Чайковский висьытэ…

Удмурт Дунне
By Удмурт Дунне Июнь 13, 2013 18:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Чайковский висьытэ…

П. Чайковскийлэн музей-юртэз выльдэмез вите

П. Чайковскийлэн музей-юртэз выльдэмез вите

2015-тӥ арын Удмуртиын паськыт пусъёзы П. Чайковский композиторлэн вордӥськемез дырысен 175 ар тырмонэз. Та чебер лыдпусозь кыдёкын на кадь, нош Вотка городлэн кивалтӥсьёсыз йыр бордазы кырмиськемын: вань чакламзэ лэсьтыса вуттомы-а, пе.

Культурая, печатья но иворъёсъя министр Дмитрий Иванов ивортэмъя, та фестивалез радъяны федерал бюджетысь висъяны чакламын 3 миллиард манет. Эшшо сомында ик уксёен шумпоттыны турттэ асьме республикамы. Собыдӟа коньдон концерт пуктон вылысь гинэ уг висъяськы. Уноез кошкоз Ижез но Воткаез выльдыны. Ваньмыз-ӧвӧлэз тупатъямез кулэ каре 30 объект. Озьыен праздник шӧлкын тодмантэм выльдӥськоз Ижысь операя но балетъя кун театр. Солэсь липетсэ воштӥзы ни. Нош 2014-тӥ арысен пушсэ выльдозы. Та ужъёс йылпумъяськем бере басьтозы выль рояль. Туннэ ворсаськемын Национальной библиотекалэн юртэз. Зол вужмемын республикаысьтымы культурая колледжлэн юртэз. Паськытатыны медо на «Ижмаш» культурая юртэз.

Д. Ивановлэсь таӵе малпанъёссэ кылыса, Воткаысь кивалтӥсьёс но Кун Кенешысь куд-ог депутатъёс бугыръяськыны ӧдъязы: нош ку, пе, басьтӥськозы Вотка город борды? Сӥземын Чайковскийлэсь музей-усадьбазэ выльдыны, крезьгуръя школаез тупатъяны, «Юбилейный» культурая юртэз синмальдымон карыны, пруд котырез чеберъяны. Вань ужъёсты вераса но уд быдты. Но туннэ вань со объектъёсысь огез борды но басьтӥськыны уг луы, пе. Котькудӥзлы нимысьтыз проект, смета лэсьтоно. Нош со проектъёсты лэсьтыны уксё 3 процентэз сяна вуэмын ӧвӧл.

Дунтэк нокинлэн но ужамез уг поты. Воткаос паймо мукетызлы но: «Юбилейной» культурая юртсы пичи, собыдӟа фестивале быдэс Россиысь но солэн палэнысьтыз вуэмъёс кызьы залэ тэрозы меда? Ӵапак татын ортчыны кулэ уго тужгес ӟечъёсыз концертъёс. Оло, пе, куноосты пумитано стадионын. Зэм, берлояз пуконъёсыз гинэ но ӧвӧл, бызьылон сюресъёсыз но кемалась ожоен шобырскемын ни.

— Фестивале ӧтьыны малпаськомы Россиысь калык артистъёсыз, операя кырӟасьёсыз Д. Хворостовскиез но А. Нетребкоез, Мариинский театрез. Кызьы соосты стадионэ поттод меда? — пайме Д. Иванов. — Чебер концертэз чебер азьын кылэм-адӟем потэ ук. Ӵапак таин сэрен ик ужрадэз культурая юртады ортчытыны малпаськомы, отысен пруд котыре потомы. Пруд азьысь площадкаосын но концерт луоз уго.

Вань та бугыръяськонэз туж сак кылзизы Кун Кенешлэн Тӧроезлэн воштӥсьёсыз С. Кривилёва но В. Невоструев, Кун Кенешысь ялан ужась комиссиослэн кивалтӥсьёссы. Таос Воткаысь кивалтӥсьёс но Лэсьтӥськонъя, архитектурая но улон инты политикая министерство азе ужпум пуктӥзы: вань проектъёсты дасяно туэ ноябрь толэзёзь, сотэк одӥг уж но интыысьтыз уз вырӟы.

Светлана Кривилёва Д. Ивановез малпаськыны куриз на Чайковскийлэсь музей-усадьбазэ паськытатон пумысен. Бордаз ик сылэ коръёслэсь ӝутэм улыно-вылыно юрт. Со Чайковскийёслэн школазы вылэм. Кызьы огшоры улӥсь кие сюрем — ӧйтӧд. Со липетсэ выльдэм, укнооссэ пластиклы воштэм. Но юрт буш улэ, зор-кот улын сисьме, сое рос-прос чаклась ӧвӧл. Музей-усадьба кие со юрт выжысалыз ке, югдур воштӥськысалыз, оскытэ кивалтӥсез А. Боголюбская. Но юрт кузё со понна куре 5 миллион манет. Та кӧшкемын лыдпус сярысь ик малпаськыны косӥз С. Кривилёва.

Елена Фёдорова
Туспуктэмез: udmfoto.ru

Удмурт Дунне
By Удмурт Дунне Июнь 13, 2013 18:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<