Скалэз мар кысконтэм кадь…

Удмурт Дунне
By Удмурт Дунне 10 июня, 2013 15:01

Скалэз мар кысконтэм кадь…

9

Асан техникумысь Артём Коренев

Асан совхоз-техникумын элькунысьтымы студентъёслэн но гурт удысын ужась 3-тӥ слётсы ортчиз. Асан музъем вылэ ог-огенызы вожвылъяськон вылысь люкаськизы 21 ёросысь 100 пала егитъёс.

Ужрадэз сӥё-дано усьтонэ пыриськизы элькунысьтымы егитъёсын ужанъя министр Владимир Соловьёв, гурт удысъя но сиён-юонъя министрлэн воштӥсез Пётр Соболев но Ижысь гурт удысъя академилэн ректорезлэн юрттӥсез Оксана Долговых. Асан техникумысь искусствоосъя школаын дышетскисьёс но агротехникумысь «Певческое братство» ансамбльысь пиос люкаськемъёслы асьсэлэсь кырӟанъёссэс но эктонъёссэс кузьмазы, ӵошатскыны капчи мылкыд сётӥзы.

Ӵошатскон кык нунал кыстӥськиз. Нырысетӥ нуналаз егитъёслэсь тодон-валанъёссэс юанъёс пыр эскеризы. Тросэз конкурсэ пыриськисьёс теориын ӧз шугъяське, малы ке шуоно юанъёслы соос ёросъёсазы ортчем конкурсъёсын валэктонъёс сётъязы ни вал. Секытгес йӧтӥз практической люкетэз. Кылсярысь, скал кыскисьёс аппаратъёсты сэрттӥзы-пертчизы. Куд-огезлэн «Майга» аппаратэн ужамзы но ӧй вал на.

Скал кыскисьёс радын вал куать пиос но. Соос пӧлысь ньылез — Ижысь гурт удысъя академиын 3-тӥ-4-тӥ курсъёсын дышетскисьёс. Соослэн практиказы но бадӟым ӧвӧл на ке но, ас кужымзылы оскизы, лэся. Ма, скал кыскон тӥрлык азьын но долкаса ӧз сылэ — куд-ог нылъёслэсь шаплыгес ужазы ай.

Куинь кужмоосыз студентъёсты но куать специалистъёсыз гинэ ӵуказеяз ӵукна скал доры матэктыны лэзизы: мед, пе, возьматозы табере йӧл кыскыны быгатэмзэс. Татын асэнызы данъяськизы ни колхозъёсысь вуэм нылъёс — скалъёсты вешаны но валало, аппаратсэс вераосы ӝог быртто. Ӧжыт секытгес вал студентъёслы. Но соос но ужзэс пумозяз вуттӥзы.

Со вие ик механизаторъёсты возьмазы мастерскойын. Кӧня ке экеос тракторе пуксьылыса вуизы ик. Нош гурт вадьсын люкаськем пилемъёс кутскем ужез пумозяз лэсьтыны ӧзгес сётэ. Озьы кыкетӥ нуналаз пиослэн ужзы кемалы кыстӥськиз.

Тани вуиз тужгес но сюлмаськытӥсь вакыт. Трактористъёсъя йылпумъянъёс лэсьтӥз гурт удысъя академиысь доцент Николай Касимов.
Устоез егит тракторист-машинист луиз Кез ёросысь Николай Буторин. Кыкетӥ интыез басьтӥз Дебес ёросысь «Надежда» эштосысь Владимир Белослудцев. Куинетӥ инты сётэмын Юкаменск ёросысь Алексей Сысоевлы. Студентъёс пӧлын висъяськизы Асан техникумысь Артём Коренев но Ижысь гурт удысъя академиысь агроинженерной факультетын дышетскисьёс Владимир Петров но Илья Ширяев.

Кореневлы юрттӥзы, дыр, ас техникумезлэн борддоръёсыз но, ӵош дышетскись эшъёсыз но. Со конкурслэсь вань куронъёссэ шугъяськытэк быдэстӥз. Артём вордӥськем Сарапул ёросаз берытскыны малпа.

— Мон Шевырялово гуртысь, шуэ со. — Атае сямен ик, тракторист луо. Техникумын басьтэм тодон-валанъёсы азьланяз туж яралозы шуыса оскисько.

10

Роза Веретенникова

Скал кыскисьёс пӧлын йылпумъянъёс лэсьтыса, вераськиз гурт удысъя академиысь ик доцент Михаил Будрин. Туэ нырысетӥ инты басьтыны удалтӥз Эгра ёросысь «Ленин сюрес» эштосысь Роза Веретенниковалы.

— Мон фермаын витетӥ арзэ ужасько ни, — шуэ Роза. – Нош дышетски вал вуз карисе. Дышетскемея уж ӧй шедьты. Соку фермае ужаны ӵектӥзы. Мар скал кысконтэмез кадь! Палэнысен капчи адӟиське ук. Нырысь туж секыт потэ вал. Али дыши ини. Мон та выллем конкурсэ куинетӥзэ пыриськи. Нырысетӥ радаз куатетӥ интые кыли вал. Кылем арын – кыкетӥ. Нош туэ тани нырысетӥ луи.

Розалэсь кӧня ке гинэ бере кылизы Сарапул ёросысь «Мечта» эштосысь Екатерина Бобылева но Сьӧлта ёросысь «Свобода» эштосысь Вера Овчинникова. Нош студентъёс пӧлын вормисе потӥзы гурт удысъя академиысь зооинженерной факультетысь нылъёс Мария Соколова, Александра Чукавина но Анастасия Назарова.

Людмила Сурчакова

Удмурт Дунне
By Удмурт Дунне 10 июня, 2013 15:01