«Ой, машина…» вуттӥз Москвае

Удмурт Дунне
By Удмурт Дунне 19 июня, 2013 11:14

«Ой, машина…» вуттӥз Москвае

Алнашысь "Вуюись" ансамбль

Алнашысь «Вуюись» ансамбль

Чуваш музъем вылын «Вместе мы — Россия» фестивальлэн оглюкетэз ортчиз. Чебоксары городэ люкаськизы 20 улосъёсысь турлы-турлы коллективъёс.

Удмуртилэсь данзэ утизы ньыль коллективъёс: Яр ёросысь Вортча гуртысь «Бесермян крезь», Алнаш ёросысь «Вуюись», Пичи Пурга ёросысь Бобья-Учаысь «Арганчи» но Дэри ёросысь Подшивалысь «Марӟан».

Чебоксары городэ Удмуртилэн делегациез кык бадӟым автобусъёсын ветлӥз. Нырысетӥ нуналаз кузь сюрес вылэ потӥзы «Арганчи» но «Марӟан» коллективъёс. Соос пыриськизы конкурсэз сӥё-дано усьтонэ. Нош ми, алнашъёс, яръёсын ӵош 12-тӥ июне сюрес вылэ потӥмы.

Конкурсын ми азьын быгатэмзэс возьматӥзы Оренбург улосысь коллективъёс. Номыр уд шу — туж зол дасяськемын. Зуч-зуч куараосынызы ӟуч кырӟанъёсты кырӟазы.

Но тани Удмурт Элькунысь коллективъёсты яло. Ужрадэз нуись жильыртӥсь куараеныз ошмесо шаермы сярысь кылбур вера. Солэн верам кылъёсызъя сцена вылэ милям «Вуюись» ансамбльмы потэ. Солисткамы Валентина Шарыпова «Ой, машина…» калык кырӟанэз мытэ. Залын чус. Кут лобӟем куара но кылӥське, дыр. Быдэс кырӟанмы огшокчемен чузъяськиз кадь. Мукетъёссэ баян но арган шудэм улсын быдэстӥмы. Вань номеръёсмес учкисьёс шуныт пумитазы.

Милемыз воштӥзы бобья-учаос. Укмыс нылкышноос но нылъёс удмурт крезьгуръёсты шудыса лэзизы, такмакъёсты кырӟазы. Соос бӧрсьы сцена вылэ потӥз «Бесермян крезь» ансамбль. Со возьматӥз «Ныл куран» йылолэз. Татын тужгес но зол кичабонъёсын пумитазы солистказэс Александра Трефиловаез. Нош элькунлэсь программазэ йылпумъязы «Марӟанысь» эктӥсьёс. Соос пыдзэс жалятэк тыпыртӥзы удмурт эктонъёсты. Тросэз учкисьёс асьме артистъёсмылы синмаськизы. Сцена вылысь кошкыкумы, шуныт кичабонъёсын келязы учкисьёс но, жюрилэн ёзчиосыз но, конкурсэз радъясьёс но. Ваньмыз кырӟанъёс удмурт кылын ке но чузъяськизы, учкисьёс валазы кадь соослэсь пуштроссэс.

Ӵуказеяз нуназе бере конкурс азьланьтӥськиз. Нош ми кузь сюрес вылын вал ни. Алнашамы вуыку, тодмо ӧй вал на конкурслэн йылпумъянъёсыз. Ӝытаз жингыртӥзы, ӟеч дунъязы шуыса. «Вуюисьлы» «Тужгес ӟеч режиссура» диплом сётэмзы сярысь веразы. Со сяна, «Вуюись» коллективмы «Калык кырӟанъя ансамбльёс» номинациын лауреат луиз. Нош «Бесермян крезь», «Марӟан» но «Арганчи» коллективъёс ас номинациосазы нырысетӥ степенё дипломъёсын пусъемын.

«Вуюись» ансамбль вуоно арын ноябре мыноз Москвае — татын ортчоз «Вместе мы — Россия» конкурслэн йылпумъясь люкетэз.

Людмила Сурчакова

Удмурт Дунне
By Удмурт Дунне 19 июня, 2013 11:14