Корт даурлэн шокчемез

Удмурт Дунне
By Удмурт Дунне 25 июня, 2013 15:34
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Корт даурлэн шокчемез

Вашкалаеныз тодматскон

Вашкалаеныз тодматскон

Сарапул ёросысь Нечкино черкогурт вӧзысь инкуазь чебереныз ваньзэ адӟылэм адямиосты но паймытоз. Тужгес ик ӵукна. Кам шур нокытчы дыртытэк вӧл-вӧл бызе, мынӥсь-ветлӥсьёслы чильк-вальк кырмышъя. Шунды тылсиос бусыысь ю шепъёсты, турын-куаръёсты маялляло, кыдёке кыстӥськись бусы сюрес кузя мынӥсез пальпотто.

Бусы кузя мынӥсь — со мон. Вамышъясько Кам шур дуре интыяськем археологъёс доры. Горбуново гуртэтӥ потыса, ог 3 иськемзэ бусыетӥ мыноно. Нюлэс доры вуыса, монэ пумитаз Удмурт кун университетысь студент. Туж вераськись, оломар куспын лагере вуим.

Копан гурезь вылын мынэ. Йылаз вуытозям, ньыль пыд вылам усисько ни вал — жади. Эше, жадемме адӟыса, пальпотӥз: ми но, пе, нырысь тубаса-васькаса жадиськом вал, табере номыр ик ӧвӧл ни. Гурезь вылын дышетӥсьёс, студентъёс но нылпиос адӟиськизы. Археологъёсын кивалтэ УдГУ-ысь наукая ужась Светлана Перевощикова. Со пыр-поч мадиз копан ужъёс сярысь:

— Копаськом корт даурысь памятникез — Усть-Нечкинской городищеез. Кык арнялы татчы лыктӥм. Копаськом Кам шурлэсь 100 метрлы вылӥын — городищеос гурезь вылэ интыяськылӥзы. Одӥг палаз Кам шур, мукет палаз Нечкинка шур бызе. Городище кык палтӥз ик бадӟымесь музъем бугоръёсын юнматэмын на. Вашкалаослэсь та выллем улон интыоссэс Кам дурысь котькуд гурезь вылысь шедьтыны луоз.

Усть-Нечкинской городище 20-тӥ даурлэн кутсконаз шедьтэмын вал. Соку ик нырысетӥ копан ужъёс мынӥзы. Шедьтӥз та городищеез Сарапулысь шаертодонъя музейысь тодосчи Лев Беркутов. 1909-тӥ арын со дядиеныз ӵош та интыосты учкем-эскерем, нош 1913-тӥ арын копан ужъёс кутскиллям. Жаляса верано, вань копасьёс пӧлысь Лев Африканович гинэ зэмос специалист вал. Солы юрттӥллям матысь гуртъёсысь крестьянъёс. Озьы ке но со дыре туж трос аспӧртэмлыко арбериос шедьтэмын вал: пукыӵ ньӧлъёслэн но копьёослэн туй йылъёсы, горд сюйлэсь тусьты-пуньы пырыос но мукетыз. Ваньзэ сое Сарапулысь шаертодонъя музейысь адӟыны луэ.

— 2006-тӥ арын та гурезь вылысь нюлэс ӝуаз, озьы Лев Беркутов бере ог 100 ар ортчыса, 2007-тӥ арын нырысьсэ татчы лыктӥмы. Котькуд гужем ужаськомы, — веранзэ азьланьтэ Светлана Александровна. — Ужмылы люкето зарни но мукет дуно арбери утчасьёс. Соос котькуд ар ми бере вуыло. Серем, мар татысь шедьтэмзы потэ? Нокыӵе зарни татын ӧвӧл, 6 ар ӵоже одӥг манет но ӧм шедьтэ на. «Сьӧд копасьёс» бервылзэс уг утялто: копам гуоссэс согытэк кельто. Копан ужъёсы, студентъёс, дышетӥсьёс сяна, 2008-тӥ арысен школаын дышетскись нылпиос но мыло-кыдо пырисько. Котькуд ар Ижкарысь, Дэри но Сарапул ёросъёсысь пиналъёс вуо.

Та арын Нечкино шор ёзо школаысь 5-тӥ-8-тӥ классъёсысь 9 нылпи городищеын ужа. Биологияя дышетӥсьсы Николай Дубовцев данъяськыса вера:

— Куинетӥ арзэ вуим ни. Археологъёслы юрт-тӥськом. Нылпиослы туж кельше. Соос асьсэ культуразэс гажаны кутско, вордӥськем шаерзылэн историеныз тунсыкъяськыны кутско. Ужаськомы ӵукна, нуназе бере нылпиос понна пӧртэм ужрадъёс ортчо. Кылсярысь, шашкиен шудонъя турнир. Татын ик гурезь улын палаткаосын улӥськом. Лыктэммы токма уг луы. Одӥгез пияшмы пукыӵ ньӧллэсь туй йылзэ но шедьтӥз.

Нылпиослы татын зэмен но кельше. Нечкино школаысь 8-тӥ классэз быдтэм нылъёс Юлия Журавлёва но Кристина Перевощикова кык арнялы татчы вуиллям. Шуо, милемлы татын туж кельше. Одӥг минутмы но, пе, тэк пукыны ӧвӧл. Весяк мар ке но кариськом, археологъёслы юрттӥськом. Ӵемысь асьмеос но мар ке но шедьтӥськом. Оло, азьлань улонмес историен но археологиен герӟалом, пе.

Туэ археологъёслэн тужгес но дуно шедьтэм арберизы — корт тӥр но пукыӵ ньӧллэн туй йылыз. Озьы ик горд сюйлэсь посуда пырыос трос шедё. Таяз гужем археологъёс эшшо но тросгес тодӥзы Усть-Нечкинской городище но вашкала дыре адямиослэн улэмзы сярысь. Ужъёссы бырем бере гуосты согыса кельтозы, нылпиосын ӵош тодон-валанзэс муромытозы ни вуоно гужем.

Ваньзэ тае адӟеме-тодэме бере берлань вамыштӥ Горбуново гурт пала. Татысь воргоронъёсын вераськыса-мадиськыса кема гинэ пуки на.

Паша Вахрушев

Удмурт Дунне
By Удмурт Дунне 25 июня, 2013 15:34
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<