Розаос но нылпиос

Удмурт Дунне
By Удмурт Дунне 25 июня, 2013 15:48
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Розаос но нылпиос

Ирина Игнатьева

Ирина Игнатьева

24 аресъем Ирина Игнатьева туэ воректӥз удмурт модалы сӥзем «Эль ныл» фестивальын: сое тужгес но быгатӥсез модали шуыса пусйизы. Ирина сцена вылын ассэ йӧно возе, мусо пальыштэ. Тужгес но висъямон: Ирина удмурт дэремез но быгатыса нуллэ. Соя шӧдоно: егит ныл сям-йылолъёсты вала но утьыны тырше.

«Эль ныл» џошатсконын сяна, И. Игнатьева пыриськиз «ШейкеR» журналлэн конкурсаз: одӥг гинэ удмурт нылаш.

— Мон вордӥськи Можга ёросысь Бальӟагуртын, — ачиз сярысь маде Ирина. — Пычас школа-интернатын дышетскыкум, синмаськисько вал удмурт кылъя дышетӥселы Надежда Геннадьевна Аркадьевалы: со анай кылын туж чебер, вольыт вераськиз. Берло, Удмурт кун университетысь удмурт кылосбур факультетын дышетскыкум, дышетӥсьёслэн вераськемзы пельме вандӥз — котькудӥзлэн вераськетсы (диалектсы) шӧдӥськиз.

— «Чипчирган» ансамбле но пыриськид.

— Кырӟаны сюлмы кыскиз. Пычасын дышетскыкум, «Рябинушка» ӟуч коллективын кырӟай. Собере Можгалан «Бутьмаре» ветлӥ. Таиз туж кельшиз — чылкак удмурт шуыса.

Ириналэн дӥськутэз «Бутьмар» калык ансамбле ветлыны туж ярасал: бадӟым, быдэс гадьзэ шобыртӥсь азвесь чыртывесез, вашкала куэм дэремез. Ирина ар ӵоже кырӟаз «Чипчирганын», но шуак ышиз. Выльысь Ижысь удмурт егитъёслэн улоназы пыриськиз — табере ини модали сямен.

— Кызьы вуид Mademoiselle Oudmurte агентствое?

— Мамае, Галина Ивановна, удмурт газет-журналъёсты басьтэ. Со «Удмурт дуннеысь» чебер нылъёсты утчало шуыса ялонэз адӟем: малы, пе, ветлонтэмез, тынад кемалась потэ вал ук. Асме но эскереме потыны кутскиз: кыӵе луо, кызьы воштӥсько?

— Маиз улонад воштӥськиз?

— Агентствое пыриськемелэсь азьло мынэсьтым интервью ӧз басьялэ. Кытын ке но тодмало табере.

— Нош казакпиос ласянь?

— (Серекъя.) Тросгес луизы. Тросгес.

— Соос пӧлын кельшымонэз вань-а? Туган кутымон?

— Мон туж синмаськись! Тани кемалась ик ӧвӧл Иван Белослудцев кырӟасез сцена вылысь адӟыса, синмаськи. Мон синмаськисько солэн образэзлы, удмурт луэмезлы.

Сюлмылы тупась пияше ӧвӧл на. Одно ик шедьыны кулэ. Чеберзэ уг учкы, мыным пуш узырлыкез дуногес потэ. Спортэн вырисьёсты туж яратӥсько, сыӵеосыз пала кыстӥськисько. Туганэлэн одно ик мед луысал машина нуллон мылкыдыз. Аслам правое вань, нош машинае ӧвӧл на.

— Тон дышетскондэ быдэстӥд ини. Кызьы табере улонэд азьланьске?

— Дышетӥсьын уг ужаськы ке но, мынам уже нылпиосты будэтонэн герӟаськемын — нылпи юртын воспитатель луисько. Уже туж кельше — секыт ке но. Фанатка мон. Нуналъёсы шаплы ортчо. Группаям 10-11 аресъем нылпиос. Весь соосын бызьылӥсько… Спортэн тае лыдъясько. Куддыръя суткаын 6 час гинэ потэ…

Нылпи юртэ быдэс Удмуртиысь пиналъёс вуо, но ӵемгес — каръёсысь ӟуч пиналъёс. Гуртысь нылпиослэсь соос туж висъясько. Котькуд нунал дышетскисько, нылпи психология ласянь трос лыдӟыны кулэ на. Куддыръя валантэмъёс кылдо. Со валамтэосты быдтон понна трос ужаны кулэ.

Куддыръя ӝыт пал мон нылпиосме люкасько. Ваньмы ӵош пуксьыса, вераськиськом, сиськиськом, чай юиськом. Соку мылкыдзы ӝутӥське.

— Кызьы ачид шутэтскиськод? Туала арын кин вуриське, кин гожъяське…

— Кин ке роза будэтыны малпаське! Мон вань сяськаосты яратӥсько, но висъясько малы ке розаосты. Розаос кузьмало ке, мон соосты вуын пушйытозязы сылэтӥсько. Собере бакчаям поттӥсько но, отын соос выжыясько ини.

Валай, таиз ар ӵоже туж жади, шутэтскыны дыр вуиз. Абхазие мыныны дасяськисько. Кемалась ни шуныт палъёсы ветлэме потэ.

Лариса Дмитриева

Удмурт Дунне
By Удмурт Дунне 25 июня, 2013 15:48
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<