Лэйкась сцена, яке Арлыдоосты воштозы-а егитъёс?

Удмурт Дунне
By Удмурт Дунне Июнь 27, 2013 18:01
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Лэйкась сцена,  яке Арлыдоосты воштозы-а егитъёс?

Щепкин нимо театрысь вуизы егит артистъёс

Щепкин нимо театрысь вуизы егит артистъёс

Щепкин нимо училище бере Удмурт театре вуизы выль пыжем артистъёс. Соин валче та юртын ӟоскытгес луиз, калыке вӧлмизы арлыдо артистъёсты театрысь палэнтон сярысь вераськонъёс.

Кылдэм югдур пумысен кенешиськом Удмурт театрлэн кивалтӥсеныз Андрей Ураськинэн.

— Андрей Иванович, кыӵе мылкыдын ортчиз егитъёсын пумиськон?

— «Ослоп» спектаклез пуктон нунал азьын коллективен пумиськон ортчиз. Егитъёсты ӟечкыланы ветлӥз культурая, печатья но иворъёсъя министр Дмитрий Иванов. Дышетӥсьсы, «Ослоп» спектаклез дасясь режиссёр Дмитрий Кознов но котькудӥз сярысь ӟеч кылъёс вераз. Пумиськон туж шуныт мылкыдын ортчиз.

Егитъёс понна ужан интыос — гримёркаос — дасяса возимы, выль ӝӧкъёс басьтӥмы. Улыны интыямы культурая колледжлэн общежитияз, комнатаын быдэн кык кузя улозы. Бюджет чотын ужасьёс понна корка дась луиз ке, улон инты отчы висъяськоз. Но со служебной квартираос луозы. Кин ке театрысь кошкиз ке, улон интызэ кельтоно луоз. Дышетскыны пырыкузы, котькудӥныз огкыл гожтэмын элькунысьтымы. Соя егитъёс вить ар ужаны кулэ дорамы.

— Кыӵе ке мукет уже интыяськизы ке, республика чотын дышетскем коньдонзэс берыктоно луозы-а?

— Котькуд студиын дышетскемъёс пӧлысь кин ке но сцена дорозь уг вуы яке берло мукет уже выже. Шуом, кин ке радиое яке телевидение кошкыны мылкыд кариз ке, контрактъя коньдонзэ берыктыны кулэ. Но улонын котькыӵе учыръёс луо, сое но лыдэ басьтоно. Кызь мурт дышетскиз ке таяз студиын, кыкез нылъёс Удмурт театре уз берытске, диплом спектакльёссэс возьматонэ пырисько ке но. Соос бызизы военнойёслы. Законъя та нылъёсты дышетскем коньдонзэс берыктытыны уг луы — соос картъёссы вӧзын луыны кулэ.

— Егитъёсты уже кутыны тӥ дасесь вал-а?

— Штатамы 33 артист лыдъяське, егитъёс вуэмен валче со шӧдскымон йылӥз. Валамон ини, сомында адямиез возьыны ум быгатэ. Вазиськимы ик вал, штатмес йылэтыны курыса. Будэтэм гинэ ӧвӧл, кулэстоно луоз на, шуо, элькун бюджетысь коньдон ӧжыт висъяськемен. Но дышетсконзэс йылпумъямъёслы ужан интыос кылдытыны быгатӥм. Соос понна кӧня ке инты азьло ик чакламын вал. Куд-огзэ артистъёсты мукет уже выжтӥм. Тани Алексей Ложкин режиссёре дышетске, табере со режиссёрлэсь ужзэ быдэсъялоз. Пӧртэм амалъёс утчано луиз.

— Озьы ке но ӝоже кылемъёс вань.

— Ми нокинэ ум улляське. Кызьы ужамы, озьы ик ужаломы. Мӧйыоссэ поттӥськомы гражданско-правовой договоръя ужанэ. Со мынам гинэ решение ӧвӧл, администрациен, коллективен кенешыса кутэм ужпум. Огкыл гожтэмын укмыс муртэн — Вероника Садаеваен, Галина Владыкинаен, Валентина Загуляеваен, Раиса Нефёдоваен, Фаина Будинаен, Валентина Меняйлоен, Леонид но Пётр Романовъёсын, Вячеслав Байковен.

Та уж капчиен ӧз сётӥськы мыным но, асьсэлы но артистъёслы. Кӧня ке пол кенешыса но пумиськылыса, та амалэн ужаны выжтэмъёсын огкылэ вуимы: соосты кутомы штатэ мукет ставкаосъя, совместительёсты палэнтыса. Кин ке ужалоз вокалъя педагог луыса, кин ке — кыл бордын, мукетыз эктонъёс дасялоз но мукет. Коньдон тыриськоз на спектакльёсын шудэмзы но репетициосы ветлэмзы понна.

— Андрей Иванович, егит артистъёс театре нырысьсэ уг вуо. Шуом, Уфаысь студиез йылпумъямъёс лыктыку но, огыр-бугыр вал-а?

— Арлыдоосты егитъёс воштыку, котьку но секыт йӧтэ. Азьло аръёсы но капчи ӧй вал, малпасько, ужысь кошкытонъёс но луылӥзы. Студимы сярысь ке верано, ми театре трос кузя ӧм лыктэ, соин шуг-секытъёс али кадь ӧз кылдэ. Сомында муртэ дышетскыны кутыку, кыӵе ке но воштонъёс ортчытоно луоз шуыса, тодӥсько вал. Но такем секыт луонзэ ӧй ик малпалля.

— Кӧня ке аръёс талэсь азьло Вероника Садаеваен пумиськылӥ. Быгатонлыкъёсыз но арлыдыз шоры учкытэк, мугорзэ но кыдатэ, вераськон кылыз бордын но ялан ужа. Но котькуд артист сярысь озьы вераны уз луы: кема аръёс ужаса но, будонзы уг адӟиськы. Та укмыс адями — театрысь зэмос кизилиос — ужысь кошконо луизы ке, театр уз ышты меда учкисьёссэ? Собере егитъёслы но быгатӥсь наставникъёс кулэ.

— Зэм, диплом басьтыса гинэ, артист уд луы, со понна котькуд нунал ачид бордын ужано. Опытэн адямиос но вӧзын луыны кулэ. Учкись но соослы дышемын. Соин ик вераськон уг мыны палэнтон пумысен.

Мукетъёссэ артистъёсты басьтоно ке, Уфаысь искусствоосъя институтэз но ГИТИС-эз йылпумъямъёсты, соос но тодмоесь ни…

— Москваысь театръёс али контракт амалэн ужаны выжо. Та сярысь ӧд малпаськылэ-а?

— Москваос гинэ ӧвӧл, поръёс но контракт амалэн ужало ни. Театрзэс ворсам каро но артистъёсты контракт амалэн ужаны куто. Кема аръёс џоже тыршемъёслы но асьсэлы рольёс вылын ним лэсьтэмъёслы со умой — спектакльёсын шудозы, уждун но трос басьтозы. Тросэз потоз режиссёр бордысь но: со ужалоз аслыз тупась артистъёсын, мукетъёсыз, асьсэ рользэс возьмаса, пуконо луозы. Ми та амалэн ужаны дась ӧвӧл на. Бюджет ласянь шугъяськонъёс вань ке но, оскиськом, театрмы ачиз но коньдон поттыны быгатоз.

Лия Малых
Туспуктӥз Константин Никитин

Удмурт Дунне
By Удмурт Дунне Июнь 27, 2013 18:01
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<