Рок — Волга вадьсын, эрик — сюлэмын

Удмурт Дунне
By Удмурт Дунне 25 июня, 2013 16:43

Рок — Волга вадьсын, эрик — сюлэмын

WdxJT_K-Icc

«Рок над Волгой» фестивальын

Ымныр, быдэс нунал ӵоже шунды шорын улыса, пыжемын. Мугор, быдэс уез автобусын изьыны турттыса, коскамын. Пельёс, 12 час ӵоже крезьгур кылзыса, шуямын. Куара, кырӟанъёс кесяськыса, быремын.

Нош пыжем ымныр вылысь пальпотон али но кысэмын ӧвӧл на, мылкыд весь бугыръяське: малпанъёс герӟаськемын «Рок над Волгой» фестивален.

Европаысь тужгес бадӟымез рок-фестиваль Самара улосвылысь Петра-Дубрава каргурт вӧзын радъяськылэ, туэ 8-тӥ инвожое 5-тӥзэ ортчиз. Гудыръяса ик, ява! Инбам вылын одӥг пилем но ӧз адӟиськы ке но, чилекъяз, сцена вылын «Rammstein» немец группа тыл шоузэ возьматыку, гудыръяз, «Алиса» группа кырӟанъёссэ быдэсъяку. «Би-2», «Чиж & Cо», «Смысловые галлюцинации», «Пикник», «Кипелов», «Аквариум» — рок-кырӟанъёсты яратӥсь котькуд гурманлэн дыльдыез шыр! вияны ӧдъялоз, дыр. Ваньмыз группаос асьсэлэсь тужгес тодмо кырӟанъёссэс быдэстӥзы, соин соосын ӵош кырӟаз возь вылэ люкаськем калык но — оглом 700 сюрс пала адями! Та лыдпус кылем арынлэсь 2 поллы тросгес. Ма меда арысь аре тросгес но тросгес калыкез та фестивале кыске?

Нырысь ик, рок-фестиваль сярысь вераськон мынэ бере, озьыен, со — умой крезьгур, тодмо группаос. Ужрадэз дасясьёс пусъемъя, таяз аре сомында калык люкаськиз хедлайнеръёслы — немец «Rammstein» группалы — луыса. Германиысь эпатажез яратӥсь музыкантъёс тодо, кызьы калыкез паймытыны но бугыртыны. Фестивальын возьматэм шоуэнызы соос дуннеысь бадӟым каръёсын гинэ ворекъяло — Санкт-Петербургын, Барселонаын, Берлинын — табере та списоке Петра-Дубрава пичи каргуртэз но пыртыны луоно, вылды. Немец кылэз тодӥсьтэмъёс но (сыӵеос, малпасько, лачак вал) «Rammstein»-эн ӵош «Du hast» кесяськизы. Ма, ӟуч группаос но кыскизы фестивале асьсэлэсь кылзӥсьёссэс — ваньмыз соос угось ӟуч роклэн историяз пытьызэс кельтӥзы ни, котькуд группалэн — аслаз стилез, аслаз учкисез-кылзӥсез. Но нокыӵе ченгешонъёс пӧртэм группаослэн йыбыртъясьёссы куспын ӧз поталэ, кадь, — калык огкылысь шумпотыса пумитаз вань кырӟасьёсты. Данъяськыса вераны луоз, асьме «Брангурт песянайёс» но, 2011-тӥ арын «Рок над Волгой» фестивале пыриськыса, В. Бутусовен ӵош кырӟаса, таӵе дано группаосын оградэ сюризы.

Крезьгур крезьгурен, но троссэ адямиосты та выллем ужрадъёс кыско на аспӧртэмлыко ыркыт омыренызы, эрико мылкыдынызы. Фестивальын одӥг нунал нимысьтыз улон кадь кыстӥське. Со котькуд адямилы сётэ луонлык нуналысь нуналэ лэсьтон ужъёслэсь огвакытлы пегӟыны, огдышем улонэ мукет шӧм пыртыны. Адямиос кушто асьсэлэсь «лякем тусссэс» (масказэс). Фестивале пырон понна черодын сылыкум, азям сылӥсь ирокезэн пияш вераз, юри та фестивальлы йырсизэ сыӵе кариз шуыса. Собере, пе, выльысь быдэсак ӵышкиськоно луоз — уж дурын, пе, уз валалэ. Нош фестивальын тон котькыӵе лу — нокин кырыж уз учкы. Огдырлы потэ, кылем даурлэн 60-тӥ аръёсаз Америкаын пушъем хиппи культурае выйиськод шуыса: йыр вадсьын — чылкыт инбам, котырад — трос калык, шулдыр крезьгур, ог-огдэ яратон мылкыд. Юнме шат фестивалез нуись Сергей Галанин но кырӟаз: «А что нам надо? — Да просто свет в оконце. — А что нам снится? — Что кончилась война…».

Мыным потэ, ас вактазыгес улыны яратћсьёс но (асме сыӵеен лыдъясько — уг яратћськы трос калыко интыосты), та выллем фестивальёсы сюро ке, чылкак воштӥсько: трос калык но акыльтэмысь дугдэ, адямиос пӧлын шулдыръяськон мылкыд но ӝужа — англичанъёс таӵе шулдыръяськыны яратӥсь адмиез «party animal» шуо — ваньмыз ӵапак тӥни сыӵе «party animal»-ъёслы пӧрмо, кожалод. 700 сюрс адямилэсь зарезьын астэ одӥг шапыкен шӧдонэз номырин уд ӵошаты. Нош куке тон сомында адямиен ӵош, одӥг бадӟым лул сямен, кырӟаськод яратоно кырӟандэ — со дыре номыр кулэ ӧвӧл ни шудо луон понна. Нош кыӵе шумпотӥськод, сомында калык пӧлысь удмурт куншетэн адямиез адӟыса — соин сю ар ӵоже тодмо эшеныд кадь ӟечъяськиськод. Удмуртиысь Самарае ог 12 час ӵоже мыноно ке но, элькунысьтымы трос гинэ адямиос татчы ветло.

Вуоно аре мыныны мылкыд карисьёслы: Ижкарысь Петра-Дубраваозь юри автобусэн туръёс радъямын луо, соин котькинлэн луонлыкез вань татчы вуыны, пыронэз — дунтэк.

«Рок над Волгой» фестивале мынытэк кылиды ке, гырпумъёстэс эн куртчылэ! Гужем ӵоже тӥледыз трос фестивальёс витё на:

5-тӥ-7-тӥ пӧсьтолэзь, Тверь улосвыл, Большое Завидово — «НАШЕСТВИЕ-2013» («Ночные снайперы», «Ляпис Трубецкой», «Пилот», «Король и шут», «Бригадный подряд», «Мельница», «Brainstorm» но трос мукетъёсыз).
13-тӥ-14-тӥ пӧсьтолэзь, Удмуртия, Пироговоысь аэродром — «Свежий воздух» («Радио Чача», «Ногу свело», «7Б»).
19-тӥ-21-тӥ пӧсьтолэзь, Удмуртия, Нечкино — «YLетай-2013» («Сурганова и оркестр», «Louna», «Братья Грим»).
1-тӥ-7-тӥ гудырикошкон, Краснодар улосвыл, Анапа — «KUBANA» («System of a Down», «The Prodigy», «Guano Apes», «Scooter», «Браво», «Наив» но трос мукетъёсыз).

Анастасия Шумилова

Туспуктӥз Ирина Зангарик

Удмурт Дунне
By Удмурт Дунне 25 июня, 2013 16:43
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<