазе лысву усьытозь, ужало механизаторъёс.

Турынэз рулонэ керттылӥсьёс С. Сидоров но В. Иванов

Турынэз рулонэ керттылӥсьёс С. Сидоров но В. Иванов

Ӝоген дорамы вуиз агроном Светлана Петровна но. Мылкыдыз умой. Тыршемзылэн емышех син азьын.

— Берло дыре ми асьмеос трос аръем турын кидысъёс дасяны кутским, — шуэ агроном. — Пайдаез бадӟым. Клевер лудъёсмес, ар ортчыса, гыриськом, люцерна кемагес возиське. Озьы музъемлэн удалтонэз ӝутске. Куроез вандылыса бусые кельтӥськом, кын улэ гыриськом. Со но юрттэ музъемез умоятыны. Нош туэ тулыс ю потэмъя, ӟечлыксыя ёросын вормисе потӥм. Сыӵе азинскон кожаз уг лыкты. Тулыс вань кидысъёсмес кондициозь вуттӥм. Арысь аре кидысмес выльдӥськом. Миым «Омская-39» чабей басьтӥм, «Раушан»йыды, «Конкур» (элита) но «Галоп» сезьы.

Пудо сиён дасян нуналмысь кужмоя. Турын люкаське, силос гуос тырмо жалем сиёнэн. Нош азьпалан — юосты аран. Эштосын солы дасясько ни КЗС-ысь барабанэз выльдон сярысь сюлмаське валтӥсь инженер Василий Геннадьевич Бектышев. Воштос ёзъёс утча. Татын операторъёс луыса мылысь-кыдысь тыршо Леонид Соловьёв но Михаил Лебедев, складын ужало Светлана Широбокова, Алевтина Ардашева но Галина Парськукова.
Кошкон азямы эштос кузё Надежда Васильевна шумпотонзэ вератэк ӧз чида:

— Пудо сиён дасяны кутскемлэсь азьло, уждун тыронмес рос-прос учким но тарифъёсты кык поллы будэтӥм. Калык шумпотӥз, но йылэтэм уждун ӧм сётъялэ на. Но малпанмес, капчи ӧз ке но луы, одно ик быдэстом. Со юрттыны кулэ егитъёсты гуртэ кельтыны но азинлыко ужаны.

Геннадий Романов

Туспуктэмез: udmfoto.ru

Удмурт Дунне
By Удмурт Дунне Июнь 27, 2013 14:15
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<