Перепеч-табаньмес веръятэк, эн кошке

Удмурт Дунне
By Удмурт Дунне Июнь 21, 2013 15:26

Перепеч-табаньмес веръятэк,  эн кошке

 

Кафеын калыкез сюдо И. Гущина, И. Кузьмина

Кафеын калыкез сюдо И. Гущина, И. Кузьмина

Пичи Пурга ёросысь Кечол каргуртэ пырон дорын ик кык этажъем бадӟым юрт сылэ — борддораз яркыт буёлъёсын «Радуга» гожтэмын. Та юртлэн кузёез — тодмо ужбергатӥсь Павел Чушъялов.

Комплекс доры вуыку, удмурт кырӟанлэн чузъяськемез быдэс ульча тыр кылӥське. Кафе пушкын удмуртлыклэн шӧмыз эшшо но золгес шӧдӥське: борддоръёсы Удмурт шаерез данъясь суредъёс ошылэмын.

Ми комплексэ нуназе вакыт тупамы. Паймимы, татысь кафее туж трос калык сиськыны ветлэ. Азбарын маке мында машинаос сыло! Озьыен, адямиос шумпотыса татчы кыстӥсько.

— Комплексты туж бадӟым кадь, — паймыса вазиськиськом кафелэн кузёезлы Павел Чушъяловлы.

— 800 квадрат метр. Ваньмыз-ӧвӧлэз 40 ужасьмы, — вера Павел Чушъялов. — Мынам бур киы — администратор Валерий Баушев. Солы котькыӵе ужез оскисько.

— Малы та комплекстэс Кечол каргуртэ пуктыны чаклады? Кемалась-а татчы интыяськиды?

— Аслам вордскем гуртэ, Яган-Докъя, сюреслэсь палэнэгес интыяськемын. Нош Кечол бадӟым сюрес вылын сылэ — Киясае но Татарстанэ калык татӥ ветлэ. Мон та интые нырысь-валысь пичи гинэ магазин усьтӥ вал. Нош кык ар талэсь азьло, басьяськисьёс трос луэмен, сое паськытгес кареме потӥз. 20-30 иськеме, Пичи Пурга райцентре, адямиос пинь эмъяны, йырси ӵышкыны но мукет кулэ луись арбериос понна мыноно луо. Соослэсь улонзэс капчиятон вылысь кыкетӥ этаже арендаторъёслы интыме сётыны малпай. Кинлэн мылкыдыз вань, мед ужалозы.

— Гурт калык шумпотыса татчы кыстӥське, — одӥг ымысь кадь верало Кечолысь нылкышноос. — Азьвыл аръёсы городэ ветлӥськом вал басьяськыны, табере улонмы капчияз, Павел Васильевич кыӵе гинэ вуз уг вутты магазиназ: сиён-юонэз но, дӥськутэз но, юрт котырын кулэ луись арбериез но тырмыт. Сьӧрлон улӥсьёс тросэз табере ми доры октӥськыны ветло. Магазин 8 часын ӵукна усьтӥське ни, нош ӝытсэ 9 часын гинэ ай ворсаське. Павел Васильевичлэн магазинэз вӧл-вӧл, киямы куды кутыса, вань товарез учкыса, ветлӥськом, кыӵе-мар вуз кулэ, сое бырйиськом. Пинь эмъяны но кузь сюрес вылэ потоно уг луы ни, «Радугае» гинэ лыктӥськом.

* * *
Кафеын 12 нылкышноос ужало. Соосын кивалтэ Ирина Гущина.

— Паймоды, ява, ми дорын кин но, кытысь но юбилейзэ, огшоры ӝытсэ, вордӥськем нуналзэ яке сюанзэ ортчытыны уг лыкты, — ужзы сярысь вера Ирина Николаевна. — Ми нокинлы пумит ум луиське, ваньзэ шумпотыса пумитаськомы. Кафеын интымы 50 адямилы чакламын. Со ваньмызлы тырме, эктыны но, шудыны но кыле на. Ӟоскыт потыны кутске ке, гужемзэ мылкыд карисьёс кыре, гужем кафее, потыны быгато. Отын милям юромо кирпичлэсь ӝутэм кык гуръёсмы сыло. Татын ини адямиос сиыны быгато али гинэ гурысь поттэм удмурт пыжиськемъёсты. Ваньмыз сиёнмес ушъяло, ческыт пӧраськоды, шуо. Милесьтым пӧраммес эскерыны ачиз Павел Васильевич вуылэ.

— Адямиез маин сюдӥськом, туннэ нуналлы кыӵе меню пуктэмын, мед тодом, — шуэ ужбергатӥсь. — Соин ик мон нуналлы быдэ татчы лыктӥсько, пӧрамзэс эскерисько.

— Кылӥськиз, тӥ гурт калыклэсь сӥльзэ но дуно дунын басьтӥськоды шуыса?

— «Восточный» хозяйствоысь парсь сӥлез килозэ 110 манетэн басьтыны быгатӥськом. Но ми отчы ум мынӥське, татысь ик, гурт калыклэсь, 130-150 манетэн басьтыны тыршиськом. Скал сӥлез но «Восточныйысь» ик 165-эн луэ басьтэммы, асьмелэнъёслы 180 манет дун пуктӥськом. Соин ик адями шумпотыса ми доры вазиське, вандэм пудоезлэсь сӥльзэ кытчы каром шуыса, городэтӥ курадӟыса уг ветлы.

Ческыт перепечен утялтэ Н. Купцова

Ческыт перепечен утялтэ Н. Купцова

* * *
Гужем кафее кожано кариськимы на. Выжыкылэ шедем кадь потӥмы: котырак вож-вож писпуос, сусыпу но пужымъёс будо, туж чылкыт омырез. Азбар шорын ик маке быдӟа тымет. Со вамен выж вылтӥ потаны луэ. Мылкыдэз ӝуто палэнынгес сылӥсь ӟечыранъёс, пичизэ но, бадӟымзэ но лэйканы доразы ӧтё кадь соос. Бадӟым палатка пушкы пырыса, соку ик син азе усё кузь ӝӧкъёс но пуконъёс. Татын, шундылэсь ватскыса, пӧсь куазен саюлын пукыны туж умой. Соку гинэ ӝуась гурысь поттэм ческыт пӧсь перепечен милемыз утялтӥзы Надежда Купцова но Мария Демидова.

— Ческыт пӧрам сяна, кафеын ужасьёсмы асьсэос ик тамада но луыны быгато, пӧртэм ӝытъёсты ортчытъяло, туж шаплыесь но чупресэсь соос, — ужасьёсыз сярысь ӟеч кылъёс вера кивалтӥсь Павел Васильевич. — Соос милям ваньзы ик пӧраськыны кулинарной училищеосын но музон интыосын дышетскемын. Арлыдын но егитэсь.

Вань на милям пинь эмъян кабинетмы, отын ужа Валентина Волкова. Вурисько Людмила Городилова но Ольга Иванова. Йырси џышке Анастасия Куркакова.

П. Чушъялов вуз карисьёсын

П. Чушъялов вуз карисьёсын

* * *
Сиён-юонэн вуз каронъя отделын 8 кузя нылкышноос ужало. Таяз сменаын — Нелли Юргова, Татьяна Шутова, Екатерина Зюзяева, Антонида Кузнецова. Отделэ пырыса, городысь бадӟымесь супермаркетъёсы вуэм кадь потоно. Магазин паськыт но вӧл-вӧл. Маиз но ӧвӧл отын! Чыры-пыры арбериосын вуз каре Елена Юшкова.

— «Мир» колхозмы куашкан калэ вуиз, — вераськонмы борды итӥсько вуз карисьёс. — Тросэз адямиос ужтэк кылизы. Нош семьяез маин ке но сюдыны, нылпиосты пыд йылазы ӝутыны кулэ. Ваньмызлэн городын уг поты ужамез, уката ик аслад транспортэд ке ӧвӧл, Павел Васильевичлы тау шуиськомы, кӧня муртэ со дораз ужатыны быгатэ.

Гуртоос понна Павел Васильевич, вань сюлэмзэ поныса, тырше. Мед соос но, городын улӥсьёс сямен ик, шутэтскыны быгатозы, шуэ.

Любовь Тихонова
Туспуктэмез: udmfoto.ru

Удмурт Дунне
By Удмурт Дунне Июнь 21, 2013 15:26
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<