Кулябиноос асьсэды возьытэ уз вуттэ

Удмурт Дунне
By Удмурт Дунне Июнь 7, 2013 09:57

Кулябиноос асьсэды возьытэ уз вуттэ

Валтӥсь агроном М. Бурков

Валтӥсь агроном М. Бурков

Ува ёросын шоро-куспо гурт хозяйствоос пӧлысь одӥгез устоез но умой азинскисез луэ «Луч» эштос. Солэн кивалтӥсеныз Геннадий Апполосович Бекмачевен лыдӟисьёсмес тодматӥм ни. Нош туннэ ужъёссы но турнаны дасяськемзы сярысь кенешиськом хозяйствоысь валтӥсь агрономен Михаил Бурковен.

— Михаил Васильевич, кызьы тулыс бусы ужъёстэс ортчытӥды? Люкетӥсь вал-а?

— Валэс юосмес ӟеч дасям муэ согимы, агротехникалэсь куронъёссэ чакласа. Ушъяськымон ӧм ке но, кӧня ке минерал сылалъёс но басьтӥм. Али химия суретъёсын будосъёсмес утиськом, химпрополка лэсьтӥськом. Пайдаез син азьын, жаг турын юосты уг ӝокаты.

Таин ӵош ик вераме потэ: одӥгез но тулыс огвыллем уг луы, маин ке но висъяське. Туэзэ урод шуыны ым уг усьтӥськы, но огдыре уй-нунал зорем бере бусы ужъёсмы 3 нуналлы гуньдылӥзы. Собере механизаторъёсмы, оло, кык полэс кужымен тыршизы, бусыысь потатэк ужаны дась вал. 320 гектар бусыосмес чабей но сезьы кизьыны кык пол небӟытӥм-дасям. Табере тыршемзылэн емышез умой адӟиське, валэс юосмы ӵогыр-ӵогыр чебер пото. Туэ узьым но умой толйиз. Озьы ик шуыны луоз трос аръем турынъёсмы сярысь.

— Ӝоген кутскоз пудо сиён дасян. Кызьы солы дасяськиськоды?

— Дырлэсь ортчемзэ шӧдыса но вуоно ӧвӧл. Соин ик эштос мастерскойын та вие уж пӧзе. Механизаторъёс пудо сиён дасян техниказэс — косилкаоссэс, КСК-100 но «Марал» комбайнъёссэс — тупатъяло. Та ужъёсты умой радъяз механик Андрей Мерзляков. Усто специалист 2003-тӥ арын йылпумъяз Ижысь гурт удысъя кун академиез, калыкен огкыл шедьтэ.

Механизатор Ю. Литвинов

Механизатор Ю. Литвинов

Кибашлы, усто механизаторъёсмы трос. Тани 1984-тӥ арысен техника бордын тырше ни Юрий Ильич Литвинов. Туэ КСК-100 комбайнэныз 6-тӥ гужемзэ бусые потоз, солэсь азьло 4 гужемзэ вуж комбайнэн пудо сиён дасяз. Али но тэк уг улы, фермае вож сиён — подкормка — турна. Усто механизатор уно пол пусйылэмын хозяйстволэн но ёрослэн данъян грамотаосынызы.

Солэсь адӟем карыса, ас удысазы синмаськымон тыршо Пётр Борисович Петров но Николай Андреевич Ожегов. Али соос косилкаоссэс выльдо. Петровлэн Италиын поттэм навесной косилкаез ваньмызлэсь чылкыт турна. Пётр Борисович сое МТЗ-80 трактореныз нуллэ. Озьы шуыны уг луы асьмелэн роторной КРН-2,1 косилкамы сярысь. Но оглом мон сое урод уг кариськы. Кузёез Николай Андреевич номырлы уг ӝожтӥськы, со эштосын 33 ар механизатор луыса ужа.

— Кӧня но кыӵе пудо сиён дасялоды?

— Туэ милям пудо йырлы быдэ шорлыдын ичизэ 30 центнер пудо сиён дасяно. Со понна складъёсы пыртоно 1 сюрс 500 тонна зернофураж, 8 сюрс тонна силос но сенаж люкано, 600 тонна турын но 800 тонна куро. Лыдпусъёс пичиесь ӧвӧл. Но планъёсмес одно ик быдэстом. Сотэк угось йӧл но, сӥль но трос уд потты, эштос кассае коньдон но уз вуы. Та вие быдэс хозяйствоя скаллы быдэ нуналаз пуд йӧл потэ, сое ӧжыт уд ке но шуы, миым та дырен ӵошатыса, кӧнялы ке ичигес люкаське. Пудо утисьёсмы сое валало но азьланьын уногес йӧл кыскон вылысь пӧртэм луонлыкъёс утчало.

Геннадий Романов
Туспуктэмез: udmfoto.ru

Удмурт Дунне
By Удмурт Дунне Июнь 7, 2013 09:57
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<