Кӧня киземзэ уг лыдъя…

Удмурт Дунне
By Удмурт Дунне 27 июня, 2013 16:20

Балезино ёросысь Мичурин нимо гурт кооперативысь 55 аресъем Василий Корепанов 30 арзэ ни нянь будэтэ. Тракторен но, комбайнэн но огкадь ӟеч кыл шедьтэ.

Хозяйствоен кивалтӥсь Алексей Борисов шуэ:

— Корепанов мултэс ноку уг вераськы, уг куареты — ас ужзэ лэсьтэ. Тазэ бусыез гыроно-кизёно шуыса но уд вуттӥськы на кадь, со отын гуретэ ни трактореныз. 220 ужась пӧлысь Василий Юрьевич — огез оскымонэз.

Соин ик хозяйствое вить ар талэсь азьвыл выль тракторъёс вуттэмзы бере, огзэ нырысь ик солы сётӥзы. Оскымон киос улын техника но тӥяськытэк кема ужа.

Василий Корепанов ёросазы котьку азьмынӥсьёс радын. Но аслыз та нокытчыяз уг йӧты, лэся. Туэ понна кӧня гектар музъемез гыриды-кизиды шуыса юа ай, мар вераны ик ӟудоз. Мон, пе, лыдъяськыса уг пукиськы — мыным руль бергатоно. Кӧлытэк потэм уйёс но, пе, вал. Доре пеймыт луэм бере бертӥськод. Мугор зырен тышкам кадь висе. Нош ум уг лыкты. Син шорысь уг кошкы гырымтэ бусы. Йырын малпан: куазь зорытэк мед чидалоз на кӧня ке, кизён йылпумъяськиз ке, кӧлыны но луоз ни, пе. Тӥни макем яратэ со аслэсьтыз ужзэ!

Пичи дыръяз одӥг гинэ льӧль малпанэз вал: шофёр луоз. Со малпанэз быдэсмемын. Мар, пе, кулэ на. Кык нылыз, кык внукез шумпотто. Екатерина кышноез хозяйствоязы ик диспетчерын ужа. Кивалтӥсьсы уждунэн уг обидьы, шуэ тракторист. Май понна тани 48 сюрс манет люкаськиз. Зэм, бусы ужъёс вань дыръя гинэ сомында коньдон омыртыны луэ. Толалтэзэ копейка но басьтытэк доразы пукисьёс но вань. Но Василий Корепанов небыт диван вылын лӧж-лӧж кылльыны дышемын ӧвӧл. Толалтэ со хозяйствоысьтызы заправкае кутске, кладовщик кариське.

Ӟеч ужад ке, котьку котькытын синйылтозы, шуэ Василий Корепанов. Но адямиез мултэс ушъяны но уг яра, дыр, пыд улысьтыз музъемзэ адӟемысь дугдоз. Соин но, лэся, Президент Александр Волков премиен пусъемысь но керпотэ.

— Таӵе-таӵе данъятэк но, мон ужало, — оскытэ тракторист. — Музъемтэк мон улыны уг быгатӥськы. Но мон кадьёс пересьмимы ке, бусые потӥсь луоз на меда? Хозяйствоямы ужасьёслэн шоро-куспо арлыдзы 44 арес. Мӧйымиськом. Вылӥ кивалтӥсьёс мед малпаськозы вылэм гуртъёсы егитъёсты кыскон сярысь. Техника но, гидъёс но вужмо. Выльдӥськон луиз ке, пинал калык палэнэ уз кошкы, дыр.

Елена Фёдорова

Удмурт Дунне
By Удмурт Дунне 27 июня, 2013 16:20
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<