Шаплы выжы

Удмурт Дунне
By Удмурт Дунне 11 июня, 2013 14:55
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Шаплы выжы

Пичи Пурга ёросысь Баграш-Бигра гуртысь нылпи садын ортчиз «Ӵыжы-выжы» ӵошатскон

Пичи Пурга ёросысь Баграш-Бигра гуртысь нылпи садын ортчиз «Ӵыжы-выжы» ӵошатскон

Пичи Пурга ёросысь Баграш-Бигра гуртысь нылпи садын «Ӵыжы-выжы» фестиваль ортчиз. Сое радъязы «Удмурт нылкышно кенеш», Эшъяськон юрт, Нациосын ужан политикая министерство «Удмурт Кенеш» огазеяськон юрттэмъя.

— «Ӵыжы-выжы» фестивальмы туэ 7-тӥзэ ортче ини, — вера «Удмурт нылкышно кенеш» огазеяськонэн кивалтӥсь Надежда Степанова. — Нырысь-валысь сое ортчытъямы Ижысь нылпи садъёсын. Нош та рад гуртэ потӥм — Пичи Пурга ёросысь Баграш-Бигра нылпи садын ортчытӥм. Та нылпи садэн «Удмурт нылкышно кенеш» ӟеч кусып возе, пӧртэм ужрадъёсаз вутскылэ. Татчы ми, семьяослы юрттэт сётыса, психологъёсын но вуылӥмы ини.

Фестивале пыриськыны мылкыд карисьёсты ӟечкылазы но ӟеч мылкыд сӥзизы Пичи Пурга ёрослэн йырыз Александр Ерохин, солэн воштӥсез Валентина Петрова, Баграш-Бигра муниципал кылдытэтлэн йырыз Владимир Ложкин, «Удмурт Кенеш» огазеяськонлэн тӧроез Игорь Семёнов, Пичи Пурга ёросысь «Удмурт Кенешен» кивалтӥсь Василий Москвин.

Сцена вылэ бӧрсьысь бӧрсе потӥзы Ижысь вуэм куноос — азьвыл аръёсы «Ӵыжы-выжы» фестивальын вормисьёс. Соос возьматӥзы фин-угор выжые пырись калыкъёслэсь — поръёслэсь, комиослэсь, мордваослэсь, финъёслэсь, мадьяръёслэсь — дӥськутъёссэс, эктэмзэс, кырӟанъёссэс, сиён-юонзэс.

Нош ӵошатсконэ пыриськизы 6 семьяос — Баграш-Бигра но Куреггуртысь нылпи садэ ветлӥсь пиналъёс но соослэн анай-атайёссы. Нырысь ик возьматоно вал аслэсьтыд выжыдэ, дӥськуттэ, кырӟаны-вераны быгатэмдэ, одно ик утялтоно удмурт пӧрамъёсын. Учкисьёсты паймытӥз 2 аресъем Италмас Волкова. Сое италмас кадь ӵуж-ӵуж, синмез мальдытӥсь удмурт дэремен дӥсяллям. Нылаш али ик кырӟа-вера ини, котьма ласянь усточи будэ.

Нош Руслана Абдрахмановалэн анаез — удмурт, атаез — бигер. Нылаш, куинь кылэз тодыса, будэ. Та семья анаезлэн но атаезлэн выжызы сярысь туспуктэмъёсын тунсыко альбом дасям.

Жюриын пукисьёслы — «Удмурт нылкышно кенеш» огазеяськонлэн ёзчиосызлы Валентина Ившиналы, Любовь Тихоновалы но Вотка карысь удмурт воспитательёслэн «Зарни бугор» клубысьтызы Людмила Князевалы — пӧсь гинэ йӧтӥз. Бырйыны кулэ вал устоосыз пӧлысь тужгес но устооссэ. «Удмуртлыко семья» номинациын азьпал радэ потӥзы Ушаковъёслэн семьязы. Соос выжызэс суредаллям. Туж узыр со! Граждан но Быдӟым ожъёсын ожмаськем песятайёссылэн туспуктэмъёссы тыремын. Выжыязы орден нуллӥсьёссы но вылэм. «Выжызэ утись семья» луизы Малыхъёс. «Сабырлыко семья» нимез басьтӥзы Кондратьевъёс. Абдрахмановъёслэн семьязы «Визьнодлыко» луиз. «Кибашлы семья» нимез утӥзы Боталовъёс.

— Ужрадэ пыриськыны мылкыд карисьёс эшшо шедьысалзы на, дыр, — вера Баграш-Бигра нылпи садэн кивалтӥсь Галина Ерохина. — Но кысык вакыт, мерттӥськон дыр тупаз. Тани Куреггуртысь Боталовъёслэн семьязылы толоназ гинэ фестиваль сярысь ивортӥмы вал. Молодцы! Олокытӥ-мар дасяськыса вуттӥллям, пӧраськем но вайиллям, песятайзылэсь киужъёссэ но вуттӥллям. Асьсэды туж чебер возьматыны быгатӥзы.

— Таӵе ужрадъёс ӵемгес мед луозы, — верало гуртысь анай-атайёс. — Шумпотоно, тэшкылиосмы анай кылэз гажаса но тодыса будозы, сям-йылолъёсмес утьыса возьыны быгатозы. Паймимы, городысь нылпиос сыӵе чебер верасько удмурт кылын!

— Зэм ик но, Ижысь семьяослэн быгатэмзылы тросэз паймо, — веранзэ азинтэ Надежда Степанова. — Ми Ижкарын гинэ медам ортчытъялэ вылэм та фестивальмес, гуртъёсы потаны мед быгатысалмы. Вуоно арын сое ортчытыны чакласькомы Можга ёросысь одӥгаз нылпи садын.

Любовь Тихонова
Туспуктӥз Ксения Ворончихина

Удмурт Дунне
By Удмурт Дунне 11 июня, 2013 14:55
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<